22 нче декабрь көнне 7 -11 класс укучыларының Яңа ел маскарады булды. Укучылар Кыш бабайга үзләренең һөнәрләрен күрсәттеләр. Бәйрәм кызыклы маскаларга, җыр-биюләргә бай булды. Шулай ук уеннар да маскарадка ямь өстәде. Бәйрәмне оештырган 10 нчы класс укучыларына һәм җитәкчеләре Гөлнара Тәлгатовнага рәхмәт белдерәбез.

23 нче декабрь көнне 1- 6 нчы сыйныф укучыларының Яңа ел маскарады булды. Бәйрәм чын кышкы сихри әкияткә охшаган иде. Бик күңелле узды.

21 нче декабрь көнне В.Н.Хайруллина 6 нчы сыйныфта татар теленнән ачык дәрес күрсәтте. Алар “Фигыль төркемчәләре” темасын ныгыту максатыннан поект эше эшләделәр һәм якладылар. Укучылар үзләренең теманы яхшы үзләштергәнлекләрен тагын бер кабат исбатлап үттеләр.

20 нче декабрь көнне мәктәбебездә әниләр җыелышы булды . Биредә II чиреккә нәтиҗә ясалды. Бирегә чыгыш ясау өчен районыбыздан озак еллар ЗАГС бүлеген җитәкләгән Фирая Котдусовна һәм акушер – гениколог Зөһрә Галиевна чакырылган иде. Алар әниләргә бик үтемле һәм аңлаешлы итеп гаилә турында һәм анда кыз баланы ничек тәрбияләү, алар белән нинди сөйләшүләр уздыру турында җентекләп сөйләделәр . Һәммә әни үзен борчыган сорауларына җавап табып таралышты.

Мәктәбебез яны бер көн эчендә берсеннән –берсе матур кар сыннары белән бизәлде. Һәр көн безне капка янында Кыш бабай белән Кар кызы һәм Яңа елның хуҗасы эт каршы ала. Шулай ук башка әкият геройлары да күз явын алырлык булып балкып торалар.

19 нчы декабрь көнне Мөхетдинова Г.С. 11 нче сыйныфларда инглиз теленнән “Старадельный залог» темасына ачык дәрес күрсәтте. Дәрес бик җанлы һәм кызыклы узды.

20 нче декабрь көнне балигъ булмаган балалар белән эшләүче инспекторлар белән очрашу булды. Алар кышкы каникул вакытында үз- үзеңне тоту, куркынычсызлык кагыйдәләре, интернет челтәрләре турында сөйләшү уздырдылар. Шулай ук төрле шартлаткычлар, питардалар турында да искәртеп киттеләр.

16 нчы декабрь көнне Салавычта узган көрәш ярышында мәктәбебездән Авхадиев Ленар - 1, Авхадиев Ранил - 2, Авхадиев Рәмзис 4 нче урынга ия булдылар. Афәрин, егетләр! Алга таба да уңышлар телибез.

11 нче декабрь көнне 4 нче сыйныф җитәкчесе Яббарова Әлфирә Мансур кызы "Тапкырга табышмак" исемле табышмаклар кичәсе үткәрде. Кичәдә 4 нче сыйныф укучылары 2 командага бүленеп көч сынаштылар. Нәтиҗәдә "Зирәкләр" командасы җиңүгә иреште.

13 нче декабрь көнне музыка укытучысы Динә Мәүлетовна 4 нче сыйныфларда музыкадан ачык дәрес күрсәтте.Дәрес барышында укытучы төрле алымнар кулланып укучыларны кызыксындыра алды. Дәрестә укучылар белән мини проект эше оештыру да бик уңышлы булды. Укучылар дәрестә бик актив катнаштылар.Динә Мәүлетовнага алдагы эшендә уңышлар телибез.