Гимназиядә ничә еллар “Бөек Ватан сугышы минем гаиләм тарихында” проекты эшләп килә. Гражданлык-патриотик тәрбия бирү айлыгы кысаларында, проект өстендә эш быел да дәвам итте. Проектның максаты - укучыларны Бөек Ватан сугышында катнашкан туганнарының батырлыклары белән якынрак таныштыру, аларга карата хөрмәт хисе тәрбияләү.

8Б сыйныфы укучылары “Романовлар” мультимедиа экспозициясендә булдылар. “Казан ярминкәсендә” узган чарада, бер сәгать эчендә, укучыларны Романовлар нәселенең 300 еллык тарихы белән таныштырдылар. Интерактив җайланмалар, мультимедиале экспозицияләр укучыларга бик ошады. Макетларда сугышларның ничек барганын, патша сарайларын, шул елларда уйлап табылган әйберләрне, илдә булган вакыйгаларны үзең кереп карарга, тылсымлы китаплар белән үзең идарә итәргә мөмкин иде.

Шушы көннәрдә гимназиядә Парламент дәресе үтте. Дәреснең кунагы Татарстан Республикасының халык артисты, Габдулла тукай исемендәге Дәүләт премиясе лауреаты, Дәүләт Советы депутаты Рамил Чыңгыз улы Төхвәтуллин иде. Ул укучыларга дәүләт һәм мәдәниятыбыз турында файдалы мәгълүмат бирде. Укучылар шулай ук үзләрен кызыксындырган сорауларга да тулы җавап ала алдылар. Очрашу бик җанлы, нәтиҗәле һәм кызыклы үтте. Мондый очрашулар соңгысы булмасын иде дигән теләктә калабыз.

Бүген мәктәп радиосы эфирында 8 нче Б сыйныфы укучылары чыгыш ясады. Алар сыйныфлар рейтингы, үткән атна вакыйгалары һәм бу атнада узачак чаралар белән таныштырдылар. Илебез буенча авыру көчәю сәбәпле, гимназиянең кайбер сыйныфлары карантинга ябылырга мәҗбүр булды. Тик шул авыр чорда да укуларын тулы составта дәвам иткән сыйныфлар да юк түгел. Бүгенге эфирга шундый сыйныфларның берсе - 6 нчы сыйныф укучылары әңгәмәгә чакырылган иде. Укучылар авыруны кисәтү һәм саклану чаралары турында фикер алыштылар, сәламәтлекне ныгыту буенча киңәшләр бирделәр.

Гимназиядә һәрдаим һөнәри юнәлеш бирү буенча төрле чаралар уздырылып тора. Бүген 3 нче В сыйныфында “Минем булачак һөнәрем”  дип аталган сыйныф сәгате үтте. Укучылар төрле һөнәр ияләре турында фикер алыштылар. Киләчәктә үзләренә нинди һөнәр туры килүен күзаллап, рәсемдә сурәтләделәр.

2 февраль көне илебез Сталинград сугышында Совет гаскәрләренең зур җиңү көнен билгеләп үтә. Шул уңайдан гимназиядә Сталинград сугышында җиңүгә 79 ел тулуга багышланган радиоэфир үтте. Укучылар 200 көн һәм төн дәвам иткән сугышның мөһим вакыйгаларын искә алдылар, безгә җиңү алып килгән бабаларыбызның батырлыклары турында сөйләделәр.

Гражданлык-патриотик айлык кысаларында гимназиядә төрле чаралар уздырыла. Сыйныф сәгатьләрендә Бөек Ватан сугышына багышланган бишминутлыклар оештырыла. Әлеге чараларның максаты - укучыларга патриотик тәрбия бирү; ата-бабаларыбызның Бөек Ватан сугышы елларында күрсәткән батырлыклары, тырыш хезмәтләре белән таныштыру; сугыш һәм тыл ветераннарына олы хөрмәт хисе уяту.

Бүген 7 нче Б сыйныфы укучылары “Черек күл” мәдәният һәм ял паркы базасында узучы А.В.Тарасов исемендәге “Алтын алка” яшь хоккейчылар клубы Бөтенроссия ярышларының шәһәр этабы ачылу тантанасында булып кайттылар.

Гимназиядә гражданлык-патриотик тәрбия бирү айлыгы башланып китте. Айлык кысаларында, сыйныфларда Ленинград блокадасы өзелүгә 78 ел тулуга багышланган сыйныф сәгатьләре үтте. Укучылар ул елларның авыр көннәре, барлык авырлыкларга түзеп, үлемне җиңгән батырлар турында фикер алыштылар, видеороликлар карадылар.

"Гимназия хәбәрләре" электрон газетасының 2022 нче елгы беренче саны дөнья күрде. Әлеге санда кызыклы мәгълүматлар урын алган. Гимназия тормышы, укучыларның уңышлары һәм, гомумән, гимназиядә укучы талантлы балалар турында газета битләрендә,  https://gazeta.tgim1.ru/91 сылтамасы  аша таныша аласыз.