9 июнь көнне 9нчы сыйныфлар чираттагы имтиханнарын тапшырды. Казанның №1, №12, №14, №98 мәктәпләре, №1, №3, №96 гимназияләре, академик һәм №5 лицейлардан, Кадет мәктәбе һәм махсус урта музыка мәктәпләреннән 9нчы сыйныфны тәмамлаучы укучылар килеп, физикадан сайлау имтиханы тотты.

Татар теленең аңлатмалы сүзлегендә «Иллюзия» сүзенә түбәндәгечә аңлатма бирелә: “тойгыларның алдавы нигезендә чынбарлыкны хаталы күзаллау, тормышка ашмаслык хыял, булмаслык эш ...”, тик шулай да кайчагында шундый тойгыларга бирелеп, хыял канатларында очып, әкияти бер дөньяда кунакта булып кайтасы килгән чаклар була... Көндәлек предметларны, күренешләрне моңарчы таныш булмаган яктан ачып биргәндә, алар белән кызыксыну арта. Башкаланың Бауман урамында сыену урыны тапкан “Алып йорты һәм Иллюзияләр музее” да шундый предметларны үзенә туплаган. Гимназия яны лагерена йөрүче балалар беркөнне “бу йортка “ сәфәр тотты.

6 июнь Россиядә Пушкин һәм Рус теле көне буларак билгеләп үтелә. Бездә дә бу истәлекле дата игътибардан читтә калмый. Бу уңайдан гимназия китапханәсендә гимназия яны җәйге лагерена йөрүче балалар өчен Пушкинның тормыш юлы һәм иҗаты буенча төзелгән викторина узды. Китапханәче Ә.Ә. Янурова Пушкин әкиятләре буенча берсеннән-берсе кызыклы сорауларын яудырып, җавапларында тапкыр булган укучыларга кулдан эшләнгән кечкенә генә бүләкләр дә тапшырды. Уздырылган викторина укучылар өчен кызыклы бер чара булу белән беррәттән, шул рәвешле аларның мәшһүр Пушкин иҗаты буенча белемнәре дә ныгытылды.

Хәтерләсәк, туган телләре рус теле булмаган укучылар өчен рус теленнән Халыкара Олимпиаданың беренчесе 2014 елда узган иде. 3 июнь көнне Казанда әлеге Халыкара Олимпиаданың чираттагысы үтте. Олимпиадада призга лаек булган һәм җиңү яулаган укучыларны 6нчы июньдә – Пушкин һәм Рус теле көнендә тәбрикләделәр. Туган теле рус теле булмаган, әмма да милли мәктәп шартларында рус телен тырышып өйрәнүче 8”Б” сыйныфы укучысы З. Зиятдинова да быелгы Халыкара Олимпиадада катнашып, призлы урынга лаек булды! Зәринәне һәм аның укытучысы Э. И. Хәбибуллинаны уңышлары белән котлыйбыз.

Июнь - төп һәм урта мәктәпләр чыгарылышлары өчен киеренке вакыт. Имтиханнар укуның тәмамлауын белгертүче соңгы аккорд булып тора. 9нчы сыйныфлар төп дәүләт имтиханнарын тапшыруларын дәвам итә. 3нче июнь көнне гимназиядә №12, №13, №51, №41 мәктәпләре, Лобачевский исемендәге һәм 5нче лицейлардан 9нчы сыйныф укучылары килеп, рус теленнән чираттагы имтиханнарын тапшырды.

2 июнь көнне гимназия яны лагерена йөрүче 60 бала (калган 30 бала Киров бакчасына юнәлде) Казан ярминкәсе мәйданында оештырылган “Балачак иле” махсус күргәзмәсенең “Без бергә” балалар иҗат фестивале ачылышының дәвамын карарга бардылар.

Балачак иленең иң истәлекле бәйрәмнәренең тагын берсе – 1 июнь - Балаларны Халыкара яклау көне. Бу көн олыларга һәрбер баланың кайгыртуга мохтаҗ икәнен искәртеп тора, чөнки үсеп килүче яшь буын – ул илебезнең киләчәге. Шушы көн уңаеннан, 2 июнь көнне Казанның Киров бакчасында Балаларны яклау көненә багышланган бәйрәм чарасы узды. Аны Вахитов районы Балалар иҗаты үзәге оештырган иде. Гимназия яны җәйге лагерена йөрүче 30 укучы бала шушы бәйрәмдә катнашса, калган 60 бала “Казан ярминкәсе” мәйданында оешкан “Балачак иле”нә юл тотты.

Балаларның җәйге ялларын файдалы һәм мавыктыргыч итеп оештыру - көн кадагындагы мәсьәләләрнең берсе. Гимназиябез яны лагеренда быел барлыгы 80 бала ял итәчәк. Ял итәргә җыенган балаларның исәбен ,нигездә, 2-6 сыйныф укучылары тәшкил итә. 

1 июнь – Балаларны Халыкара яклау көне. Ул ел саен төрле чаралар белән билгеләп үтелә. Бу көнне дөньяның барлык почмакларында балалар өчен тамашалар, концертлар, төрле бәйгеләр оештырыла. Казанда да бәйрәм чарасы берничә мәйданда узды. Балаларның иң зур төркеме Казан Кремле мәйданында булгандыр, мөгаен. Нәкъ менә биредә - “Казан Кремле” музей тыюлыгында 1 июнь көнне Бөтендөнья балаларны яклау көненә багышланган фестиваль узды. 11.00 дән алып 15.00 сәгатькә кадәр барган чара “Кремльне яратабыз!” дип аталды. Кояшның шактый кыздыруына да карамастан, мәйданга меңләгән бала җыелган иде

31нче май көнне гимназиядә 9нчы сыйныфлар чираттагы имтиханнарын тапшырды. Бу юлы Казан шәһәренең гомуми урта белем бирүче 6 уку йортыннан - №12, №13, №51, №41 мәктәпләре, Академиик һәм 5нче лицейлардан килгән 9нчы сыйныф укучылары мәҗбүри фәннәрнең берсе булган математикадан Төп Дәүләт Имтиханы(ТДИ) тапшырды. Имтихан тапшыру урыны һәрвакыттагыча ППЭ шартларына туры китереп җиһазландырылды. Аудитория эчендәге һәм аудиториядән тыш оештыручылар, техник хезмәткәрләр, җәмәгать күзәтүчеләренең ныклы игътибары астында ТДИ сәг.10.00да башланып, 3сәг.55мин. дәвам итте. Имтихан барышында тәртип бозулар күзәтелмәде.