Укучыларыбызга 2020 нче елда яңа газета - журналлар килә башлады. Бүген укучыларыбыз белән “Көмеш кыңгырау” газетасына күзәтү ясадык. Газетада басылган укучылар иҗаты белән таныштык. Равилә Шәйдуллина шигырьләре аеруча ошады. Газетаның беренче битендә баш мөхәррир Ризидә Гасыймова  түбәндәге юлларны язган: “Без тарих китабының бер битен язучылар. Кичәге көнне иртәгесе белән бәйләүчеләр, татар телен, рухын, тапшыручылар да  эле без.”

   13 нче гыйнвар көнне мәктәбебездә ата-аналар җыелышы булып узды. Җыелышта 2019-2020 нче уку елының 1 нче яртысына йомгак ясалды, ирешкән уңышлар һәм кимчелекле яклар анализланды һәм “Гаилә – бала тормышында шәхси тәрбия алу мөхите” дигән темага доклад тыңланды. Җыелышның калган өлеше классларда, предмет укытучылары катнашында дәвам итте.

    Каникул көннәрендә мәктәбебез укучылары шашка буенча район бәйгесендә катнашып кайттылар. Мәктәп командасы 2 нче урынга лаек булды. Аларга киләчәктә уңышлар телибез!

     Бүген,10 нчы январь көнне,мәктәптә педагогик киңәшмә булып узды. Киңәшмәдә беренче яртыеллык буенча чирек нәтиҗәләре, тикшерү эшләренә әзерлек һәм авыр үзләштерүче укучылар белән эшләү алымнары буенча чыгышлар тыңланды, нәтиҗәләр ясалды, алдагы чиреккә бурычлар билгеләнде.

     8 нче гыйнвар көнне мәктәбебез укучылары туризм буенча район бәйгесендә катнашып, 3 нче класс укучысы Гобәев Р. 4 нче урынга, 5 нче класс укучысы Гарипов Ә. 4 нче урынга, 9 нчы класс укучысы Сафин И. 2 нче урынга лаек булдылар. Аларга киләчәктә уңышлар телибез!

    Кышкы каникулның соңгы көннәренә аяк басабыз. Тиздән янәдән укулар башланыр. Тик әлегә укучыларыбыз рәхәтләнеп ял итәләр. Ялларын күңелле һәм файдалы итеп үткәрү максатыннан төрле кызыклы чаралар үткәрелеп тора.  9 класс укучылары консультацияләргә, спорт яратучылар төрле ярышларга йөриләр. Ә кемнәрдер башка шәһәрләргә, башка районнарга сәяхәт итәргә дә өлгерәләр. Мәктәбебез дә ялларда балалар шавыннан тынып тормый күңелле чаралар белән гөрләп үз эшен дәвам итә. 

Каникулның һәр көне сизелмичә үтеп бара. Безнең мәктәп укучылары ялларын файдалы һәм кызыклы итеп үткәрәләр. Чана, чаңгы шуалар, саф һавада рәхәтләнеп күңел ачалар.

Урам матур, чип-чиста,

Уйнавы рәхәт тышта.

Тәгәрәшеп тау шуабыз

Рәхмәтләр әйтеп кышка. 

       Кышкы каникуллар укудан ял итәргә, якыннарың белән очрашырга, төрле кызыксынуларың белән шөгыльләнергә мөмкинлек бирә. 

       Балаларыбыз гаиләләре белән күңелле дә, файдалы да сәяхәтләргә барып торалар. Башкалабызның иң матур чыршысын карап, яңа ачылган зоопаркта булып, Арчабыздагы балалар өчен оештырылган Кыш бабайның мастер-классында катнашып, күңел ачалар.

   Кышкы каникулларда имтиханнарга әзерлек тулы көченә дәвам итә. 9 нчы класс укучылары төп дәүләт имтиханнары биреләсе фәннәр буенча консультацияләргә йөриләр,сынап карау эшләрен башкаралар. Бүген шуларның чираттагысы география буенча үтте.

Декабрь бураннары алып килгән Яңа ел белән котлыйбыз! Бәхетле мизгелләр, матур вакыйгалар, яхшы хәбәрләр, саулык-сәламәтлек алып килсен Яңа 2020 нче ел.  Эшләрегез уң булсын,  күңелегездәге мәрхәмәтлелек нуры йөзегезне тагын да  бизәсен.  Бусагаларыгыздан караңгылык, салкынлык, хәвеф-хәтәр атлап кермәсен, бәла-каза  йөрмәсен.