Бүген бакчабызда коллектив һәм балалар белән берлектә янгын вакытында, экстремаль очракларда үз - үзеңне тоту кагыйдәләрен ныгыту, төрле ситуацияләрдән чыгу юлын табарга өйрәтү, янгын сүндерү чаралары белән таныштыру, тиешле телефон номерларын җыеп ярдәм чакырырга өйрәтү йөзеннән янгын куркынычсызлыгы буенча өйрәнүләр үткәрелде. Зурлар, мәктәпкә әзерлек төркеме балалары  һәм хезмәткәрләр оешкан төстә, тиешле чараларны дөрес үтәп биш минут эчендә куркыныч янамаган урынга эзерләнеп чыктылар. Тәрбиячеләр Сабирова Р.Р., Гилемханова Ә.Ә. лар балаларның саны, сәламәтлекләре турында рапорт тапшырлыдыр.

Юбилеең белән Кадрия Рафаеловна!!! Сине олы бәйрәмең – 55 яшьлек юбилеең белән чын күңелдән котлыйбыз. Сиңа нык сәламәтлек, күңел тынычлыгы, гаилә шатлыгы, кай-гы - хәсрәтсез көннәр, ак бәхетләр, балаларыңның һәм оныкларыңның күңел җылысын тоеп, игелекләрен күреп, бәхетле озын гомер кичерүеңне телибез. Киләчәгең җыр кебек матур, кояш кебек якты булсын.

Туган көнең, туган көнең

Күңелгә нур өстәсен.

Синең һәрбер туар көнең

Сипсен бәхет көлтәсен.

Җәен җиләк чәчкәсе бул,

Кышын кышлау гөле бул.

Яшәр гомерең озын булсын,

Безнең белән бергә бул.

Балаларны беренче очучы Ю.Гагарин белән таныштыру аша илебезгә карата горурлык хисләре тәрбияләү, галәм турындагы белемнәрен системалаштыру, Кояш системасы, планеталар турында элементар белешмә бирү, алар турында күбрәк беләсе килү теләге уяту, 12 апрель - Космонавтика көне турында белемнәрен формалаштыру максатыннан 7-11 апрель көннәрендә "Галәм киңлекләре" атналыгы үткәрелде. Балаларның бердәм эшчәнлегендә "Беренче очучы - Ю.Гагарин", "Җир тирәсендә 108 минут", "Галәмдә ниләр бар?", "Күк җисемнәре", "Минем очкычым", "Белка һәм Стрелка" темалары аша тулысынча ачылды. "Кеше галәмдә" темасы астында бәйрәм иртәсе үткәрелде, "Космоска сәяхәт" призентация күрсәтелде, балаларның рәсемнәре, кул эшләреннән күргәзмә оештырылды.

     Рушан Миңнегулов безнең "Шатлык" балалар бакчасында тәрбияләнеп үскән егет.  Шуңа күрә дә, без кичекмәстән аны үзебезнең янга чакырып балалар белән очрашу оештырдык.

     Чемпион Рушан Миңнегулов белән очрашуга балалар һәм тәрбиячеләр зур әзерлек күрсәттеләр. Спортчыга багышлап махсус күргәзмә тупланды, “Сәламәт булуның бер юлы- хәрәкәт итү” дигән тема астында музыкаль спорт чарасы әзерләнде.Рушан да балалар янына әзерләнеп алтын медален алып килгән иде. Балалар янына да ул аны күкрәк түренә киеп керде. Иң элек, Рушан Миңнегулов белән кызыклы гына әңгәмә үткәрелде. Балалар үзләрен кызыксындырган сорауларын биреп Рушанның балачагы, аның хыяллары, уңышлы спортчы булу өчен нинди сыйфатларга ия булырга кирәклеге хакында белделәр. Рушан бик теләп балаларга үзе, әти-әнисе, аңа ярдәм иткән тренерлары, киләчәктә үтәсе Дөнья чемпионаты һәм Олимпия уеннарына әзерләнүе турында сөйләде. Җанлы һәм кызыклы әнгәмәдән соң, балалар Рушанга багышланган шигырьләрне сөйләп спорт чарасына- “Күңелле стартлар” ярышларына “керештеләр”. Төрледән-төрле кызыклы эстафеталарны Рушан күңелле караш белән күзәтеп балаларга “көч биреп” утырды. Уеннардан балалар да, җанатарлар да, кунагыбыз Рушан Миңнегулов та канәкать калдылар. Балалар өчен иң истәлекле мизгел, мөгаен, Чемпион Рушан абыйлары кулыннан алынган “алтын” медальләр булгандыр. Бу тарихи очрашу истәлеккә фотоларга төшү белән төгәлләнде.

Рушан Миңнегулов балаларны җиңүләре белән тәбрикли

Көлегез, көлегез

Файдасы күп – белегез

1 нче Апрель - көлке көне. Бу көнне елмаеп каршы алсагыз, ел буена елмаеп йөрерсез. Авырлыклар килгәндә дә юмор хисен югалтмассыз, югалып калмассыз - девизы астында “Көлке көнен” билгеләп үттек. Кунакка килгән клоун Кеша һәм фокусчы Мартин үзләренең нәни дуслары Буратино, Петрушкалар белән балаларның күңелләрен ачтылар. Бәйрәм иртәсе төрледән-төрле кызыклы уеннар, фокуслар, уен-көлке, җыр, бию белән үрелеп барды. Балалар килгән кунакларга рәхмәтләрен җиткереп шат, күтәренке кәеф белән төркемнәргә таралыштылар.

Кошлар турында белемнәрен баету, тышкы билгеләренә карап кошларны таный, аера белергә күнектерү, кошларның китергән файдасы турында күзаллауларын үстерү, балаларда кошларга карата сак караш, мәрхәмәтлелек, кайгыртучанлык сыйфатлары тәрбияләү йөзеннән “Кошлар - безнең канатлы дуслар” атналыгы үткәрелде. “Кошларны каршы алыйк” йомгаклау чарасында уртанчылар төркеме балалары нәниләргә кышлаучы, күчмә кошлар тормышы белән таныштырып бәйрәм әзерләделәр. Гүзәл Габделхаевна призентация аша кошлар тормышындагы кызыклы мәгълүматлар белән балаларны таныштырды. Балаларның уйлау, фикерләү сәләтләрен үстерү, ныгыту максатыннан табышмакларга җаваплар эзләп, шигъри юллар, җыр бәйрәмне ямьләндерде.