19 май көнне районның барлык мәктәпләреннән килгән укучылар табигатьнең матур почмагы Яңа Шашы мәктәбе базасында традицион чара  "Дуслык учагы - 2011" фестиваленә  җыелдылар. Фестиваль Габдулла Тукайның 125 еллыгына һәм Ю.А. Гагаринның галәмгә чыгуына 50 ел тулуына багышланган иде. Дуслык учагының төп максаты укучыларны үзара якыннан таныштыру...  "Дуслык учагы - 2011" кысаларында укучылар  спорт ярышларында, төрле бәйгеләрдә көч сынаштылар, иң изге теләкләрен бер-берсенә язма рәвештә плакатларга язып теләделәр. Барлык   уеннарда укучылар теләп катнаштылар, актив  ял иттеләр. Концерт номерлары да үзенчәлекле программа буенча алып барылды.

"Язның бер көне ел туйдыра" дигән девиз астында мәктәп яны тәҗрибә участогында эш кайный. Укучылар түтәлләр ясап, яшелчәләр утырталар.

16 май көнне Күәм урта мәктәбенең 10 нчы сыйныф укучылары район күләм үткәрелгән хәрби җыенда катнаштылар. Егетләребез хәрби-патриотик тәрбия, физик ныгу, солдат  чыныгуы алып кайттылар, - дип белдерде ТИН укытучысы Зарипов Булат Абдулла улы.

14 май  - олы йөрәкле, гаҗәеп тә талантлы, киң күңелле якташ язучыбыз,  Татарстанның атказанган мәдәният хезмәткәре, Фатих Хөсни исемендәге бүләк иясе   Радик  Хәбибрахман улы Фәизовның тууына 80 ел тулу уңаеннан Дусым мәдәният сараенда Радик Фаизовны искә алу кичәсе оештырылды. Күәм урта мәктәбе балалар оешмасы әгъзалары Радик Фәизовның тормыш иптәше Дамира апа һәм кзлары белән очрашу бәхетенә ирештеләр.

Менә ямьле май ае да җитте,

Бар табигать яшел хәтфәдә.

Күңел никтер моңсу, тургайларым

Моңлы җыруларын әйтсә дә.

   Укучыларның чыгышы әнә шундый юллар белән башланып китеп, Радик Фәизовның тормыш юлы һәм иҗаты буенча татар теле һәм әдәбияты укытучысы Садриева А.Г. әзерләнгән презентация  белән үрелеп барды. Дамира апа һәм кызлары Светлананың якты хәтирәләре очрашуны тагын да истәлекле итте. 

14 май көнне мәктәп яны тәҗрибә участогында әйләнә-тирәне яшелләндерү өмәсе уздырылды. 400 гә якын яшь нарат, чыршы һәм карагай үсентеләре утыртылды.

7 май көнне авылыбыз уртасында урнашкан Бөек Ватан сугышында һәлак булганнар өчен куелган һәйкәлгә тантаналы рәвештә венок куелды. Шулай ук, авылыбызның бердәнбер ветераны Рәхим абый белән истәлекле очрашу булды. 4-5 сыйныф укучылары эчтәлекле чыгыш ясадылар, бер минутлык тынлык белән көрәштә һәлак булганнар искә алынды. Рәхим абый тыныч тормышның кадерен белеп, тәрбияле, кешелекле булып үсәргә, әти-әнине хөрмәт итәргә, дигән теләкләрен теләде.

6 май көнне мәктәбебездә Бөек Җиңүнең 66 еллыгы уңаеннан варислар белән берлектә кичә-презентация булып узды. Укучыларга сугышның иң төп бәрелешләре һәм анда безнең якташларыбыз күрсәткән батырлыклар турында сөйләнде, шигырьләр сөйләнде.

29 апрель көнне мәктәбебезнең тарих укытучысы Садриев Равил һәм ул әзерләгән 9 сыйныф укучысы Ганиева Рамилә Кукмарада узган Р.И. Утәмешов исемендәге "Мое я в большой науке" республикакүләм фәнни-гамәли конференциядә катнаштылар.

Ганиева Рамилә "Әтнә районы территориясендә Азелино культурасы эзләре" дигән темага чыгыш ясап II урынны яулады һәм диплом белән бүләкләнде.

"Ил тарихында гаиләм тарихы" республикакүләм иншалар конкурсында I урын алган 10 сыйныф укучысы Нәҗипов Илназны укытучысы Садриев Равил эзләнү эшчәнлегендә җитәкли.