Авылыбыздан сугышка киткәннәрнең 130 кире әйләнеп кайтмаган. Каһарманнар өчен авыл уртасында искә алу һәйкәле бар. Анда барысының да исемнәре мәңгеләштерелгән.

Матурлыгы өчен бу көннәрнең

Кемнәр генә корбан булмаган.

Исемнәрен тарих безгә үзе

Саклап килә ерак еллардан!

Хезмәте авыр булса да, җимеше татлы. "Тукай яши безнең күңелләрдә" проектына нигезләнеп әти-әниләр белән берлектә эшләнгән кул эшләре конкурсына нәтиҗә ясалды. Балалар "Яшь рәссам", "Яшь шагыйрь", "Чибәр су кызы", "Шаян шүрәле", "Күңелле пластилин" номинацияләрендә мактау грамоталарына лаек булдылар. Афәрин, кечкенэ осталар! 

26 апрель - татар әдәбиятын сөючеләрнең  дә туган көне ул. Бүген безнең залда да чын әкияти бәйрәм булды. Балалар сөекле шагыйребезнең күп шигырьләрен яттан сөйләделәр, әкиятләрен сәхнәләштерделәр, шагыйрьнең шигырьләренә язылган җырларны җырладылар. Презентация буенча әдәби викторина сорауларына җавап биреп, Тукайның тормыш юлы, иҗаты турында белемнәрен арттырдылар. 

Балалар яраткан шагыйребез Габдулла Тукайның әкият һәм шигырьләренә әти-әниләре белән берлектә рәсемнәр ясадылар, кул эшләре иҗат иттеләр, Тукайга багышлап шигырьләр яздылар. Алар тудырган образларда Шүрәле дә шаян, Су анасы да сөйкемле иде. 

Бүген балалар бакчасында зур өмә үтте. Бигрәк тә әби-бабайларыбыз килүе өмәгә ямь өстәде, күңелләрне күтәрде. Уңган әтиләребез ярдәме белән территориябез чистарып, матурланып, көлеп калды. Дәү  әтиләребезгә, дәү әниләребезгә, әтиләребезгә, әниләребезгә зур рәхмәтебезне белдерәбез, эшләрендә зур уңышлар, сәламәтлек телибез.  

Җир - безне туендыручы. Аны саклау, ярату - безнең изге бурычыбыз. Авылыбыз чишмәләргә, урман-болыннарга бай җирле табигать кочагында утыра. Табигатьне шунда яшәүчеләр тәрбияли. Менә без дә бу эшкә үз өлешебезне керттек. Яшь агачлар утыртылган тау башы бик матур  урын. Аны җирле халык телендә "Сабира тау башы" диләр. Бу ямьле урынны пычратып ятучы чүп-чардан арындырдык. Агачлык: "Тагын килегез", - дип безне дәшеп калды.

Җир-анабыз, гүзәл табигатең,

Иксез-чиксез дала, кырларың,

Суларың саф булсын, һаваң чиста,

Шаулап торсын яшел урманың!

"Бала күңеле - ак кәгазь: нәрсә язсаң, шуны сеңдерә". Бу гыйбарәне әти-әни, тәрбияче буларак һәммәбез яхшы белә. Балаларыбыз үзебездән яхшырак булсын өчен, кече яшьтән аларга әдәп-әхлак кагыйдәләрен өйрәтеп, халкыбызның үткәне белән таныштырып, гореф-гадәтләренә хөрмәт тәрбияләү өстендә эшлибез. Нәниләр төркемендә тәрбияләнүче балаларга көн дәвамында әдәп-әхлак тәрбиясе бирү - төп бурычларыбызның берсе.

Яз - организмның витаминнарга сусаган чоры. Витаминнарга туймаган яшь организм авыруларга да тиз бирешүчән була. Суганның файдалы яшелчә икәне турында мәгълүмат алганнан соң, уртанчылар төркеме балалары тәрбияче апалары белән аны үзләре үстерделәр. "Үзең үстергән җимеш татлы була" мәкалендәге кебек, үз хезмәтләренең җимешен татыгач, суганның ачы икәне дә онытылды. "Мин өйдә дә утырттым," - диештеләр балалар суган үстерү белемен тулыландырып. 

Өлкәннәр хезмәте турында күзаллауларын киңәйтү максатыннан, уртанчылар, зурлар һәм мәктәпкә әзерлек төркемендә тәрбияләнүчеләр тәрәзә ясаучы һөнәре белән танышыр өчен, бакчабызга йөрүче Гаделнең әтисе янына - остаханәгә сәяхәт кылдылар. Хөсәенов Илнур абыйлары балаларны заманча эш кораллары белән таныштырды, пластик тәрәзә-ишекләр ясау серенә төшендерде. Ул куйган тәрәзәләр авылда гына түгел, якын-тирә район җирлекләрендә яшәгән кешеләрнең дә өен балкытып торалар. 

Капиталь ремонттан соң бакчабызда ата-аналар җыелышы булды. Анда балаларга белем-тәрбия бирү, аларның туклануы, сәламәтлеге, язгы ташу чорында куркынычсызлык таләпләрен үтәү турындагы мәсьәләләр каралды.