Мәктәбебездә 2002 елдан бирле “Туган якны өйрәнү” музее эшләп килә. Музейның төп максаты: татар халкының гореф – гадәтләренә, йолаларына, тормыш – көнкүреш әйберләренә, аның мәдәниятенә караган документлар җыю, күренекле шәхесләребезне барлау. Музей предметлары аша укучыларны белемле, тәрбияле, әхлаклы шәхесләр итеп үстерү. Музейда 200 дән артык экспонат бар, бүгенге көндә дә әле ул үз эшен дәвам итә.Без аны берничә бүлеккә бүлдек:

  1.Мәктәп тарихын, тормышын чагылдыручы бүлек;

  2.Явлаштау һәм Мишәбаш авыллары тарихы бүлеге;

  3.Бөек Ватан сугышы;

  4.Көнкүреш кирәк – яраклары ;

  5 нче бүлек - берничә ел әтисе мәктәбебез директоры булып торган, үзе шушы мәктәптә белем алган, Татарстанның атказанган артисты Шамил Бариевка багышлана.

.“Үткәннәрсез, киләчәк юк!”, дип белми әйтмәгәннәр. Музейлар халык күңелендә туган телгә, туган илгә, әдәбиятыбызга, мәдәниятебезгә һәм тарихыбызга карата мәхәббәт уята. Бер сүз белән әйткәндә, милли мирасыбыз сагында бәһасез хезмәт куя.                                                   

 17 май - Халыкара балалар ышаныч телефоны көне. Шул уңайдан мәктәбебездә психологик үзәк хезмәткәрләре Алисә Илһамовна һәм Алинә Икрамовна укучылар белән әңгәмә үткәрделәр һәм уен формасында аңлату эшләре алып бардылар.

  Мәктәбебездә эш кайнап тора: 9 нчы, 11 нче сыйныф укучылары ОГЭ, ЕГЭга, шул ук вакытта “Соңгы кыңгырау” бәйрәменә әзерләнәләр, кемнәрдер арадаш аттестация эше башкара, ә кемнәрдер ГТО нормативлары тапшыра. Шулай ук бакчада эшләргә дә вакыт табабыз.

   3 нче сыйныф укучылары сыйныф җитәкчеләре белән берлектә язгы табигатькә экскурсиягә чыктылар. Алар төрле уеннар уйнадылар, табигатьне күзәттеләр, кыскасы, күңелле итеп ял иттеләр.

 Хөрмәтле Бөек Ватан сугышы ветераннары, тыл хезмәтчәннәре, сугыш чоры балалары, һәркайда үрнәк булырлык өлкәннәребез!  Сезнең барыгызны да Бөек Җиңүнең 72 еллыгы белән котлыйбыз. Бу көнне кешелек дөньясы түземсезлек белән көтте. Һәм ул көн килде. 1945 нче елның май ае. Әйе, чыннан да бу көн шатлыклы да, тетрәндергеч тә, дулкынландыргыч та. Илебездә сугыш урап узган, сугыш җиле кагылмаган бер генә гаилә дә юктыр, мөгаен. Шуңа күрә, һәр гаилә сугышта ятып калган һәм аннан исән кайтып, үзләренең тормышларын дәвам иткән батырларыбызны искә ала. Сугышның барлык авырлыкларын үз җилкәләрендә татыган, олы тормыш юлы үткән хөрмәтле кешеләребез! Сезнең түземлегегез һәм сабырлыгыгыз алдында баш иябез, исәнлек – саулык, тыныч картлык телибез. Йөрәкләребездә сезгә карата рәхмәт һәм хөрмәт хисләре кабат яңара. Без сезнең тиңдәшсез батырлыгыгыз, фидакарь хезмәтегез белән чын күңелдән горурланабыз. Фронтта һәм тылда каһарманнарча, фидакарьлек һәм ныклык белән, үзегезне аямыйча көрәшүегез беркайчан да онытылмаячак. Без сезнең озак еллар җиңүчеләр сафында калуыгызны һәм һәрвакыт яхшы кәефтә булуыгызны телибез. 

    Бөек Җиңү илебезгә зур корбаннар аша килде һәм менә 72 ел инде халкыбыз тыныч тормышта яши. Азатлык өчен гомерләре өзелгән батырларның исеме, онытылмас эшләре якты маяк булып, буыннардан-буыннарга сакланып килә.

   Бүген авылыбызда узган тантаналы митингта тыл ветераннары, сугыш чоры балалары, авыл халкы һәм мәктәп укучылары катнашты. Ветераннарыбызны бәйрәм белән котлап авыл җирлеге башлыгы, район вәкилләре чыгыш ясады, укучылар көче белән әзерләнгән әдәби-музыкаль монтаж күрсәтелде. Митингта катнашучылар сугышта һәлак булган авылдашларыбызны бер минутлык тынлык белән искә алдылар һәм һәйкәлгә истәлек веноклары салдылар.