26 нчы апрель -  бөек шагыйребез Г.Тукайның туган  көнендә

  Г.Тукай исемендәге Ашытбаш урта мәктәбе директоры Кавиева Рәмизә Рәис кызы җитәкчелегендәге делегация Барда җиренә аяк басты. Бүгенге  очрашуның  сәбәпләре бик куанычлы иде. Биредә Барда гимназиясе , Г.Тукай исеме бирелү уңаеннан , республикакүләм  тантана үткәрә.

   Программа бик күп чараларны үз эченә алган иде. Ул иртәдән кичкә кадәр дәвам итте. Иң беренче Барда гимназиясе директоры Исмәгыйлева Нурия Габдрахман кызы гимназиянең уңышлары, киләчәккә планнар белән таныштырды. Ике мәктәп арасында узган чараларга нәтиҗә ясалды, эшләр планлаштырылды.  Г.Тукайның тормыш юлы һәм иҗатына багышланган  дәресләр, класс сәгатьләре югары дәрәҗәдә үтте. Аннан соң көн тәртибе буенча Г.Тукай һәйкәленә чәчәк салу һәм митинг булды. Төшке аштан соң, Барда муниципаль районы башлыгы урынбасары Балтаева Татьяна Владимировна белән эшлекле сөйләшүгә җыелдык. Иң беренче Татьяна Владимировнаның саф татарча чыгышы , аралашуы сокландырса, икенчедән мәгариф милли мәсьәләләрен тирәнтен тою, бу юнәлеш буенча нәтиҗәле эш алып баруы бездә ихтирам уятты.

     Барда районы буенча экскурсия, аның тарихы, танылган шәхесләре,үткәне һәм бүгенгесе белән танышу безнең күңелләрдә уелып калды. Шулай ук шушы төбәктән чыккан язучылар һәм шагыйрьләр белән дә  түгәрәк өстәл артында сөйләшү , ике якны да борчыган сорауларга җавап табу, балаларны иҗат эшенә тарту, уртак милли мирасыбызны түкми-чәчми яшь буынга  җиткерү мәсьәләләре каралды. Барда мәгариф бүлеге җитәкчесе Тляшев Илдар Әсхәт улы гимназия үрнәгендә барлык район мәктәпләрендә  дә милли  аң, милли тәрбия бирү буенча эш алып барылуы турында сөйләде. Ике белем йорты арасындагы эшчәнлекнең уңай нәтиҗәләренә  һәм башкалар өчен дә үрнәк булуына басым ясады. Җәйге чорда баларның ялын күмәк рәвештә оештыру  буенча план-проект тәкъдим итте.

    Барда үзәк  мәдәният йорты шыгырым тулы иде.Гимназиянең шатлыгын уртаклашырга җитәкчеләр, ата-аналар, балалар  җыелган, дәрәҗәле кунаклар кайткан. Бәйрәм рухы Барда  районына      гына түгел , ә бөтен республика киңлекләренә таралган кебек иде. Укучылар, укытучылар, ата-аналар коллективының  берсеннән-берсе   матур, эчтәлекле чыгышлары  котлаулар, тәбрикләүләр белән үрелеп барды.  Бүгенге зур тантанада катнашып, хезмәттәшләребезне зур җиңүләре белән котлау,үзебезнең теләкләребезне җиткерүгә без бик шат идек. 

    Зал татар халкының  гимнына әйләнгән  “Туган тел”не   җырлаганда урамда инде күптән караңгы төшсә дә , берәүнең дә тиз генә таралышасы килмәде. Сөйләшәсе сүзләр, уртаклашасы фикерләр күп иде.

    Татарстаннан читтә дә  татар моңы, Тукай рухы  яши, яшәрә ,чәчәк ата. Бүген без моңа тагын бер кабат инандык, сокландык һәм горурландык.

Кысна башлангыч мәктәбендә 20-26  апрель көннәрендә “ Тукай безнең күңелләрдә” атналыгы узды. Укучылар бөек шагыйрьнең биографиясе белән таныштылар,шигырьләрен яттан сөйләделәр,әсәрләрен сәхнәләштерделәр.Йомгаклау көнендэ укучыларның Г. Тукай әсәрләренә ясалган рәсем һэм кул эшләреннән күргәзмә оештырылды. Атналыкта укучылар актив катнаштылар.

 Бүген татар халкының сөекле шагыйре Г. Тукайның туган көне.

Күренекле татар әдибе Рабит Батулла “Тукай - ул шәм, ерагайган саен, аның яктылыгы көчәя генә”, дигән тирән мәгънәле фикер әйткән . Әйе, Тукай – шәм, милләт шәме! Шәмнең төптән ераграк булган саен яктыртуы көчлерәк була бара. Инде 131 ел татар халкы Тукай шәме яктысында җылына, аңа карап үзенең яшәү кыйбласын билгели.

Бүген мәктәбебездә экология һәм МЧС хезмәткәрләре белән очрашу булды. Экология икеайлыгы уңаеннан , чистарту, яшелләндерү , табигатьне саклау турында сөйләшенде. Шулай ук пожар, теракт  куркынычсызлыгы аңлатылды.  Сулыкларда сак булу кагыйдәләре ассызыкланды.  Ахырдан укучылар үзләрен кызыксындырган сорауларга җавап алдылар.

Бүген безнең мәктәпкә  “Дом дружбы народов” хезмәткәре  җырчы һәм төрле уен коралларында уйнаучы Солтан Фидаис улы Шигапов килде. Ул укучыларга музыка һәм музыка уен кораллары турында файдалы мәгълүмат бирде, Г.Тукай иҗатын искә алды һәм татар халык көйләрен Тукай шигырьләренә язылган җырларны башкарды. Укучылар аны бик яратып каршы алдылар, бергәләп җырладылар, биеделәр.