Илебездә 40 меңнән артык һөнәр булса да, күпчелек яшьләр югары белем алырга, бигрәк тә юрист, хисапчы, менеджер, икътисадчы белгечлекләренә тартыла. Һөнәрең буенча эш таба алмасаң, дипломыңа карап өйдә утырудан ни файда? Ә менә эшче һөнәрләргә исә ихтыяҗ беркайчан да кимеми. Эретеп ябыштыручы, пешекче, тракторчы, авыл хуҗалыгы белгечләренә бүгенге көндә сорау аеруча зур. Кукмара агар көллиятендә дә нәкъ менә шундый белгечлекләр буенча укып, һөнәр алырга мөмкин. Көллият мөгаллимнәре бу көннәрдә мәктәбебездә булып, чыгарылыш сыйныф укучыларына уку шартлары, белгечлекләр турында сөйләделәр, аңлату эшләре алып бардылар, укучыларны укырга чакырдылар.

   Бүген мәктәбебездә “Киләчәккә адым” дип исемләнгән фәнни – гамәли конференция үтте. Конференциядә 3-6 нчы сыйныф укучылары чыгыш ясады. Чыгышларның тематикасы гаҗәеп күпкырлы иде: кемдер дару үләннәре белән кызыксына, берәүләр якташ шагыйрәләрнең иҗатын өйрәнә, кемнәргәдер физик ачышлар ошый, ә кемгәдер - сәламәт яшәү рәвеше. Кыскасы, шундый кызыксынучан, эзләнүчән укучыларыбыз булганда, илебезнең киләчәге өметле булыр дип ышанасы килә.

5 нче апрель көнне укучылар пневматик винтовкадан ату буенча ГТО нормаларын тапшырдылар.

  Һәр атнаның дүшәмбе көнендә мәктәбебездә гомуми линейка үткәрелә. Бүгенге линейкада бәйгеләрдә, спорт ярышларында, фәнни конференцияләрдә призлы урыннар алган укучылар бүләкләнде. Афәрин, укучылар!

   Мәктәбебезнең 11 нче сыйныф укучысы Галимҗанова Рәфидә, Республикакүләм "Үз юлым - своя строка" бәйгесенең икенче этабына узып, 2 нче апрель көнне Язучылар берлегендә остазы - Нәбирә Гыйматдинова белән очрашып кайтты. Яшь каләмчеләр төркеме ай буе остазлары ярдәме белән проза әсәрләре иҗат итәчәкләр. Ә май башында нәтиҗәләр билгеле булачак.

  3 нче апрель көнне Арча педагогия көллиятендә  республикакүләм “Илһам” яшь язучылар бәйгесенең зона этабы булып үтте. Мәктәбебезнең 11 нче сыйныф укучысы Галимҗанова Рәфидә бәйгедә катнашу хокукына ия булып, “Яшь прозаик” номинациясендә уңышлы чыгыш ясады. Йомгаклау тантанасы 20-25 апрель көннәрендә Казан шәһәрендә узачак. Рәфидәгә һәм аның җитәкчесе Галиева Гөлназ Хәмит кызына киләчәктә дә уңышлар телибез.

    Ниһаять, тирә - ягыбызга, табигатькә карата булган битарафлыкны төзәтер чак - апрель  җитте.  Язгы кояш кышкы җавапсызлыгыбыз өчен битне кызартмасмы? Инде кар эри башлауга ук кыш буена җыелып барган чүп - чарлар баш калкыта башлады. Республикабызда, шул исәптән Саба муниципаль районында да, 1 нче апрельдән 31 нче майга кадәр санитар - экологик чисталык икеайлыгы игълан ителде. 

   Икеайлык дәвамында өмәләр  оештырылачак. Аның шарты буенча һәр кеше үзе яшәгән, үзе эшләгән тирәлекне тәртипкә китерергә, табигатебезнең гүзәл, сулар һавабызның саф, эчәр суларыбызның чиста булуына өлеш кертергә тиеш. 

   Хөрмәтле укытучылар, укучылар! Әлеге чарада һәммәгезнең дә актив катнашуы  сорала. Әйләнә – тирәбезнең чисталыгы, матурлыгы үзебездән тора!

Кошлар җир йөзендә иң күп таралган тереклек ияләре. Җирдә барлыгы 100 миллиард чамасы кош яши. Татарстанда җәй көннәрендә 200ләп, кышын 40 төрдән артык кош очратырга мөмкин. Кошлар һавада очарга җайлашкан. Шуңа да аларны кырыс антарктидада, биек тау кыяларында, диңгез өсләрендә дә очратырга мөмкин. Кошларны шулай ук “санитарлар” дип тә атыйлар. Алар иген басуларындагы, урманнардагы бик күп зарарлы бөҗәкләрне юк итәләр.  1 нче апрель көнне мәктәбебездә “Кошлар көне” уздырылды. Һәр сыйныф бу чарага ныклап әзерләнгән иде. Чарада кошлар турында бик күп мәгьлүматлар бирелде, аларны сакларга кирәклеге турында әйтелде.