Бүген гимназиябез укучылары Мәхмүтова Камилә белән Хәсәнова Ләйсән Казан кооператив институтының Дәрдемәнд исемендәге Татар мәдәнияте үзәгендә үткәрелгән “Татар сәүдәгәрләре һәм меценатларының үткәне һәм бүгенгесе” дип исемләнгән IV республика конкурсында катнаштылар. Әлеге чарада Камилә белән Ләйсән икенче дәрәҗәдәге дипломнарга лаек булдылар. Җитәкчеләре Мансурова Гөлчәчәк Әсхатовнаны һәм укучыларыбызны чын күңелдән җиңүләре белән котлыйбыз, алга таба да уңышлар теләп калабыз!!!

Бүген "Россия- минем горизонтларым" курсы кысаларында Казан кооператив институтыннан килгән белгеч 8-11 сыйныф укучыларына чыгышын тәкъдим итте. Укучылар уку йорты, факультетлар, студент тормышы белән якыннанрак таныштылар.

Гимназиябездә укучылар белән терроризм һәм экстремизмны кисәтү буенча һәрдаим профилактик эш алып барыла. Бүген, куркынычсызлык чараларын искә төшерү максатыннан, 4 нче һәм 5 нче сыйныфларда әңгәмәләр үткәрелде. Казан шәһәренең антитеррор комиссиясе вәкилләре Новлянский Павел Валерьевич һәм Шигапов Зөлфәт Зөфәрович укучыларга террорчылык вакытында үз-үзеңне тоту кагыйдәләре, шикле әйберләр тапкан очракта нәрсә эшләргә кирәклеге турында сөйләп киттеләр.

12 нче октябрь көнне гимназиябездә "Беренчеләр Советы" рәисе вазифасына кандидатлар дебаты узды. Һәр кандидат үз программасын тәкъдим итте, идеяләре белән бүлеште һәм сорауларга җавап бирде. Без үз чиратыбызда барлык кандидатларга да сайлауларда уңышлар телибез! Лаеклы кандидатны бергәләп сайлыйк

Видеога сылтама: https://vk.com/id715397316?z=video715397316_456239316%2F56ab2e63679d5d0efb

Татарстанның халык шагыйре Роберт Миңнуллинның тууына 75 ел тулу уңаеннан гимназиябездә 2А һәм 3А сыйныфы укучылары белән шигърият кичәсе уздырылды. Укучылар шагыйрьнең тормышы, иҗаты һәм шигырьләре белән таныштылар. Кичә барышында балалар табышмакларга җаваплар эзләделәр, "Дөньядагы иң зур алма", "Тәлинкәне кем ватты?" шигырьләрен укыдылар. Чыннан да, шагыйрьнең әсәрләре яхшылыкка өнди, матурлык, ихласлык, гаделлек хисләре, әти-әниләргә, туган якка, ватанга мәхәббәт тәрбияли. Шигърият кичәсен оештырган өчен китапханәче Зөлфия Рафаильевнага рәхмәтләребезне җиткерәбез!

Безнең гимназиядә 14нче октябрь көнне 9.50 "Татарча диктант" белем тикшерү акциясе узачак. Акциядә катнашырга теләгән кешеләрне А3-04 кабинетында көтеп калабыз.
Акциянең максаты-татар теленә кызыксынуны арттыру, әдәби телдә дөрес сөйләм һәм дөрес язу күнекмәләрен үстерү, орфографик һәм грамматик хаталар ясамыйча язу теләге уяту.

Бүген ЮХИДИнең әйдәп баручы белгече Хәйруллина Сәгдия Салиховна 1 нче сыйныф укучылары белән юл йөрү кагыйдәләре буенча агитацион - профилактик чара уздырды.  Юл хәрәкәте куркынычсызлыгы нигезләрен ныгыту өчен һәр сыйныфка  юл йөрү кагыйдәләре турында кызыклы китаплар бүләк ителде.

Бүген 3В сыйныфы укучылары Сабирова Гөлчәчәк Мансуровна җитәкчелегендә "Алтын көз" темасына проект эшләре башкардылар. Афәрин, укучылар!

10 нчы октябрь көнне 2А сыйныфы укучылары Нәкый Исәнбәт әсәре буенча куелган "Мырау Батыр" дип аталган музыкаль әкиятнең премьерасында булып кайттылар. ""Мырау Батыр" әкиятен карарга Шаян да килгән иде. Укучылар бик сөенделәр, Шаян белән истәлеккә фотосурәткә дә төштек,"- дип хис- кичерешләрен җиткерде сыйныф җитәкчесе Гөлфия Рөстәмовна.

9 нчы сентябрь көнне булып узган «Мөһим сөйләшүләр» дәресе «Бөтендөнья психик сәламәтлек, буллингны профилактикалау» темасына багышланган иде. Дәрес барышында укучылар коллективта үзара мөнәсәбәтләр, аралашу кагыйдәләре турында фикер алыштылар. Шулай ук сыйныф җитәкчеләре мөнәсәбәтләрне ничек җайга салу, үзара ярдәмләшү һәм аңлашу, кешегә хөрмәт - ныклы коллективның нигезе булуы турында да сөйләп киттеләр.