Тату гаилә - бәхетле гаилә, ди халык. Нәрсә соң ул гаилә? Бер социолог аны “җанга шифалы ял” дигән, ә икенчесе “психологик сыену урыны” дип атаган. Әйе, кешенең иң зур бәхете - аның гаиләсе. Шуңа да БМО Генераль Ассамблеясенең 1993 елның 20 сентябре карары нигезендә, 1994 елдан башлап 15 май Халыкара гаилә көне буларак билгеләп үтелә. Шул уңайдан мәктәбебездә сыйныф сәгатьләре үткәрелде, иҗади эшләр башкарылды.

Сезнең барыгызны да бөек тантана, зур шатлык Бөек Җиңүнең 71 еллык бәйрәме белән котлыйбыз. Илебез күгенең аяз булуы белән без сезгә бурычлы. Озын гомер, сәламәтлек, тыныч көннәр насыйп булсын барыгызга да.

«Үлемсез полк» акциясе – 9 май бәйрәменең тагын бер күркәм традицияләренең берсе. Халык сугышта катнашкан, яу кырында ятып калган туганнарының истәлекле фотосурәтләре белән урамга чыга. «Үлемсез полк» гаилә тарихын белергә, сакларга ярдәм итә. 

Укытучылар коллективы ветераннар өчен Мирсәй Әмирнең "Миңлекамал" әсәре, Гомәр Бәшировның "Намус" романын берләштереп тамаша тәкъдим иттеләр.

Мәктәп бакчасында кызу эш көннәре. Кемдер чәчәк түтәлләрен рәткә китерә, кемдер яшелчә утырту өчен җир өлгертә. 1 генә көнгә дә соңга калырга ярамый. Һәр эшнең үз вакыты. Мәктәп бакчасында җир эшкәртү төгәлләнде. 

ОБЖдан ачык дәрес үткәрү ел саен оештырыла. Әлеге дәрес укучыларны уяулыкка, төрле катлаулы очраклардан чыгу юлларын табарга өйрәтә. Укучылар бу көнне район янгын сүндерү бүлегенә экскурсия ясады. 

Балаларны яклау көне планы белән мәктәп җитәкчесе Минһаҗева Л.Т. таныштырды. Бүгенге көн тулысы белән балаларны яклауга юнәлтелгән иде. Укучылар төрле сынаулар аша үзләренең көчле, чыдам, батыр икәнлекләрен расладылар. 

Экологик акция кысаларында үткәрелгән чаралар саны артканнан - арта бара. Безнең мәктәп укучылары мәктәп тирәсенә бу көнне чыршылар утырттылар. 

Тукайны искә алу кичәсе  аның  иҗаты, тормышы турындагы биремнәрдән торган "Үз уеныбыз" формасында үткәрелде.  Укучылар шактый гына катлаулы сорауларга да җавапны тиз таптылар.