9- класс укучыларын һәм аларның әти-әниләрен дә уку елын уңышлы тәмамлаулары белән чын күңелдән котлый алабыз. 18 укучы күп тырышлыклар куеп, укытучыларының һәм әти-әниләрнең ярдәмен тоеп, имтиханнарны уңышлы гына тапшырып, аттестатлы булды. Араларында укуларын техникум, училищеларда дәвам итәргә теләүчеләр дә бар. Кайда гына булсагыз да уңышлар юлдаш булсын үзегезгә, ә хәзер сезне күңелле каникуллар көтә.

Тиздән, 17-июль көнне авылыбызда “Мөселман сабантуе”. Әзерлек эшләре күптән башланды инде. Һәркем көченнән килгәнчә эш башкара: укучыларыбыз скамьялар буей, егетләр мәйданны тәртипкә китерә, әтиләребез яңа корылмалар кора, башлангыч класслар апалары белән “Әрәпә” җыя. Һәммәгезне бәйрәмгә чакырабыз, килегез, безнең белән бергә күңел ачыгыз, ял итегез.

Җәйге ялның яртысы үтеп тә бара. Укучыларыбыз совхозда өлкәннәргә булыша, лагерьларда ял итә, әби-бабайларында кунак була, биби саклый, җиләк җыя. Һәм әлбәттә мәктәп бакчасында практикасын үтә. Үзләре чүбен утап, суын сибеп үстергән яшелчәләр, җиләк-җимешләр белән ел буе сыйланачак бит алар.

29 нчы июнь көнне коллективта чираттагы уку елының соңгы педагогик киңәшмәсе булып узды. Киңәшмәдә еллык эшкә отчет тыңланды. 

28 нче июнь көнне 9 нчы сыйныф укучыларына аттестат тапшыру тантанасы бүлып узды. Укучыларыбыз имтиханнарны уңышлы тапшырып белемнәрен күрсәтә алдылар. Аларны чын күңелдән котлыйбыз.

27 нче июнь көнне Балтач үзәге ял паркында 11 сыйныфны тәмамлаучылар өчен зур бәйрәм тантана булып узды.Мәктәпне яхшы билгеләргә тәмамлаучыларны һәм имтиханнарда зур баллар җыйган укучыларны котлап грамоталар тапшырдылар.

27 нче июнь көнне ГТО нормативларын уңышлы тапшырган бер төркем укучыларыбызга “көмеш” значоклар тапшыру тантанасында катнаштылар. Укучыларыбызны зур җиңүләре белән котлыйбыз.

25– июнь - “Могҗиза” хезмәт һәм ял лагерыбызның соңгы көне. Соңгы атнада бакчада эшләү белән беррәттән күңелле очрашу да оештырылды безнең өчен. Танылган язучы Рабит Батулла белән очрашып, аның катнашында татарча кино карадык, тормышы, иҗаты белән таныштык. Файдалы да, кызыклы да булган ялыбыз ахырына якынлашты. Тәмле ашатсалар да, күмәк уеннар белән ялыбызны күңелле итеп оештырсалар да, җәйге ял сагындырган инде. Алга планнар да корылган : район лагерьларына барырга, совхозга җәйге эшләрдә булышып акча эшләргә, җиләкләргә йөрергә, Казанга барып ял итәргә теләүчеләр бар арабызда. Лагерьны оештырган һәм анда эшләгән укытучыларыбызга зур рәхмәт, исән-сау ял итеп сентябрьдә кабат мәктәбебездә очрашырга язсын дигән теләктә хушлашабыз.