Уку елы башланырга нибары 3 көн калып бара... Кемнәрдер 1 сентябрьне түземсезлек белән көтеп алса, икенчеләр, җәйге ялларның шулай тиз үтеп баруына уфтана. Ничек кенә булмасын, парта артына утырырга әзерләнә башларга вакыт җитте. Шул нисбәттән, бүген гимназиядә бәйрәм алды җыелышы - “пробный” көн уздырылды. Һәр сыйныф үз сыйныф җитәкчеләре һәм сыйныфташлары белән очрашып, бик тиздән башланачак уку көннәре турында гапләште. Белем көненең тантаналы линейкасында катнашучылар үзләренең концерт номерларын кабатлады.

22 нче август көнне  яңа уку елының беренче Педагогик киңәшмәсе узды. Педагогик киңәшмәнең председателе һәм сәркатибе укытучылар тарафыннан тавыш бирү юлы белән яңадан сайланып тәгаенләнде. Гимназия директоры Г. Г. Шәмсиева барлык укытучыларны яңа уку елы башлануы белән котлап, яңа уку елы дәвамында көн кадагында торган мәсьәләләргә тукталды, укытучыларның һәм сыйныф җитәкчеләренең һөнәри вазыйфаларына караган бурычларын һәм хокукларын искәртте, гимназиянең уңышлары белән уртаклашты. Ике сәгатькә сузылган бик җитди педагогик киңәшмәдән соң, коллективка яңа килгән яшь укытучылар тәкъдим ителде, уку-укыту барышында аерым бер уңышка ирешкән тәҗрибәле укытучылар мактау һәм рәхмәт сүзләре белән бәяләнде.

ТР Мәгариф һәм фән министрлыгы 2015-2016 нчы уку елы нәтиҗәләре буенча республиканың 100 иң яхшы авыл һәм шәһәр мәктәпләре рейтингын төзегән. Анда бердәм дәүләт имтиханнары нәтиҗәләре, Россия күләмендәге олимпиадаларның төбәк этабында җиңүчеләр исәпкә алынган. Әлеге исемлектә гимназиябезне күрү аеруча сөенечле. Шулай итеп, гимназиябез әлеге рейтингта “Иң яхшы 100 мәктәп” арасында беренче иллелектә 33нче урынны били! Татарстан буенча төп белем бирүче мәктәпләр арасында да гимназиябез беренче иллелектән калышмый. Исемлектә күрсәтелгән 441 мәктәп(!) арасында 36нчы урынны били! Афәрин! Ничек инде сөенмисең дә, ничек инде горурланмыйсың ди ! Иң яхшылар рәтендә булырга укучыларыбызның БДИны уңышлы тапшырулары да йогынты ясаган бит!

Яңа уку елы башлануын Яңа уку елы башлануын белдергән 1 сентябрь иртәсен балалар гына түгел , инде ничәмә –ничә ел белем биргән укытучылар да зур дулкынлану белән каршы ала. Белем бәйрәмен иң зарыгып көтүчеләр, әлбәттә, ул – беренчеләр! Ел саен әлеге дулкынландыргыч мизгелләргә берничә көн кала булачак беренче сыйныфлар һәм аларның әти-әниләре белән җыелышлар уздырыла. Бу көндә беренчеләр үзләренең кабинетлары, сыйныф җитәкчеләре һәм үзләренә кирәкле кыскача белешмә белән таныша. Быел әлеге көн 29нчы августка планлаштырыла.

29 августа в 12.00 состоится Пробный день!

Управление образования города Казани объявляет опрос родительской общественности о качестве образовательных услуг, предоставляемых муниципальной системой образования. Для того чтобы проголосовать необходимо кликнуть на соответствующий баннер вверху главной страницы портала http://www.kazanobr.ru или пройти по ссылкам: http://test-kazanobr.ru/node/279 (для школ), http://test-kazanobr.ru/node/286 (для детских садов). Регистрации на портале для участия в опросе не требуется. Спасибо за Ваш голос!

Әле май ахырында гына Шәһәр Башкарма комитеты боерыгы нигезендә, гимназия янын төзекләндерү эшләре башланган иде. Ул вакытта без яз-көз айларында - мини-стадион, кыш айларында шугалак ролен үтәгән иске спорт мәйданчыгы сүтелеп, аның урынына заманча шартларга яраклаштырылган мини футбол кыры һәм тренажер мәйданчыгы төзү планлаштырылуы хакында хәбәр иткән идек инде. Шул нисбәттән гимназия тирәсендә башланган “урак өсте”, ниһаять, ахырына да якынлаша. Гимназия тирәсе күзгә күренеп үзгәрә, яшәрә. Бу көннәрдә генә гимназия ишегалдының яшеллеген тагын да яшәртеп, булачак яңа мини-стадионга “яшел чирәм” җәелде. Менә бик тиздән эшләр төгәлләнеп, балаларны спортка кызыксындыруда стимул булырлык ике яктан ике корылма калкып чыгар.
 

15.06.16 көнне гимназиядә Казан шәһәренең гомуми һәм махсус урта белем бирүче уку йортларыннан 9нчы сыйныф укучылары килеп, соңгы сайлау имтиханнарын тапшырды. Бу юлы гимназия җәмгыять белеме фәненнән ТДИ тапшыру өчен шәһәрнең №1, №13, №51, №80, №98 санлы мәктәпләреннән, №1, №27, №96 санлы гимназияләреннән, №5, №116 санлы лицейларыннан, Христиан мәктәбе, Кадет мәктәбе, Суворов исемендәге хәрби училище һәм Хореография училищеларыннан килгән барлыгы 186лап укучыга ППЭ урынын үтәде. 17.06. 16 - резерв көн буларак билгеләнә.

Бердәм дәүләт имтиханы (БДИ) – мәктәп тәмамлаучылар өчен дәүләт аттестациясенең төп формасы. Аның нәтиҗәләре югары һәм урта махсус уку йортларына укырга керү имтиханы да булып тора. Быел гимназиябезне 10 бала тәмамлады, алар да укуларын кайсы уку йортларында дәвам итәселәрен, нинди һөнәр иясе булачакларын алдан фаразлап, мәҗбүри һәм сайлау имтиханнарына бик тырышып әзерләнде. Гимназия идарәсе тарафыннан мәҗбүри имтиханнарның берсе булган рус теленнән БДИга әзерлек барышына аеруча басым ясалды. Рус теленнән БДИ тапшырырга әзерләнү өчен махсус дәресләр дә булдырылды. Гимназия идарәсенең тырышлыгы һәм ел буена барган махсус әзерлекнең нәтиҗәләрен барлар чак җитте : БДИ күрсәткечләре – куандырырлык! Гимназияне тәмамлаучы 10 бала арасында иң югары балл- 96 булса, иң түбәне – 71 балл. Кыскасы, имтихан буенча урта күрсәткеч 86 баллны тәшкил итә. Татар гимназиясе булу бәрабәренә, рус теленнән югары күрсәткечләргә ирешкән чыгарылыш сыйныф укучыларын уңышлары белән котлыйбыз; һәм үзебезнең 11нче сыйныфлар исеменнән рус теленнән БДИга әзерлек барышының алдан хәстәрен күргән гимназия идарәсенә рәхмәтебезне белдерәбез.

12 июнь – Россия көне уңаеннан, бүген гимназиядә гимназия яны лагерена йөрүче балаларга тантаналы линейка уздырылды. Тантана актлар залында башланып, сыйныфларда кызыклы викториналар, әңгәмәләр белән дәвам итте.