Табигать фәннәре ункөнлеге кысаларында 5 нче А сыйныфында биология фәне буенча “Үсемлекләр дөньясында” дип аталган проект эшләреннән күргәзмә оештырылды. Проект эшләрендә дару үләннәре турында да, чәчәкләр турында да кызыклы һәм файдалы мәгълүматлар тупланган.

Бүген шулай ук 2 нче Б сыйныфында да Ленинград блокадасы өзелүгә 78 ел тулуга багышланган сыйныф сәгате үтте. Укучылар Ленинград блокадасы турында күп мәгълүматлар белделәр. Алынган мәгълүматлардан чыгып, Ладога күле аша салынган миллионлаган кешенең гомерен саклап калган “Тормыш юлы”н рәсем дәфтәрләрендә сурәтләделәр.

27 нче гыйнвар – Бөек Ватан сугышы тарихында зур әһәмияткә ия булган көн. 1944 елның нәкъ шушы көнендә, Ленинград блокадасы өзелеп, шәһәр фашистлардан азат ителә. Шул уңайдан 5 нче А сыйныфында сыйныф сәгате үтте. Сыйныф сәгате барышында укучыларга Ленинградта яшәүчеләр кичергән авырлык-михнәтләр турында һәм  блокада  елларында Ленинград халкы күрсәткән тиңдәшсез батырлыклар  турында мәгълүматлар җиткерелде.

2022 елның 27 гыйнварында Кызыл Армия солдатларының Освенцим концлагеры тоткыннарын азат итүләренә 77 ел тула. Әлеге көн Халыкара Холокост корбаннарын искә алу көне дип игълан ителгән. Шул уңайдан гимназиянең 6 нчы А, 6 нчы В, 10 нчы А сыйныфларында батырлык сәгатьләре үтте. Батырлык сәгатендә укучылар тематик презентация, видеофильм белән таныштылар, алар ярдәмендә укучылар үлем лагерьларында балалар һәм өлкәннәрнең нинди авырлыклар, куркыныч хәлләр аша үтүләре турында фикер алыштылар.

1944 нче елның 27 гыйнвары – Ленинградның камалыштан чыккан көне. Бөек Ватан сугышы тарихындагы бөек вакыйгага быел 78 ел тула. Шул уңайдан гимназиядә “Блокада икмәге” дип аталган сыйныф сәгатьләре үтә. Сыйныф сәгатьләренең максаты – укучыларны авыр сугыш еллары, Ленинград блокадасы вакыйгалары белән таныштыру, икмәккә хөрмәт, туган илгә мәхәббәт тәрбияләү. Укучылар Ленинград блокадасы турында презентацияләр, видеофильмнар карадылар, шул елларда зур батырлык күрсәткән балаларны искә алдылар. Ул елларның авырлыгын сөйләп кенә аңлатып булмый, тик шулай да безнең ул турыда онытырга хакыбыз юк. Без һәрвакыт, безгә матур тормыш бүләк иткән, батырларны искә алырга тиеш.

Бүген  5 нче А сыйныфында география фәне буенча ярыш узды. Укучылар төркемнәргә бүленеп бер-берсе белән көч сынаштылар, кызыклы биремнәр үтәделәр, анаграммалар чиштеләр, шаян сорауларга җавап бирделәр.  Шулай ук бирелгән рәсемнәр буенча географик объектларны билгеләделәр.

Табигать фәннәре ункөнлеге кысаларында “Савытка икенче гомер бир” исемле күргәзмә оештырылды. Күргәзмәдә ташландык материаллардан ясалган эшләнмәләр урын алды. Алар арасында төрле-төрле уенчыклар, савытлар, чәчәкләр, матур композицияләр бар иде.

8 нче А сыйныфында Ленинград блокадасы өзелүгә 78 ел тулуга багышланган сыйныф сәгате үтте. Ленинград блокадасы тарих битләренә Бөек Ватан сугышының иң куркыныч, кара көннәре булып кереп калды. Сыйныф сәгатендә укучылар Ленинград шәһәре блокадасы тарихы белән таныштылар. Шулай ук видеофильмнан шушы куркыныч көннәрнең шаһитлары булган балаларның истәлекләрен карадылар.

Табигать фәннәре ункөнлеге кысаларында 6 нчы А сыйныфында география фәне буенча интеллектуаль уен үткәрелде. Укучылар төркемнәргә бүленеп, төрле башваткычлар чиштеләр, контурдан географик объектларны таптылар. Нәтиҗәдә “Төз укчылар” командасы җиңү яулады.

Гимназиябездә “Финанс грамоталыгы буенча онлайн-дәресләр” проекты кысаларында дәресләр үткәрү дәвам итә. Чираттагы дәрес 9 нчы сыйныфта үтте. Әлеге дәрес “Банк картасы белән түләү һәм акча эшләү” темасына багышланган иде. Дәрес барышында укучылар банк карталарының төрле төрләре, түләү системалары, банк карталарыннан файдалануның өстенлекләре белән таныштылар. Аеруча банк карталарыннан файдаланганда куркынычсызлык кагыйдәләренә игътибар күрсәтелде.