Бүген, 13 нче март көнне, мәктәптә технология фәне буенча "Технология дәресләрендә заманча һөнәрләр өйрәнү" темасына  район семинары  үткәрелде. Семинарга район мәгариф бүлеге методисты Л.Ф.Гайнуллина,  районның 20 мәктәбеннән технология фәне  укытучылары катнашты. Технология фәне укытучысы А.Ф.Фальванова район укытучылары белән "Чәчәк ясау" темасына мастер-класс үткәрде. "Заманча һөнәрләр" дигән темага 7,10, 11 нче сыйныф укучылары катнашында  тәрбия чарасы оештырылды. Чарада укучылар әти-әниләренең һөнәрләре турында презентация белән чыгыш ясадылар, үзләре сайлаган һөнәрләре турында сөйләделәр. Семинар эшен төгәлләп, район мәгариф бүлеге методисты зур рәхмәт белдерде.

Хәрби-патриотик айлык кысаларында укучылар арасында спорт ярышлары үтте. Традицион рәвештә ел да үткәрелә торган бу чарада барлык укучылар да катнаша. Бүген ярышларга нәтиҗә ясалды. Кызлар арасында  барлык төр спорт ярышлары буенча  җиңүче дип,  7 нче сыйныф укучысы Фатыйхова Нәзилә, егетләр арасында 9 нчы сыйныф укучысы Галимов Альберт табылды. Аларга күчмә кубок бирелде. Спортны үз итүче кызыбыз Фатыйхова Нәзилә икенче ел рәттән Кубок иясе булды. Галимов Альбертны, Фатыйхова Нәзиләне зур җиңүләре белән кайнар котлыйбыз, алга таба да зур уңышлар телибез. Афәрин, укучылар!

7  нче март көнне мәктәптә,   Халыкара хатын-кызлар бәйрәме уңаеннан, матур  концерты оештырылды. Аны 7 нче сыйныф укучылары җитәкчеләре М.Ф.Миннеханова белән берлектә әзерләделәр һәм укытучыларны, укучы кызларны, әниләрне  котлап концерт күрсәттеләр. Концерт бию-җырлар белән аралашып алып барылды. 7 нче сыйныф укучыларына, сыйныф  җитәкчеләре М.Ф.Миннехановага   дирекция исеменнән зур рәхмәт белдерелә.

"Беркем дә читтә калмасын!" Волонтерларның девизы нәкъ шундый. Мәктәпкә район волонтерлары килде, укучыларыбыз арасында тренинглар үткәрделәр, яшәү рәвешен, ярдәмгә мохтаҗ  кешеләргә булышу турында проект эшләре башкардылар. Мәктәбебездә волонтерлар координаторы итеп бертавыштан 10 нчы сыйныф укучысы Закарова Эльмира сайланды. Аның урынбасарлары 10 нчы сыйныф укучылары Гаттарова Илзидә белән Загидуллин Искәндәрләр сайланды.

Мәктәптә тимурчылык эше  нәтиҗәле эшли. Ялгыз әби-бабайларга ярдәм итү, чишмәләрне чистартып тору укучыларга бүлеп бирелгән. Бәйрәм вакытларында котлау белән барабыз, хәл-әхвәлләрен сорашабыз. Миңгәр авылында яшәүче Зиннурова Гөлфәрах апаны  Халыкара хатын-кызлар көне белән тимурчылар Закарова  Илнара  белән Хөсәенова Таңсылулар котлап бардылар. Гөлфәрах апа зур рәхмәтләрен белдерде.

Бүген, 6 нчы март көнне, мәктәбебезнең бер төркем укучылары тәрбия эшләре буенча директор урынбасары Х.С.Нәҗипова җитәкчелегендә "Саба дулкыннары" телерадиокомпаниясендә "Мәктәпләр тормышыннан" тапшыруында турыдын-туры эфирда катнаштылар. 7 нче сыйныф укучысы Нуриева Ләйсәния белән 6 нчы сыйныф укучысы Гыйниятуллин Илназлар тапшыруны аһәңле итеп алып бардылар.  Мәктәп директоры И.Г.Дәүлиев мәктәбебезнең материал-техник  базасы, укудагы  уңышларыбыз   белән таныштырды. 7 нче сыйныф укучысы Закарова Илнара "Спорт- минем тормыш девизым!" дигән чыгышын тәкъдим итсә, шигъри күңелле кызыбыз Галимова Зилә, йөрәкләргә үтеп керерлек итеп,  "Әниемә" шигырен сөйләде. Моңлы сандугачыбыз, 3 нче сыйныф укучысы Гарифуллина Айзилә  Тимершык мәктәбендә эшләүче һәркемгә үзенең матур җырын бүләк итте. Халыкара хатын-кызлар көне уңаеннан, барлык әниләргә багышлап, "Пар канатым" җырын башкарды. Гомумән, тапшыруда мәктәбебезнең мавыктыргыч, кызыклы, могҗизаларга бай тормышы сөйләнде.