7 апрель көнне Субаш урта мәктәбендә ата-аналар җыелышы була.

Көн тәртибендә:

1. 3 нче чирек нәтиҗәләре
2. Республикадан килгән № 1244-11 хаты белән танышу
3. ТР №71-ЗРТ законы белән кабаттан танышу, ТР  №65-ЗРТ законына кергән өстәмәләр, үзгәрешләр белән танышу.
4. Ата-аналар комитеты утырышы.

Г.Тукайның 125 еллыгы уңаеннан «Сабантуй» газетасы һәм Арча Укучылар Сарае үткәргән «Тукайга ияреп…үзеңчә» дигән иҗади конкурста 4 нче сыйныф укучысы Васильева Гөлинә 3 урын алды. Гыйлемҗанов Илһам, Габделхакова Диләрә, Федорова Гүзәл, Гыйлемҗанова Айсылулар сертификатка ия булдылар.

26 нчы март көнне мәктәпнең  «Мәктәп аша узган безнең юллар,бәрәкәтле, озын булсачы»дигән бәйрәм концерты булып узды. Концертта 8-11 нче сыйныф укучылары, укытучылар, хезмәткәрләр, гаиләләр катнашты. Бәйрәм концерты искиткеч матур, оешкан төстә үтте.Тамашачы канәгать калды.

Хөрмәтле ир-егетләребез! Сезне бәйрәм белән котлыйбыз.

Балигъ булмаганнар белән эшләү инспекторы, милиция капитаны Шакирова Ләйсән Маратовна чыгышы күр кенә әти-әниләрне уйланырга мәҗбүр итте. Районда укучылар тарафыннан эшләнгән җинаятьләрне әйтеп, мисаллар китерде. Субаш җирлегендә андый җинаять башкаручыларның юклыгын да азсызыклап үтте.

Субаш урта гомуми белем мәктәбен тәмамлаучылар, сезне 26 февраль көнне сәг.11 дә очрашу кичәсенә көтеп калабыз. Субаш мәктәбе коллективы, укучылары сезне үз мәктәбендә каршы алырга әзер. Дуслар белән очрашырга, балачакка кабат әйләнеп кайтырга, укытучыларыбызга кабат рәхмәт җиткерергә иң кулай вакыт. Очрашуга рәхим итегез!

8-11 нче сыйныфлар арасында фигуралы шуу булды. Һәр класс әзерләгән программа үзенчәлекле, кызыклы, алымнар күп төрле. Тик шулай да ярыш ярыш инде ул. Анда җиңүчеләр дә, җиңелүчеләр дә булырга тиеш Әмма һәркем бу ярышта үзен җиңүче дип атый ала. 8 класслар үзләрен бердәм, 9 класслар иң оста биючеләр, 10 класслар фантазиягә бай икәнлекләрен күрсәттеләр. Менә нәтиҗәләр: 9 кл - 98балл, 8 кл - 91 балл, 10 кл. - 90.8 балл.

Укытучылар һәм укучы яшьләр өчен татар телендә чыгарыла торган “Мәгърифәт” атналык газетасының бүген туган көне. Туган көне генә дә түгел - юбилее. Аның беренче саны 1991 елның 15 февралендә дөнья күргән. Ул көннәрдән бирле укучыларга инде 992 сан барып ирешә алган.

“Мәгърифәт” – республиканың иҗтимагый-сәяси тормышы хакында төгәл мәгълүмат биреп кенә калмыйча, мәгариф учреждениеләре проблемаларын киң яктырта, мәгариф системасын реформалаштыру буенча республика һәм бөтенроссия программалары турында фикер алышуга чакыра, яшь буынны укыту һәм тәрбия процесслраын ачып бирә, алдынгы укытучылар, фән эшлеклеләре тәҗрибәсе белән уртаклаша, укучыларны укыту өлкәсендәге яңа инновацион программалар, алдынгы технология һәи методология белән таныштырып бара.

Академик Әнвәр Хуҗиәхмәтовның татар мәгърифәтчеләре турында язмалар циклы, язучы Фәнзаман Батталның туган тел проблемаларын ачкан мәкаләләре, Туфан Миңнуллинның милләтнең әхлакый кыйммәтләрен яктырткан хикәятләре укучыларда аеруча зур кызыксыну тудыра. 3 айга бер газета битләрендә Татарстан халыклары телләре турындагы законның үтәлеше проблемаларын үз эченә алган “Әткәм-әнкәмнең теле” кушымтасы басыла. Конкурслар да даими уздырыла. 2010 – Укытучы елы уңаеннан “Җылы сүз җан эретә” бәйгесе шулкадәр популярлык казана ки, аны быел да дәвам итәргә туры килгән. Яшь математиклар “Мөстәкыймовлар олимпиадасы”нда бик теләп катнаша. Фатих Кәрим, Абдулла Алишка багышланган бәйгеләрне Тукайның 125 еллыгына багышланган конкурс алмаштырды. “Без кабызган утлар” сәхифәсендә энергетиклар төрле бәйгеләрне даими үткәреп килә.

"Белем.ру" колективы, Субаш урта гомуми белем мәктәбе  “Мәгърифәт” газетасы хезмәткәрләрен, аларның укучыларын әлеге бәйрәме белән тәбрик итә. Укыгыз, мәгърифәтле булыгыз!