Чираттагы директор яны киңәшмәсе Дусым филиалындагы укыту-тәрбия эшенә, мәктәптәге патриотик тәрбиягә һәм балигъ булмаган балалар арасындагы травматизмга багышланган иде. 

Февраль ае оборона-масса айлыгы буларак билгеләнеп үтә. Әлеге айлык кысаларында мәктәбебездә төрле чаралар, патриотик кичәләр уза. Шушы агымда 8 нче сыйныф укучылары сыйныф җитәкчеләре Сөнгатова Гөлнара Зөлкәрь кызы белән ачык тәрбия сәгате күрсәттеләр. 

Оборона - масса айлыгы кысаларында ТИН укытучысы Зарипов Булат Абдуллович укучылар белән төрле хәрби-патриотик чаралар үткәрә. 8 - 11 нче сыйныф укучылары арасында мылтыктан ату буенча ярыш оештырылды. Егетләр арасында 10 нчы сыйныф укучысы Хабибуллин Айназ - беренче, 11 нче сыйныф укучысы Борһанов Айваз икенче, 8 нче сыйныф укучысы Батыршин Рәзил өченче урынны яуладылар. Әлеге ярыштан кызларыбыз да читтә калмадылар. 10 нчы сыйныф укучылары Садриева Энҗе - беренче, Галиәхмәтова Дилә - икенче һәм өченче урынны 8 нче сыйныф укучысы Василова Лилия алды. 

Мәктәбебез базасында урнаштырылган хоккей мәйданчыгында төрледән төрле спорт ярышлары уза. Чираттагысы 5 команда арасында Әфганистанда хәрби хезмәт үтәгәндә һәлак булган Күшәр авылы егете Зөлфәт Хәйруллин призына хоккей ярышы. Нәтиҗәдә, Күәм командасы - беренче, Бәрәскә - ике һәм Күшәрләр өченче урынны яуладылар. 

Хөрмәтле ир-егетләребез!

   Сезне чын күңелебездән Ватанны саклаучылар көне белән котлыйбыз.

Сезгә һәм гаиләләрегезгә тыныч күк йөзе, ныклы сәламәтлек, бәхет, муллык , һәр эшегездә уңышлар телап калабыз.

                                                                                   Сез безнең күңелгә мәңгелек ышаныч!

                                                                                   Сез көчле ,сез батыр,сез—безнең куаныч!

                                                                                   Сез—алтын багана, гаиләдә сез --терәк !

                                                                                   Тынычлык-иминлек сагында сез кирәк !

"Ватанны саклаучылар көне" уңаеннан 8 - 11 нче сыйныф егетләре арасында "Ягез әле, егетләр!" бәйгесе узды. Егетләр үзләрен интеллектуаль конкурсларда, спорт ярышларында һәм хуҗалыкта башкарыла торган эшләрдә сынап карадылар. Нәтиҗәдә, 8 нче сыйныф егетләре  - өченче, 9 нчы сыйныфлар - икенче һәм 10-11 нче сыйныф егетләре командасы беренче урынга ия булдылар. 

22 февраль көнне Күәм авыл китапханәсе тарафыннан,"Туган телем−иркә гөлем, киңдер сиңа күңел түрем" исемле интелектуаль бәйге үткәрелде. Бәйгедә 5 нче сыйныфның "Сөембикә оныклары" һәм 6 нчы сыйныфның "Тукай варислары " командалары тапкырлыкта-зирәклектә көч сынашты. Ярыш 6 турдан торды, һәр тур кызыклы һәм мавыктыргыч ике-өч уенны үз эченә алды. Һәр ике команда да уңышлы чыгыш ясады, аларга грамоталар һәм бүләкләр тапшырылды. Кичә бергәләп "Туган тел" җырын башкарып тәмамланды. Чарада 18 укучы, 2 укытучы катнашты. Чараны китапханәче Вафина Луиза Р. әзерләде һәм үткәрде.

15 февраль шагыйрь фронтовик Муса Җәлилнең туган көне. Башлангыч сыйныф укучылары бөек шагыйрьне искә алу кичәсе уздырдылар. Алар Муса Җәлилнең шигырьләрен сәнгатьле сөйләделәр, сәхнәләштерделәр. 

21 февраль - "Туган тел көне". Әлеге бәйрәм безнең мәктәбебездә зурлап үткәрелде. Тәнәфес вакытында туган телебездә иҗат ителгән җырларны тыңладык, укучыларыбызның иҗат җимешләре белән танышу йөзеннән күргәзмә оештырдык, ә 5 - 7 нче сыйныф укучылары сәнгатьле сөйләү бәйгесендә катнаштылар. 

Февраль ае патриотик тәрбия айлыгы буларак билгеләнеп үтә. Мәктәбебздә шул исәптән тәрбия сәгатьләре, герой-шагырьләрне искә алу кичәләре, Әфганчылар белән очрашулар үткәрелә. Ә башлангыч сыйныф укучылар исә әтиләре, бабайлары, абыйларына бәйрәм открыткалары ясыйлар.