Бүген мәктәбебездә Республикабызның һәр мәктәбендәге кебек Соңгы кыңгырау чыңлады. Тантаналы линейкада районыбызның ММҮ методисты Ф.М. Ярмөхәммәтова да катнашты. Уку елы дәвамында уңышларга ирешкән һәркем бүген мактау грамоталары, төрле конкурсларда катнашу шаһадәтнамәләрен аның кулыннан кабул итте. Линейкада укучыларыбызның туганнары, ветеран укытучылар һәм техник хезмәткәрләр  дә үзләренең мәктәп тормышы турында фикерләрен белдерделәр, чыгарылыш сыйныф укучыларына уңышлар теләделәр. 

Шулай ук Фәридә Минталибовна мәктәбебезнең баскетбол командасындагы егет һәм кызларга, Кэс-баскет мәктәп баскетбол лигасында катнашкан өчен, баскетбол туплары да тапшырды.

9нчы сыйныфны тәмамлаган 4 лачыныбыз өчен соңгы кыңгырауны Абдуллаев Илсаф һәм Уразгилдиева Алинә яңгыратты. Хәерле юл, уңышлы имтиханнар Сезгә, егетләр!

Бүген мәктәбебездә зур бәйрәм- 4 сыйныф укучылары башлангыч звено белән хушлаша. Мәктәптән бөтенләйгә китәләр, диярсең, күзләрендә энҗе тамчылар җемелди!   4 ел барышында шактый зур уңышларга ирешеп, укуның яңа баскычына күтәрелгән 4 укучыга зур уңышлар юлдаш булсын иде.

Мәктәбебезнең барлык укучылары һәм укытучылары катнашында бүген Балачак бәйрәме узды. Еллар узу  барышында бәйрәм үзенең исемен үзгәртсә дә, аның җисеме - алдынгыларны зурлау, сыйныф активлары осталыгын һәм бердәмлеген тикшерү, хәрәкәтле уеннарда үз көчеңне сынау, "Бердәмлектә көч!" девизына тугрылык үз көчендә калды. 

Безнең бәйрәмебез татар халкының Сабантуй уеннарын үз эченә алган иде. Батырлар да , матурлар да зур мактауларга иреште, Балачак бәйрәме-иң күңелле бәйрәм булып, хәтерләрдә калачак!

Яшүсмерләр тарафыннан хокук бозуларны кисәтү максатыннан, мәктәбебезнең 5-9 сыйныф укучылары участок инспекторлары Абдрахманов Ә.Р. һәм Кузнецов Г.К. белән очрашты. Очрашу барышында кунаклар яшүсмерларнең хокук һәм бурычларын искәртте, хокук бозу очракларының киләчәк тормышка тискәре йогынтысын ассызыклап, барлык укучыларны хокук бозулардан сакланырга чакырды.

Участок инспекторлары белән менә шушылай профилактика максатларын күздә тотып кына очрашырга язсын иде!

Бүген мәктәптә "Халыкара балаларның ышаныч телефоны көне"нә багышланган мәктәпкүләм ата-аналар җыелышы узды. Җыелышта Киекле авыл җирлеге участок инспекторлары Абдрахманов Ә.Р. һәм Кузнецов Г.К., "Росгосстрах" иминиятләштерү компаниясе агенты Муртазина Г.Р. да катнашты.

Участок инспекторлары яшүсмерләр тарафыннан хокук бозулар булганда, ата-аналар җаваплылыгы турында сөйләп, җәйге чорда балалар белән ата-аналарны тагын да якынрак булырга чакырдылар.

Ата-аналар балалары белән ышанычлы һәм эчкерсез аралашуны югалтмасыннар, укучыларыбыз тарафыннан хокук бозулар булмасын иде. 

Ата-аналар җыелышының бер көн тәртибе буларак, укучыларның тормышларын һәм сәламәтлекләрен иминиятләгштерү торышы каралды. Җыелышта "Росгосстрах" иминиятләштерү компаниясе агенты Муртазина Г.Р. иминиятләштерү шартлары белән таныштырды. Иминиятләштерү сроклары узган укучы балаларны яңадан иминиятләштерү кирәклеге белән барлык җыелышта катнашучылар да килеште. Алда иң озын каникул торганда, бу эш бигрәк тә мөһим, чөнки су коену, велосипедта җилдерү, төрле походларда булу, җәйге ял лагерьларында ял итү, оешкан төстә экскурсияләргә бару- һәммәсе дә баланың иминиятләшкән булуын таләп итә.

Бүген мәктәбебездә география укытучыбыз Курамшин Р.Х. һәм биология укытучыбыз Ганиев Р.М. җитәкчелегендә Бөтендөнья экологик белем көненә багышланган экологик акция узды. Акция кысаларында 7-9 сыйныф укучылары катнашында Чирмешән елгасының сул як яры 150 м озынлыкта коры үлән сабакларыннан һәм көнкүреш чүп-чарларыннан арындырылды. Шулай ук бу көнне мәктәбебез территорясен яшелләндерү эше дә башкарылды: балан, юкә һәм аю камыры куаклары утыртылды. Табигать- анабыз безнең бу эшләрне куанып кабул иткәндер, үзенә карата кайгыртучанлык күреп сөенгәндер. Бу эшләре әйләнә-тирәбезне чистарту белән беррәттән күңелләребезне чистартуга да бер адым булсын иде.

Укучылар һәм укытучылар авыл клубында  Бөек Җиңүнең 69 еллыгына багышланган "Җиңү алып килде ул яз безгә" дигән концерт программасында катнашты.

Бөек Җиңүнең 69 еллыгына багышланган Җиңү парадында 1-9 сыйныф укучылары чыгыш ясады. Аллы-гөлле шарлар, флаглар тоткан башлангыч сыйныф укучылары йөреше дә, сафта йөргәндә аяк асларыннан тузан болыты күтәргән 5-9 сыйныф укучыларының йөреше дә бик тәэсирле булды. Күзләрдә бүгенге тормыш матурлыгыны сөенеч тамчылары җемелдәде. Ил-көннәребез тыныч, төн йокыларыбыз борчуларсыз булсын иде.

1 нче сыйныф укучылары зур җиңүләрен-Әлифба бәйрәмен билгеләп үтте. Әти-әниләрен, мәктәбебез укучыларын үткен сүз, моңлы җыр, оста бию, артистлык таланты белән әсир иттеләр алар. Бәйрәм тантанасында катнашкан һәркем  озак вакытка җитәрлек яхшы кәеф, күңел күтәренкелеге белән коралланды. Нәни дусларыбызга алга таба белем үрләрен яулауда җиңеллекләр телибез. Бәйрәмегез котлы булсын, беренчеләр!