Бүген уртанчылар төркемендә әти-әниләр җыелышы вакытында тәрбияче Гүзәл Габдулхаевна балалар белән берлектә "Кыш турында хикәя" темасына интегральләштерелгән эшчәнлек күрсәтте. Балалар Ак аю җибәргән биремнәрне үтәп табышмакларга җавап эзләделәр, кышкы табигатьнең серле, матур, сихри, салкын булуын билгеләп үттеләр, рәсем буенча хикәя төзеп сөйләделәр, ябыштыру ысулы белән киез итекләрне бизәделәр.

28 январь көнне зурлар төркеменең әти-әниләр җыелышында инглиз теле өйрәтүче Гөлназ Альфредовна балалар белән берлектә "Гаилә" темасына бердәм белем бирү эшчәнлеген күртсәтте. Кызыклы, мавыктыргыч уеннар, төрле биремнәр аша балаларның белемнәре ныгытылды, гаилә членнарының атамалары өйрәнелде, гаиләдәге һәр кешегә карата игътибарлы, мәрхәмәтле, шәфкатьле булырга кирәклеге аңлатылды. Эшчәнлекнең җанлы баруы, балаларның актив, сорауларга аңлап җавап бирүләре әти-әниләргә аеруча ошады. Балаларга күп кырлы тәрбия һәм белем бирү эшчәнелеге буенча эш алып барганнары өчен педагогларга, специалистларга, балалар бакчасы коллективына рәхмәтләрен җиткерделәр.

27 январь көнне икенче кечкенәләр төркеменең әти-әниләр җыелышында тәрбияче Гүзәл Хәмзевна “Матур бизәкләр” темасы астында интегральләштерелгән белем бирү эшчәнлеген үткәрде. Кунакка килгән Мәрьямнең бик күп матур күлмәкләре булуын билгеләп, “Нәрсә үзгәрде?” уены аша төсләр турында белемнәрен ныгыттылар, төрле тукыма кисәләреннән тегелгән киезне күзәтеп, шуный ук кисәкләрдән юрган тегәргә кирәклеген ачыклап, “тукымаларга” матур бизәкләр төшерделәр. Һәр әти-әни бала янына утырып балалар белән берлектә кәгазьгә туры сызык, манып алу ысуллары белән төрле бизәк төшерү алымнарын үзләштерделәр. Балаларның пумаланы дөрес тотып эшли алуларына, чиста-пөхтә эшләүләренә ирештеләр.

26 январь көнне икенче кечкенәләр төркеменең әти-әниләр җыелышында Дания Аминовна һәм Гөлгенә Тәлгатовна балаларның бердәм эшчәнлеген күрсәттеләр. Дания Аминовна бер төркем балалар белән “Серле кар бөрткеләре” темасына интегральләштерелгән бердәм эшчәнлек барышында кар бөтекләренең төрле бизәкле, кояшта җемелдәп, ялтырап торуын, салкын, кулда эреп суга әйләнүен, бер-берсенә ошамавын билгеләп үттеләр. Ябыштыру ысулы белән кар бөртекләрен ясадылар. Эшчәнлек табышмаклар, шигырьләр, җыр, уен белән үрелеп барды.

Гөлгенә Тәлгатовна икенче төркем балалар белән “Транспорт төрләре” темасына багышланган бердәм эшчәнлек барышында балаларны җир, су, һава транспортларын таный һәм аера белүдә күнектерде. “Парын тап” уены ярдәмендә транспортны йөртүчеләр буенча белемнәрен ныгытты. “Поездда барып”, “самолетта очып”, “көймәдә йөзеп” транспорт төрләренең хәрәкәт итү буенча күзаллауларын үстерде. “Кем өлгер?” уены аша балаларны җитезлектә ярыштырды. Балалар актив, кызыксынып, теләп һәр биремне башкаралар, үз фикерләре белән уртаклаша беләләр.

Балаларны һөнәр ияләре белән таныштыруны дәвам итү, артист, клоун хезмәте турында тирәнтен белем бирү, аларга төрле образларга кереп уйнау өчен күп төрле костюмнар, маскалар кирәк булуын аңлату. Балаларның иҗади эшчәнлеген үстерү, мөстәкыйльлелек тәрбияләү максатын күзаллап тәрбияче Сабирова Рәхилә Расиховна мәктәпкә әзерлек төркеме балалары белән “Яраткан клоуныма” темасына бердәм эшчәнлек үткәрде. Балалар артистларның төрле жанрда эшләүләрен, оста булуларын, төрле ролләргә кереп уйнауларын, образны тамашачы күңеленә җиткерә беләлүләрен билгеләп үттеләр һәм төрле төрдәге төсле кәгазләрне кулланып клоун маскасын ясадылар.