Корбан гаете уңаеннан Бөрбаш балалар бакчасында зур чара үткәрелде. Кадерле кунагыбыз Җәлил хәзрәт Фазлыев бакчада тәрбияләнүче 40 балага күчтәнәчләр тутырылган пакет өләште. Бу изге эше өчен аңа зур рәхмәтебезне белдерәбез.

Корбан гаете - мөселманнарның иң кадерле һәм күркәм бәйрәмнәренең берсе. Бу бөек бәйрәмнең эчтәлеге кешеләр мәнфәгатен кайгырту, аларны ярату һәм ярдәм кулы сузуга нигезләнгән. Безнең Бөрбаш балалар бакчасында әлеге бәйрәм әбиләребезне кунакка дәшеп,  балаларның бәйрәм уңаеннан әзерләнгән чыгышлары белән үтте. Җәлил хәзрәт Фазлыев бакчабызга бәрәкәт, күңелләребезгә иман нуры, иминлек, тынычлык, авыр эшебездэ сабырлык,унышлар теләде. 

Бу атнада зурлар һәм мәктәпкә әзерлек төркемендә "Куркынычсызлык" проекты буенча, кеше тормышы өчен куркыныч ситуацияләр турында әңгәмәләр үтте. Үз һәм тирә-яктагыларның тормышы өчен уяу булырга, кагыйдәләрне дөрес үтәргә кирәклеге турында искәртелде. Террорчылыкка каршы рәсем күргәзмәсе оештырылды. 

Бүген Бөрбаш балалар бакчасында "Куркыныч" сүзенең мәгънәсен аңлату максатыннан, нәниләр төркеме тәрбиячесе Гөлнур Самигулловна балаларга "ярый -ярамый" сүзенең төшенчәсен аңлатты.

ТНВ каналының "Халкым минем" тапшыруы хәбәрчеләре безнең авылда кунакта булды. Авылның күренекле кешеләре белән беррәттән, алар бакчабызны да, анда тәрбияләнүче балаларны да  төшерделәр.  Мөдиребез Розалия Харисовна бакча тормышы белән таныштырды, зурлар төркемендә тәрбияләнүчеләр кунакларны "Әссәләмәгәләйкүм" җыры белән каршылады, аннан соң "Салават" әйтелде,  нәниләр төркеме тәрбиячесе Гөлфия Хәйдәровна балалар белән саф һавада уеннар оештырды. 

Түгәрәккә бас тизрәк,

Биеп алыйк без әзрәк.

Уйнап-көлеп, җырлап-биеп

Үсеп җитик без тизрәк!

Иртән уянып, сөенеп-көлеп,

Ашыга-ашыга бакчага килдек.

Сәламләштек без, аннан күрештек,

Елмаешып бергә тезелдек. 

Бакчабыз мөдире Розалия Харисовна "Мәктәпкәчә белем бирүнең нәтиҗәле муниципаль моделен формалаштыру: тәҗрибә һәм перспективалар" темасына август киңәшмәсендә чыгыш ясады. 

Балаларда көндәлек хәрәкәт эшчәнлегенә ихтыяҗ формалаштыруны җәйге саф һавада сәламәтлек сукмагында дәвам итәбез. Сәламәтлек сукмагында йөргәндә балаларның табан астына алган массаж акыл эшчәнлегенә, сөйләм үсешенә, хәрәкәт координациясенә, гәүдә тотышына күп файда бирә. Ихтыяр көче, сабырлык, кыюлык, мөстәкыйльлек  кебек сыйфатлар тәрбияләнә; иптәшләре алдында җаваплылык хисе тоярга да өйрәнәләр.