Балалар иҗат үзәге тарафыннан оештырылган "Могҗизалы мизгелләр" конкурсында мәктәбебезнең 5 нче сыйныф укучысы Әминова Эльмира (тәрбиячесе А.Н.Петрова) 2 нче дәрәҗә дипломга һәм кыйммәтле бүләккә лаек булды.Эльмираны  әлеге уңышы белән котлыйбыз һәм тагын да зуррак уңышларга ирешүен телибез.

  19-21 нче ноябрь көннәрендә мәктәбебездә Туган көн кичәләре узды. Җәй һәм көз айларында туучы укучыларның туган көн бәйрәмнәре барлык 4 группада да билгеләп үтелде. Әлеге бәйрәмнәр тәрбиячеләр тарафыннан укучыларның күңелләрендә  калырлык матур итеп оештырылды. Бәйрәм кичәләрендә укучылар өчен төрле кызыклы, мавыктыргыч уеннар, логик фикерләүне үстерүгә мәсьәләләр, табышмакларга җаваплар табу кебек уеннар һәм җыр-биюләр оештырылды.

       20 нче ноябрь көнне Чаллы шәһәрендэ уткән "В.В.Давыдов мәктәбе:педагогнын профессиональ эшчәнлегендә үсеш идеясы "Бөтенрәсәй фәнни конференциясендә Амирова Р.С.  "Акыл усешендә кимчелекләре булган балалар усешенең диагностикасы" дигән темага  чыгыш ясады. Хезмәттәшебезне әлеге уңышы белән котлыйбыз, киләчәктә дә иҗади уңышлар телибез.    Әлеге конференция кысаларында үткәрелгән мастер-класс конкурсында  катнашкан  А.Н.Петрова, Л.И.Нуриева, Г.М.Мухаметшина, Л.Ф.Галиева шулай ук сертификат белән бүләкләнделәр. Хезмәттәшләребезгә нык сәламәтлек, иҗади уңышлар телибез.

    Бүген укучылар көзге каникулга озатылды. Ата-аналар өчен классларда җыелышлар булды. Каникулга кайтарыр алдыннан укучыларга көзге каникул вакытында үз-үзеңне тоту, куркынычсызлык  кагыйдәләре аңлатылып, имзалар алынды. Шулай ук, ата-аналарга  да балаларның юлдагы хәвефсезлеге, иминлеге , каникул вакытындагы иминлек-сәламәтлекләре өчен җавап бирүләре турында  аңлатылды.

   24 нче октябрь көнне мәктәбебездә  һәр елны билгеләп үтелүче Уңыш бәйрәме узды. Уңыш бәйрәменә һәр класс, һәр группа зур әзерлек белән килгән. Укучылар көче белән әзерләнгән һәр чыгыш жюри һәм укучылар, килгән кунаклар күңеленә хуш килде. Кичә барышында укучыларның класс җитәкчеләре белән әзерләнгән чыгышлары да, тәрбиячеләр белән әзерләнгән иҗади чыгышлары да тамашачыларга бик ошады. Стена газеталары һәм укучыларның ясаган рәсемнәре шулай ук югары бәяләнде. Көзге муллыкны, көзге матурлыкны чагылдырган күргәзмә  презентация аша күрсәтелеп, һәр группа тарафыннан "якланды" .Чара барышында бакча мөдире Г.Ф.Шайхенурова бакча уңышларын саннарда күрсәтте, бакчада тырыш хезмәтләрен куйган укучыларны бүләкләп үтте.  Бакчадагы күңелле хезмәтне, өмәләрне чагылдырган видеопрезентацияне тамашачылар яратып карадылар. Кичә ахырында жюри һәр чыгышны уңай бәяләп, истәлек бүләкләре тапшырды.

  Бүген мәктәбебездә һәр елдагыча Корбан ашы мәҗлесе зурлап үткәрелде. Әлеге чарада авылыбызның имам-хатибе Шәфигулла хәзрәт, Актаныш районы имам-мөхтәсибе Руслан хәзрәт, барлык хезмәткәрләр, мәктәбебездә эшләп лаеклы ялга чыккан хезмәткәрләребез, барлык укучылар катнашты. Чара барышында килгән кунаклар  вәгазь укыдылар, хаҗ сәфәре турында аңлаттылар, табын әдәбе турында сөйләделәр.  Халкыбызның  милли-дини йоласы Корбан    ашы мәҗлесенең барлык шартлары үтәлде. 

      Һава торышы көзге бакча эшләренә уңайсыз килүгә дә карамастан, мәктәп бакчасын, мәктәп яны территориясен чистарту эшләре  үз вакытында башкарылды.

    Бу уку елында мәктәбебез укучылары өчен укытучы-тәрбиячеләр  тарафыннан түгәрәкләр оештырылды. Укучыларыбыз "Кул эшләре",  "Бию",  "Музыка",  "Полиглот",  "Сувенир",  "Театр",  "Яш спортчылар", " Гөлләр- өй бизәге", "Иң матур тел-туган тел" кебек түгәрәкләргә яратып йөриләр.

       14  нче октябрь көнне мәктәбебез укытучысы Ю.И.Мансурова   "Белем җәүһәрләре" IV бөтендөнья файдалы интернет-проектлар бәйгесенең Г.Камал театрында үткәрелгән  йомгаклау тантанасына чакырылып, диплом һәм кыйммәтле бүләк белән бүләкләнде.  Әлеге конкурста  ул үзенең "Татарча логопедия" сайты белән  катнашып җиңү яулады. Хезмәттәшебезне әлеге уңышы белән котлыйбыз, алга таба да иҗади уңышлар телибез.

         Елдагыча, мәктәбебездә өлкәннәр ункөнлеге матур эшләр белән билгеләнде. Укучыларыбыз мәктәбебездә эшләп лаеклы ялга чыккан апа-абыйларның өйләрендә булып, аларны бәйрәм белән котладылар, бәйрәм чәенә дәштеләр, хуалык эшләрендә булыштылар. Халыкара Укытучылар көне һәм Өлкәннәр көне мәктәбебездә матур бәйрәм булып үтте. Чакырылган кунаклар өчен укучылар  көче белән әзерләнгән концерт күрсәтелде, яшьлек еллары кайтавазы булып әзерләнгән видеопрезентация күрсәтелде. Бәйрәм тантанасы чәй табыны янында өлкәннәребезнең, укытучы-тәрбиячеләребезнең үзара аралашуы, хатирәләр алмашуы булып дәвам итте. Әлеге чарада Актаныш муниципальрайоны башкарма комитетының опека һәм попечительлек бүлеге җитәкчесе Г.Н.Хаертдинова катнашты. Ул өлкәннәрне, укытучы-тәрбиячеләрне бәйрәм белән котлап, изге, матур теләкләр теләде. Бәйрәм бик күңелле үтте.