1нче  марттан  башлап  “ IT-ЧЕМПИОН» конкурсы  башланып  китте.  Әлеге  конкурсның эчтәлеге белән укучыларга  алдан таныштырылды. Дәүләт һәм муниципаль  электрон хезмәт күрсәтүне популярлаштыру максатыннан иң актив укучыны ачыклаячакбыз. Без исемлекне  бүгеннән  терки  башладык.

1 нче мартта математика һәм информатика укытучысы Хамидуллин Ильмас Илдар улы 6-8 сыйныф укучылары арасында математик “Үз уен”уздырды.Шулай ук калган укучы-тамашачылар арасында логик фикер йөртүгә багышланган төрле конкурслар уздырылды.

Мәктәбебездә  математика  атналыгы  бара. Атналык кысаларында   класслар  үзләренең  белем  дәрәҗәләрен, логик  фикерләүләрен сыныйлар. Математика укытучысы  Алия  Әүхәдулла кызы   8-9 нчы  сыйныф  укучылары  арасында  “Мисс математика”  уздырды. “Мисс математик” булып 9 нчы сыйныф укучысы Хайрутдинова Ләйсән танылды.

Мәктәбебезнең  7  нче  сыйныф  укучысы Гарифуллина  Чулпан  Илшат кызы  район күләм “Иң шәп  вожатый» конкурсында  уңышлы чыгыш  ясап  2 нче  урын алды. Чулпанның  бу уңышы белән  чын  күңелебездән  котлыйбыз!!!

26 нчы февраль  көнне  Ватанны  саклаучылар  көне  уңаеннан  әтиләр  конференциясе уздырылды. Әлеге  конференциядә  әтиләр бала  тәрбияләүдә туплаган  тәҗрибәләре  турында  сөйләделәр, яшь  әтиләргә  киңәшләр  бирделәр. Соңыннан   ике  төркемгә  бүленеп, мәктәп  елларын  искә  төшереп, төрле  ярышларда  катнаштылар. Ярышларның  төре  дә  бала  тәрбияләү серләренә  багышлап  уздырылды. Конференция  әтиләрдә  уңай  тәэсир  калдырды.

18 февральдән 23 нче февральгә кадәр мәктәбебездә татар теле һәм әдәбияты атналыгы  уздырылды.Әлеге атналык кысаларында “И туган тел,и матур тел”дигән темага шигырь иҗат итү бәйгесе,патриот –шагыйрь Муса Җәлилнең шигырь һәм поэмаларына иллюстрацияләр бәйгесе,Гаяз Исхакыйның 135 еллык юбилеена багышлап “Йомшак буын” интеллектуаль уены,”Әтиләр сүзе-күңелнең күзе”дигән темага иҗади эшләр бәйгеләре тирән эчтәлекле итеп уздырылды. Атналыкның иң төп өлеше булып  21 нче февральдә “Туган телем-иркә гөлем”дигән темага туган тел көне уздыру булды.Әлеге кичәдә Казан шәһәренең  Галимҗан Ибраһим исемендәге Тел,Әдәбият һәм Сәнгать институты белгечләре  дә катнашты. Атналыкны уздыруда татар теле һәм әдәбияты укытучылары Нафикова Рушания Мөхәммәтша кызы һәм Вильданова Ләйсән Хәбир кызы зур тырышлык куйды.

  12 нче февральдә беренче категорияле башлангыч сыйныф укытучысы Хәмидуллина Мәдинә Сәлимхан кызы “Ел укытучысы-2013” муниципаль конкурсының зона турында катнашты. Мәдинә Сәлимхановна әлеге конкурста үзенең һәм балаларының республикакүләм һәм муниципаль конкурсларда катнашкан эшләрен тәкъдим итте, 2 нче сыйныфта  татар теленнән дәрес күрсәтте, дәрескә үзанализ ясады.Шулай ук мәртәбәле жюри бәйгедә катнашучыларның интернет-ресурслардан файдалануларын да, педагогик технологияләрдән дә куллану осталыкларын бәяләде.Әлеге бәйгедә Мәдинә Сәлимхановна үзенең педагогик осталыгын уңышлы тәкъдим итте. Авыр, әмма мактаулы хезмәтендә Мәдинә Сәлимхановнага уңышлар телибез.

Мәктәптә тарих һәм җәмгыять  белеме атналыгы уңышлы дәвам итә. Җәмгыять белеме укытучысы Вильданова Ләйсән Хәбир кызы бүген “Коррупциягә минем карашым”дигән темага түгәрәк өстәл уздырды. 6 нчы сыйныф укучысы Ахметшин Илнур үзенең  белемлелеге  белән аерылып торды,сорауларга төгәл җавап бирде. Калган укучылар да актив катнашып,призлар отты.