18 көн дәвам иткән ял төгәлләнде. Күңелдә матур истәлекләр, онытылмас мизгелләр, хәтирәләр калды. Безнең белән эшләгән абый, апаларыбызга, пешекчеләргә, бушлай бассейн, боз сараена бару мөмкинлеге тудырган район җитәкчеләренә зур рәхмәтебезне белдерәбез!

Бүген - Бөек Ватан сугышы башланган көн. Моннан нәкъ 70 ел элек җәйнең шушы матур көне кайгы-хәсрәт көненә әйләнгән. Әтиләр, абыйлар, япь-яшь егетләр Ватанны сакларга киткәннәр. Без бүген җиребез иминлеге өчен көрәшкән каһаманнарны искә алдык, обелискка чәчәкләр, веноклар куйдык. Чәчәкләр ясарга өйрәткән вожатый Гүзәл Рәшитовнага, безнең белән әңгәмә үткәргән Гөлнара Җәүдәтовнага зур рәхмәт!

Хәрби-патриотик тәрбия бирү атналыгы дәвам итә. Бүген без "Нарат" боз сараенда булдык, аннан соң ОВС укытучысы Нурмиев Мәсгуть Нурисламович безнең өчен кораллар, аларның төзелеше, тарихы турында сөйләде, презентация күрсәтте. Укытучыбызга зур рәхмәт!

Мәктәп яны тәҗрибә бакчасында, чәчәклекләрдә кызу эш гөрли. Соңгы вакытта явып үткән яңгырлар барысына да килешкән, чүпне утап кына өлгер! Ләкин безнең укучыларыбыз эштән курыкмый. Хәзерге вакытта 2, 7, 9 нчы сыйныфлар җәйге практика үтә. Мәктәптә алган күнекмәләр өйгә кайткач та ярап куяр, кыш көне үзебез ашарга яшелчә, җиләк-җимештән мул уңыш алырбыз дип өметләнәбез.

Без бүген мәктәп каршындагы асфальтка рәхәтләнеп рәсем төшердек. Без ясаган күгәрченнәр, кояш, чәчәкләр җиребезгә иминлек, тынычлык теләп торсын! Аннары пионербол ярышы булды.

Без бүген "китап докторлары" булдык. Мәктәп китапханәсендә дәреслекләр, китаплар ремонтладык. Аннары "Ягез әле, егетләр!" бәйгесе булды. Егетләребез үзләренең җитезлекләрен, осталыкларын күрсәттеләр

Бүген хәрби-патриотик тәрбия бирү атналыгы башланды. Шул уңайдан "Без тынычлык телибез!" дигән темага рәсем конкурсы булып үтте. Аннары "Очкын" һәм "Дуслык" отрядлары арасында баскет-шоу ярышы булды.

Бүген инглиз теле атналыгының соңгы көне булды. Укучылар инглиз телендә "Теремок" әкиятен сәхнәләштерделәр. Төшке аштан соң мәдәният йортында сәхнәдә чыгыш ясау күнекмәләре алдылар.

Көн яңгырлы булуга карамастан, безнең мәктәп лагере гөрләп тора. Бүген инглиз теле укытучыбыз Зилә Бәшировна музыкаль презентацияләр ярдәмендә җырлар өйрәтте, аннары бассейнга бардык.

Бүген лагеребызда сәламәт яшәү рәвешенә багышланган көн булды. "Наркотикларга - юк!" дип аталган әңгәмәдән соң плакатлар конкурсында катнаштык, аннары кече спартакиада үткәрелде.