Районыбызда җәй көне дә кышның саф һавасын, суыгын, кар һәм бозларын саклый торган сихри урын бар. Ул - "Нарат" боз сарае. Бүген без анда булдык, рәхәтләнеп тимераякта шудык, шаярыштык, куыштык. Безнең өчен бушка мондый мөмкинлек тудырган район җитәкчеләренә, безне автобуска утыртып йөрткән Равил абыйга, вожатыйларыбыз Марсилә апа, Гөлчәчәк апа, Шамил абыйга зу-у-у-ур рәхмәт!

Җәйге ял дәвам итә. Бүген өстәмә белем бирү педагогы Гөлфинур Фәрхетдиновна безгә кәгазьдән баш киемнәре ясарга өйрәтте, аннары төрле кызыклы конкурслар үткәрде. Апабызга зур рәхмәт!

Бүген, ягъни 4 нче июнь көнне футбол буенча лагерь беренчелегенә ярышлар булып узды. Яшел чирәм өстендә туп куудан да кызыграк шөгыль бармы икән! Рәхәтләнеп йөгердек, ярыштык. Кемнәрдер җиңде, кемнәрдер җиңелде, шулай да һәркем шат һәм канәгать калды. Физрук Шамил Хасановичка физкульт - РӘХМӘТ!

Мәктәп яны лагеренда күңелле чаралар дәвам итә. Бүген рус теле һәм әдәбияты укытучыларыбыз Әлфия Галинуровна һәм Гөлфинә Ринатвналар "В гостях у сказки" дип аталган бәйге үткәрделәр. Укучылар рус теле буенча белемнәрен тикшерделәр, җырлар, шигырьләр, кагыйдәләрне искә төшерделәр. Чара бик мавыктыргыч булды, иң активларга бүләкләр дә эләкте. Укытучыларыбызга зур рәхмәт!!!

Бүген лагеребызга кунаклар килде. Алар - "Алабуга электр челтәре" филиалында эшләүчеләр. Алар балаларның яшь үзенчәлеләрен исәпкә алып, аңлаешлы формада электр, аның ничек барлыкка килүе, электр белән сак эш итү кагыйдәләре турында сөйләделәр, укучыларның сорауларына җавап бирделәр. Безнең иминлегебез өчен кайгыртучыларга рәхмәтебезне белдерәбез, эшләрендә уңышлар телибез!

Лагерьга йөрүче балалар арасында талант ияләре бик күп. Бүген алар арасында конкурс-бәйге үткәрелде. Укучылар җырлар, шигырьләр, биюләр башкардылар. Иң осталары бүләкләргә лаек булды. Котлыйбыз!

2 нче июнь көнне мәктәп яны ял һәм сәламәтләндерү лагеренда ял итүчеләр өчен математика укытучысы Михайлова Н.Ә. "Математика илендә" дип аталган зирәкләр һәм тапкырлар бәйгесе үткәрде. Укучылар 3 командага бүленеп көч сынаштылар. Бәйге укучыларга бик ошады. Укытучыбызга рәхмәт!

Лагерьда ял итүчеләр авылга якын гына урнашкан, шифалы суы белән үзенә дәшеп торучы Изгеләр чишмәсенә барып кайтырга да вакыт таптылар.

1 нче июнь көнне Тимершык урта мәктәбе каршында оештырылган "Шатлык" сәламәтләндерү лагере үзенең эшен башлап җибәрде. Лагерь 30 балага исәпләнгән, шулай да анда башлангыч сыйныфларда белем алучы 47 бала чиратлашып ял итәчәк. Ял итү чорына бассейн, боз сараена бару, төрле очрашулар планлаштырылган. Укучыларның сәламәтлеген тикшереп, кабул итеп алу өчен фельдшер Галимҗанова Рәмзия апа чакырылган иде. Ул укучылар белән дөрес туклану, гигиена турында әңгәмә үткәрде. Лагерь флагын уку елы дәвамында гел "5" ле билгеләренә генә укыган Фазылова Сөмбел, Дәүлиев Әлфис, Нәҗипова Илзидәләр күтәрде. Хәерле сәгатьтә!

Лагерьның беренче көне кызыклы һәм файдалы чараларга бай булды. Шуларның берсе  - татар теле һәм әдәбияты укытучысы Миннеханова М.Ф. үткәргән "Без - Тукайлы халык!" дип аталган виртуаль экскурсия. Укучылар сөекле шагыйребез турында видеоматериал белән таныштылар, викторина сорауларына җавап бирделәр, үзләре дә шигырьләр язып карадылар, иң осталары призларга ия булды.