Бүген мәктәбебездә язгы бакча эшләре башланды. Укучылар группаларга бүленеп чистарту эшләрендә дә катнаштылар, орлык суганы өчен җир казу эшен дә башладылар.

          Менделеевск шәһәре VIII төрдәге махсус (коррекцион) интернат-мәктәбе кысаларында Россия Махсус Олимпиадасы программасы  буенча   үткәрелгән     VIII Республика мини-футбол ярышының зона этабында мәктәбебез егет-кызлары II урынны яулап кайтты. Укучыларыбызны һәм тренерлары Н.А.Сибгатуллинны  призлы урынны яулаулары белән ихлас котлыйбыз.

11 нче апрель көнне мәктәбебездә матур традициягә әверелеп килүче "Шаян-шоу" кичәсе  бик матур, әзерлекле үтте. Кичәгә барлык  группа, барлы класс укучылары да тырышып әзерләнгән.Кичә барышында күрсәтелгән кызыклы тамашалар укучыларны гына түгел, укытучы-тәрбиячеләрне дә көләргә мәҗбүр итте. Әлеге кичәдә алган уңай эмоцияләр язгы бакча эшләрен дә елмаеп-көлеп кенә башкарырга ярдәм итәр.

    Мәктәбебездә мари  халкының төрле милли бизәкләрен төшереп укучылар  һәм укытучы-тәрбиячеләр ясаган сувенирлардан күргәзмә оештырылды. Барлык класс укучылары бик теләп ктнаштылар. Иң уңышлы дип табылган иҗат эшләре район күргәзмәсенә җибәрер өчен сайлап алынды.

    9 нчы апрель көнне мәктәбебездә   биология  укытучысы Р.Х.Сибгатуллина тарафыннан оештырылган әйләнә-тирә мохитне саклау һәм экологик культура елына багышланган чараларның чираттагысы булды. Экологик кичә -"Табигать -уртак йортыбыз" исеме астында узды.  Кичә дәвамында укучылар 4  группага бүленеп көч сынаштылар,  табышмакларга җавап эзләделәр,  зирәклеккә һәм логик фикерләүгә багышланган сорауларга җаваплар таптылар, концерт номерлары күрсәттеләр. Кичә компьютер презентациясе белән үрелеп барды. Барлык укучылар да, килгән кунаклар да бик канәгать калдылар.

   Республика инвалидлар оешмасының 25 еллыгына багышланган кул эшләре күргәзмәсендә  мәктәбебезнең инвалид балалары кул эшләре белән катнашып, район инвалидлар оешмасының рәхмәтенә лаек булдылар.

   4 нче апрель көнне мәктәбебездә  Республикакүләм "Вместе мы можем больше"  исемле инвалидлар конкурсында катнашучыларның әзерлеген тикшерү максатыннан  район инвалидлар оешмасы җитәкчесе Светлана Муллахметовна, халыкка  социаль ярдәм күрсәтү бүлеге җитәкчесе Айгөл Мирзашарипова,  сәхнә ветераны Мәгыйзь Әһлетдинов, ТВ операторы  килеп, инвалид укучыларның кул эшләре , сәхшә хезмәте белән таныштылар. Очрашудан кунаклар яхшы тәэсирләр белән китте. Инвалид укучыларның эшләре район мәдәният сараенда узачак күргәзмәгә чакырылды.

  Укучыларны  язгы каникулга тарату алдыннан куркынычсызлык кагыйдләре, чиреклек билгеләр аңлатылды.

   Бүген мәктәбебездә Нәүрүз бәйрәме һәм кошларны каршылау кичәсе зурлап билгеләп үтелде.  Иң элек балаларга Нәүрүз бәйрәменең тарихы турында аңлату булды, укучылар тарафыннан Нәүрүз бәйрәме театральләштереп күрсәтелде. Бәйрәмнең икенче өлешендә биология укытучысы Р.Х.Сибгатуллина  кошларны каршылау кичәсе оештырды. Укучыларга кошлар турында төрле кызыклы мәгълүматлар җиткерелде, табышмакларга җаваплар табу, "Сез беләсезме?" кебек уеннар оештырылды. Кошлар булып киенгән укучылар безнең якта кышлаучы һәм күчмә кошлар белән таныштырдылар, тулы мәгълүмат бирделәр.  Укучылар көче белән әзерләнгән концерттан соң, "Кошлар турында иң матур рәсем ясаучы", "Кошлар турында иң матур шигырь сөйләүче, җырлаучы", "Кошлар турында иң матур рәсем ясаучы", "Иң матур сыерчык оясы ясаучы" укучылар билгеләнде, аларга бүләкләр тапшырылды.

   Бүген мәктәбебездә Россия Махсус Олимпиадасы кысаларында үткәрелүче VIII  Республика армрестлинг ярышларының зона этабы булды.  Мәктәбебез егет-кызлары  Минзәлә, Мөслим, Түбән Кама, Тукай районнары командаларын артта калдырып, беренчелекне алдылар һәм финал ярышларында катнашу хокукын яуладылар.  Укучыларыбызның киләсе ярышларда да сынатмауларын,  тренерларына һәм үзләренә сәламәтлек , уңышлар телибез.