Мәгълүмати куркынычсызлыкны тәэмин итү кысаларында, башлангыч сыйныф укучылары арасында “Минем дустым — интернет” дигән рәсем бәйгесе узды. Интернет - ул кызыклы һәм мавыктыргыч дөнья, ул безгә кызыклы дөньяны белергә, дөньяның төрле почмакларында яшәүче кешеләр белән аралашырга, кызыклы уеннар уйнарга мөмкинлек бирә. Укучылар рәсемдә интернет челтәренең файдалы якларын сурәтләделәр.

Хәзерге вакытта интернет челтәре киң таралыш алды. Әлбәттә, интернет күп кенә эшләрне җиңеләйтте. Әмма уңай якларыннан тыш, аның күп кенә тискәре яклары да бар икәнен онытырга  ярамый. Шул уңайдан, 5 нче сыйныфларда “Интернет челтәрендә эшләү кагыйдәләре” дип аталган дәрес узды. Әлеге дәрестә укучылар интернет челтәрендә үз-үзеңне тоту кагыйдәләре белән таныштылар, интернетның зыяны hәм файдасы турында мәгълүмат алдылар. Укучылар тәкъдим ителгән материалны зур кызыксыну белән тыңладылар, фикер алышуда актив катнаштылар.

Бүген гимназиядә “Славян халыкларының туганлыгы” дип аталган батырлык дәресе үтте. Россия, Белоруссия – бу бөтенләй төрле илләр, халыклар һәм мәдәният дигән фикер яши. Тик әлеге илләр чикләр белән бүленсә дә, алар арасында элемтә күпкә ныклырак. Дәрес барышында укучылар, китерелгән мисаллар ярдәмендә, бу илләрнең мәдәниятләре охшаш икәнлегенә инандылар. Алар төрле биремнәр үтәделәр, сорауларга җавап бирделәр һәм әлеге ил халыкларының мәдәниятендә, телендә, рәсем сәнгатендә, тарихында уртак якларын таба алдылар.

Тиздән илебез язның беренче һәм иң күркәм бәйрәме - Халыкара хатын-кызлар көнен бәйрәм итә. Шул уңайдан, гимназиядә радиоконцерт оештырылды. Көн дәвамында  радиодан, укытучыларга һәм укучы кызларга багышлап,  матур котлау сүзләре һәм җырлар яңгырады.

Халыкара хатын-кызлар көненә багышлап, башлангыч сыйныф укучылары арасында “Бәйрәм белән, кадерле әнием!” дип аталган бәйге үтте. Укучылар үз куллары белән әниләренә котлау открыткалары ясадылар. Аларның һәрберсе үзенчәлекле, балаларның күңел җылысын салып ясалган иде.

Рус теле һәм әдәбияты ункөнлеге кысаларында, бүген 5 нче А һәм В сыйныфы арасында “Морфемика һәм Орфография иленә сәяхәт” уены узды. Сыйныфлар төркемнәргә бүленеп, кызыклы биремнәр үтәделәр. Уенда җанатарлар да бик актив булдылар. Нәтиҗәдә, ике төркем дә тигез баллар җыйды. Уенда дуслык җиңде.

Гимназиядә финанс грамоталыгы буенча онлайн-дәресләр дәвам итә. Чираттагы дәрес “Нигә финанс яктан белемле булырга?” дип аталган темага үтте. Дәрес барышында укучылар финанс яктан  белемле булуның тормышта әһәмияте зур икәнлегенә төшенделәр. Финанс яктан белемле булу дөрес карарлар кабул итәргә ярдәм итүен һәм шул рәвешле, кешенең финанс куркынычсызлыгын арттырырга сәләтле икәнлеген белделәр.

2 нче март көне 6 нчы сыйныф укучылары функциональ грамоталылыкны формалаштыру максатыннан, Татарстан Республикасының мәгариф һәм фән министрлыгының 2022 нче елның 7 нче феврале боерыгы нигезендә, диагностик тест биремнәре башкардылар.

Шушы көннәрдә “Гимназия хәбәрләре” электрон газетасының февраль ае саны дөнья күрде. Газетаның әлеге санында сез кызыклы сәхифәләр белән таныша аласыз. Мәсәлән, “Һөнәр сайлаганда” сәхифәсендә киләчәктә актуаль булачак һөнәрләр турында мәгълүмат бирелгән, ә “Каурый каләм”дә 8 нче Б сыйныфы укучысы иҗат иткән тирән мәгънәле хикәя урын алган. “Сабыйга” һәм “Ял иткән арада” сәхифәләрендә тәкъдим ителгән башваткычларны чишеп, сез вакытыгызны күңелле итеп үткәрә аласыз. Газетаның февраль ае саны белән  https://gazeta.tgim1.ru/92 сылтамасы аша таныша аласыз.

Рус теле һәм әдәбияты ункөнлеге кысаларында узучы радиотапшырулар дәвам итә. Бүгенге чыгарылыш Май чабу (Масленица) бәйрәменә багышланган иде. Укучылар әлеге бәйрәмнең тарихы һәм бәйрәм белән бәйле кызыклы фактлар белән таныштырдылар.