Ватанны саклаучылар көне уңаеннан, әтиләребезгә чын күңелдән бәйрәм ясадык. Үзләренә багышланган шигырьләрне тыңлап утырган әтиләребезнең елмаюы безне дәртләндерде. Бергәләп "Солдатта булган диләр"  җырын җырладык; солдат тормышын, хезмәтен сурәтләгән биюләр биедек һәм үз кулларыбыз белән йөрәк җылысын кушып ясаган открыткалар бүләк иттек.

Бәйрәм белән барлык әтиләрне, абый-бабайларны, малайларны котлыйбыз! 

Нәниләр төркемендә бәйрәм уңаеннан "Әтием - горурлыгым" исемле бәйрәм иртәсе узды. Нәниләр әтиләрен үзләренең җырлары, биюләре, шигырьләре белән сөендерделәр. "Төлке белән Каз" әкиятен уйнаулары әтиләр бәйрәмен тагын да ямьләндерде.

Бүлмә гөлләренең кеше тормышында гаять зур әһәмияткә ия булуларын максат итеп, зурлар һәм мәктәпкә хәзерлек төркемнәрендә "Бүлмә гөлләре" проекты эшләде. Балалар гөлләрне вегетатив үрчетергә, тәрбияләргә өйрәнделәр. Төркемдә гөлләр утырттылар. Тәрбияче Раилә Мөхәммәтфатиховна, гөлләр яшел яфракка күмелеп шау чәчәк атсыннар өчен, элек әбиләребез кулланган файдалы киңәшләр белән таныштырды. 

Нәниләр төркемендә тәрбияләнүче балалар әтиләрен бәйрәм белән котлап, үзләреннән өлеш керттеләр. Бәйрәмнәр мөбәрәк булсын!

Кечкенәләр һәм уртанчылар төркеме балалары үз куллары белән әтиләргә бүләк ясадылар.

"Ел тәрбиячесе - 2017" конкурсында район буенча III урынга лаек булган тәрбиячебез  Хөсәенова Гөлфия Хәйдәровна Республика зона этабында матур чыгышы белән сөендерде. Аңа алга таба да уңышлар телибез.

15 февраль - Муса Җәлилне искә алу көне. Балаларда бөек шагыйребез, татар халкының герой улына ихтирам, иңатына кызыксыну уяту максатыннан бүген нәниләр төркеме балалары белән сөйләшү үткәрелде. 

Балаларда төрле һәнәр кешеләренә һәм әтиләр хезмәтенә карата кызыксыну уяту максатыннан бүген нәниләр төркеме балалары әтиләр һөнәренә кагылышлы сюжетлы рәсемнәр карадылар. 

Милли сыйфатлар формалаштыру - тәрбия бирүнең әһәмиятле өлеше. Нәниләр төркеме балалары тәрбияче апалары белән милли сыйфатларны ачыклап, түбәндәге нәтиҗәгә килделәр: татар халкының гореф-гадәтләрен, йолаларын тану һәм үтәү; үз милләтеңнең тарихын белү, аны саклау һәм хөрмәт итү.

Зурлар төркемендә тәрбияләнүче Корбанова Зифа, Балтач районында Ренат Закиров призына 1-2 нче сыйныфлар өчен оештырылган рус шашкасы ярышында II урынны яулап, грамота белән бүләкләнде. 4-5 нче февраль көннәрендә Казанда мәктәпкәчә яшьтәге авыл шахматчылары арасында үткәрелгән шахмат ярышында I урынга  лаек булды һәм грамота алды. Зифа бар якка да өлгерә: бакчадан кайткач Кукмара боз сараена фигуралы шууга бара, район бию түгәрәгенә йөри. Афәрин, Зифа!