Искечә Яңа елны каршы алу 13 нче гыйнварда билгеләп үтелә. Без дә бу бәйрәмне күңелле итеп үткәрдек. Яңа ел җырлары бакчабызда яңгырап торды. Балаларның күңеле шат, күтәренке булды. Яңа еллар бары шатлык, сәламәтлек, уңышлар алып килсен.

Беренче кечкенәләр төркеме балалары бик кызыксынучан.Алар бик теләп яңалыклар белән танышып, яңадан яңа белемнәрне туплап баралар.Йорт хайваннары белән дә таныш алар. Һәр йорт хайваны турында, бигрәк тә нәрсә белән туенулары, кешелеккә китергән файдалары турында сорауларга җавап бирәләр. Уңышлар аларга!

Яңа ел бәйрәме уңаеннан бакчабызда рәсем һәм кул эшләре конкурсы оештырылды.Һәр төркем балалары һәм әти-әниләр бик теләп, актив катнаштылар. Бертуган Гилазовлар кар бабай ясаганнар. Кар бабайлар бәйрәм барышында чыршы янында төп кунаклар булып тордылар. Зурлар төркеменнән Гилазов Ильяс һәм икенче кечкенәләр төркеменнән Гилазова Илинә конкурсның җиңүчеләре булдылар. Әти-әниләргә, балаларга рәхмәтебезне белдерәбез. Яңа еллар белән!

Кышкы рәсем һәм кул эшләре күргәзмәсендә уртанчылар төркемендә тәрбияләнүче Хамидуллина Алинә, Муртазина Ильвина җиңүчеләр дип билгеләнде. Хабибуллина Ралиянең зур фантазия белән эшләнгән Кыш бабай капчыгы бигрәк тә кызыклы булды. Күчтәнәчләр белән тулган бу капчык балаларга аеруча ошады. Рәхмәт әти-әниләргә һәм балаларга. Яңа ел тагын да күбрәк фантазияләр алып килсен. Әтәч елы игелекле ел булсын.

Мәктәп хәзерлек төркеменнән Садыкова Мәрьям кышкы рәсем күргәзмәсендә җиңү яулады. Аның рәсемен бик матур дип таптык. Оста куллы Мәрьямне җиңүе белән тәбрик итәбез. Уңышлар телибез. Яңа елда яңа уңышлар.

Беренче кечкенәләр төркеме балалары кечкенә генә булсалар да, Яңа ел бәйрәменә бик теләп әзерләнделәр.Бүлмәләрен бик матур итеп бизәделәр,шигырьләр, җырлар өйрәнделәр. Бәйрәмнәре бик күңелле үтте. Кыш бабайга үзләренең осталыкларын күрсәттеләр.Рәхмәт әти-әниләр һәм балалар. Яңа ел сезгә зур уңышлар алып килсен.

Мәктәп хәзерлек төркемендә бик эчтәлекле, кызыклы Яңа ел тамашасы булды. Балалар бәйрәмгә бик тырышып, чын күңел биреп әзерләнгәннәр. Бар да үзенә бирелгән рольгә җаваплы караган. Мәктәпкә хәзерлек төркеменең бик җаваплы чоры бит. Һәр минутны бары тик файдалы эшләргә генә багышларга кирәк мәктәптә тырышып укыр өчен. Шуны аңлап,алар бик тырышып мәктәпнең тырыш укучылары булырга әзерләнә.

Уртанчылар һәм зурлар төркемендә Яңа ел бәйрәме үтте. Балалар бик зур тырышлык белән бәйрәмгә әзерләнгәннәр.Кыш бабай белән Кар кызын каршы алдылар. Бәйрәм әкиятләр, шигырьләр, җырлар белән  бик матур итеп үрелеп барды.

Икенче кечкенәләр төркемендә "Клоун Яңа ел бәйрәмендә" дигән тема астында бәйрәм тамашасы үтте. Тәрбиячеләр бәйрәмне бик оста итеп оештырганнар.Һәрбер минут уйланылган. Сюрпризларга бай булды бәйрәм. Балаларның шат җырлары, елмаюлы йөзләре бәйрәмгә ямь өстенә ямь өстәде.Шатлык-сөенечләр тамашачыларга да өстәлде.

Икенче кечкенәләр төркеме балалары да әти-әниләр белән бергәләп үзләренең осталыкларын күрсәттеләр.Ниләр генә ясамаганнар алар.Рәхмәт сезгә әти-әниләр.Яңа ел бары яхшылыклар гына алып килсен!