Кан алдыру, сөлек салдыру... кан тапшыру?! Беренчеләре традицион медицина ысулларына карамаса да, соңгысы – кан тапшыру – традицион медицинада актив кулланылып та, һәркемнең дә хәленнән килми торган игелекле гамәл. Безнең илдә бу игелекле гамәлне даими башкара торган кешеләр бар. Алар – донорлар. 20 апрель – Донорлар көне булуын истә тотып, бүгенге тормыш иминлеге дәресләре гимназиянең медик хезмәкәрләре катнашында узды.

9нчы май көнне гимназия укучылары Бөек Җиңүнең 71 еллыгына багышланган "Үлемсез полк" акциясенә чыгарга әзерләнә.Акция сугыш ветераннарын хөрмәтләү, алар үткән данлы юлларны искә төшерү максатыннан үткәрелә. Әлеге акциядә гимназиядән 85 укучы катнашыр дип көтелә.Бүгенге көндә укучылар, укытучылар белән берлектә,"Үлемсез полк" йөреше вакытында алгы сафларда барачак бабаларының, сугыш кырында һәлак булган туганнарының фотопортретларын әзерләү белән мәшгуль. Дан Сезгә, хөрмәтле сугыш ветераннары һәм үлемнәре белән үлемсезлек яулаган солдатлар! Безнең арада булмасагыз да, без Сезне хәтерлибез!

Бүген укучылар “Тукай айлыгы” белән беррәттән, 19нчы апрель - «Игелекле кино көне» дә булганга икеләтә куанып, актлар залында “Тукай” фильмын карадылар.

16нчы апрельдән башлап бездә “Язгы изгелек атнасы” башланып китте. Атналыкның төп максаты – гимназия укучыларын, бигрәк тә, урта һәм өлкән сыйныф укучыларын изге эшләргә тартырга, төрле иҗтимагый мәгьнәле проблемаларны чишәргә җәлеп итү. Беренче көн - “Яхшы гамәлләр көне” дип исемләнде. Бу көнне урта сыйныф укучылары Яңа бистә Татар зиратына барып, каберләрне чистартып, көзге яфраклардан арындырып кайттылар. Өлкән сыйныф укучылары исә гимназия мәйданына чыгып, язгы өмәгә кушылдылар. Эшләр төгәлләнгәч, гимназия президенты Т. Озяйкин укучыларны җыеп, ял көнендә агач утыртачагын сөйләде һәм калганнарны да бу изге гамәлгә өндәде.

17нче апрель «Язгы сулыш” исеме астында язгы һаваның кеше сәламәтлегенә булган йогынтысы хакында сүз барды. Укучылар “Яшьләр бакчасы”на чыгып, кызыксынган һәрбер кешене “Язгы сулыш” акциясенә кушылырга чакырды. Катнашучыларга укучылар сәламәтлек һәм изге гамәлләр турында мәкальләр язылган шарлар өләште.

18 нче апрель “Дуслык көне” дип билгеләнде. Дуслык темасына багышланган рәсемнәр күргәзмәсе һәм төрле халыкларның милли киемнәреннән презентацияләү чарасы, халыклар дуслыгын чагылдырган төрле викториналар оештырылды.

«Кегль – ринг: квадро» номинациясендә робототехника буенча уздырылган “Сумо” шәһәркүләм II ярышында 1нче урынны яулап, 1нче дәрәҗә дипломга лаек булган гимназия командасын – Е. Алигулиева, Ч . Хәбибуллин һәм җитәкчеләре Р.Р. Баһаутдинованы җиңүләре белән котлыйбыз!

Шимбә көнне укучылар бик теләп  язгы өмәдә катнашты: озак вакытка сузмыйча, гимназия мәйданы “ялт” итте. Көзге яфраклардан арынгач, мәктәпнең әйләнә – тирәсе чистарып, сафланып калды. Шулай итеп, укучыларны хезмәттә тәрбияләү, хезмәт дәресләренә генә кайтып калмыйча, өмәләр үткәрү белән дә ныгытыла.

15 апрель - бөек Тукайның фанилыктан бакыйлыкка күчкән көне. Ә безнең гимназиядә бу көн, традиция буларак, Яңа бистә Татар зиратына барып, Тукайның һәм башка татар зыялыларының каберләрен зыярәт кылып, искә алып кайту көне буларак каралган. Менә бүген дә традицияне саклап, гимназия укучылары Тукай каберенә сәфәр кылып кайтты. Башта бер минут тынлык белән Тукайны искә алды укучылар. Аннан шагыйрьнең дөньяга килгән, бакыйлыкка күчкән вакытлары , халыкның Тукайны ни рәвешле соңгы юлга озатуы һ.б. хакында сөйләп, татар теле һәм әдәбияты укытучысы Э. Р. Хөснетдинова балаларның хәтерләрен яңартты.

“Тукай айлыгы” уңаеннан оештырыла торган чаралар дәвам итә. Берничә көн алдан Тукай иҗатын күңелдән уку буенча һәр аерым сыйныф эчендә ярыш игълан ителгән иде. Һәр сыйныфтан(5-10кл) җыелган “Иң шәп нәфис сүз осталары” бүген гимназия күләмендә Тукай иҗаты буенча үткәрелгән “Шигырь бәйрәме” бәйгесендә катнашты. Тукай иҗаты татар, рус, инглиз телләрендә яңгырады. Бәйге ахырында гадел жюри әгъзалары тарафыннан урыннар билгеләнде.

Быел дүртенче тапкыр «Илһам» бөтенроссия яшь язучылар, шагыйрьләр, драматурглар бәйгесе үткәрелде. Бәйгене Татарстан Республикасы мәгариф һәм фән министрлыгы Татарстан Республикасы язучылар берлеге, Казан (Идел буе) федераль университеты белән берлектә үткәрә. Быел Татарстанда һәм Россиянең төрле төбәкләрендә яшәүче яшь иҗат көчләре «Илһам» бәйгесенә 2800 эш тәкъдим иткән. Шуларның өч йөзе – җиңүчеләр һәм лауреатлар – 12 апрель көнне Пирамида мәдәни күңел ачу комплексында уздырылган бәйрәмдә катнашты. Алар арасында безнең гимназиянең 3 укучысы да бар иде.

12 апрель - Космонавтика көне уңаеннан, гимназиянең мөхтәрәм укытучысы, Ю.А. Гагаринның үзен күрү бәхетенә ирешкән, беренче космонавт белән кул биреп күрешкән шәхес, физик Н. Г. Гыймадиев укучыларга актлар залында “Галәмдә-кеше!” дип аталган лекция сөйләде. Лекциянең максаты - укучыларның космос турындагы күзаллауларын киңәйтү; логик фикерләүләрен, хәтер һәм дикъкатьләрен үстерү; космонавтика өлкәсендәге белгечләргә хөрмәт хисе тәрбияләү иде.