Районыбызда бүген иң тантаналы вакыйгаларның берсе -  Кайбычымның туган көне. Соңгы елларда районыбыз күзгә күренеп үсә, зурая. Баксаң, шушы зур истәлекле көнебезгә дә нәкъ 25 ел тулган икән.  Шул уңайдан укытучылар һәм укучылар коллективы Мөрәле авылы мәдәният йортында зур тамаша кылды. Яшьләрнең "Аулак өй"дә бәйрәмгә әзерләнү күренеше чын мәгънәсендә авыл халкын шаккатырды. Бәйрәм белән, райондашлар!

"Спортивный Татарстан" акциясе кысаларында 18 апрель "ГТО барыбыз өчен дә!" дигән өндәмәгә нигезләнә. Мәктәп укучылары бу көнне "Салават күпере" спорт комплексында йөзү буенча үз мөмкинлекләрен күрсәттеләр.

"Мәрхәмәтле Татарстан" акциясе дәвам итә. Бүген 3 көн "Дуслык көне". Безнең туган илебез – Татарстан, ул – күпмилләтле дәүләт. Татар халкы гасырлар дәвамында рус, чуваш, башкорт, мордва, удмурт һәм башка халыклар белән дус-тату яшәгән. Татарстан халыкларының үзара дус, тату яшәве бөтен дөнья өчен толерантлык үрнәге булып тора. Халыклар арасында дуслык бәйләнешләрен ныгытуда бәйрәмнәрнең роле зур, чөнки алар аша халыклар бер-берсенең мәдәнияте, яшәү рәвеше, гореф-гадәте, йолаларын өйрәнә һәм шулар аша бер-берсенә хөрмәт тәрбияли, үз итә, дуслыгын ныгыта. Без бүген 1,3 нче сыйныф укучылары белән рус халык биюе элементларын өйрәндек.

Һәрбер кешегә яхшылык кылу мөмкинлеге тудырыла, язгы игелекле гамәлләр атналыгына бүгеннән старт бирелә. 16 нчы апрель "Яхшы башлангычлар көне" буларак үткәрелә. Әлеге акция турында укучылар белән әңгәмәләр үткәрелде. 

Апрель ае − язның аеруча кайнап торган чагы. Җир йокыдан уяна. Яз инде тулы хокук белән үз вазифаларына керешә. Зәңгәр күктә язгы кояш елмая. Тирә - як яшәрә, матурлана. Барлык халык тирә - ягын чүп - чардан арындыра. Без дә мәктәп тирәсен җыештыру белән мәшгуль. Әйдәгез, барыбыз да ӨМӘГӘ!

Укучыларның космос турындагы күзаллауларын киңәйтү; логик фикерләүләрен, хәтер һәм дикъкатьлекләрен үстерү; космонавтика өлкәсендәге белгечләргә хөрмәт хисе тәрбияләү максатыннан мәктәптә төрле чаралар үткәрелде. 

Әлеге тема соңгы вакытларда бик еш яңгырый башлады. Бу чыннан да шикләнү тудыра. Шуны истә тотып,  мәктәпләрдә сыйныф сәгатьләре үткәрелә, үзеңне ничек дөрес тотарга кирәклеге өйрәнелә.

Балачак әкиятләре һәрберебезнең хәтеренә уелып калгандыр, мөгаен. Гомер буе укыган китапларның күбесе онытыла барса да, кечкенә чактагылары үзләренең геройлары, җете сурәтләре белән олыгайгач та күз алдыннан китми. 2- апрель - Халыкара Балалар китабы көне барыбызны да балачакка  кайтарды.

Мәктәптә чираттагы ата-аналар җыелышы үткәрелде. Анда төрле темага кагылган сораулар каралды. 

1906 елдан башлап дөнья күләмендә Халыкара кошлар көне үткәрелә. 1906 елның 1 апрелендә кошларны саклау буенча Халыкара конвенциягә кул куела. Россия моңа 1927 нче елда кушыла. Шулай итеп,  безнең илдә 1927 елның 1 нче апрелендә кошлар көнен үткәрү традициягә керә. Без дә ел саен бу бәйрәмгә ныклап әзерләнәбез.