15 нче апрель көнне Г.Тукай иҗатына иллюстрацияләр ясауга нәтиҗә ясалды. Алдан Һәр класска Г.Тукай әсәрләре бүлеп бирелде. Ниһаять, мәктәбебезнең иң матур рәсем ясаучылары билгеле булды. Мостафина Алсу (9 кл.) - I урын, Хаҗиева Динә ( 6 кл. ) - II урын, Мөхетдинов Рәсил (9 кл.) - III урын, Хәйретдинова Диләрә (7 кл.) - III урын. Бу укучыларга алга таба да иҗат уңышлары теләп калабыз

Апрель - туган тел һәм милли тәрбия ае. Шул уңайдан мәктәбебездә аерым план нигезендә чаралар үткәрелә. Мәктәбебез коридорында бөек шагыйребез Габдулла Тукайның иҗатына багышлап, китапханәче Венера Надиловна мәгълүмати күргәзмә ясап куйды. 

Бу максаттан мәктәбебездә эшчәнлек күптәннән бара. Укучыларыбызның инде эзләнү эшләре тәмамланды. Һәр класс альбомнар да эшләп куйды. Классларда һәм мәктәп коридорында әлеге акция уңаеннан күргәзмәләр дә ясалды. 1 сыйныф укучылары да апалары белән бергә бу эшчәнлектә бик актив булып, классларында “Үлемсез полк” исеме астында әби – бабалары турында күргәзмә эшләп куйдылар. 

Укучыларыбыз “70 еллыкка – 70 яран гөле” акциясе башлап җибәргәннәр иде. Һәр сыйныфта укучыларыбыз җидешәр яран гөле утыртып, карап үстерәләр. Чын йөрәктән, ихлас күңелдән утыртылган гөлләр бик матур булып күтәрелеп киттеләр. Ул гөлләрне алар Бөек Җиңү бәйрәме көнне һәйкәлгә куячаклар. 

8 нче апрель көнне башлангыч сыйныф укучылары Малмыж шәһәрендә үткәрелгән беренче әдәби-иҗат кичәсендә катнашып кайттылар. "Татар шагыйрьләре сугыш хакында" кичәсенең "Татар язучылары һәм шагыйрьләре әсәрләренә инсценировка" номинациясендә безнең укучыларыбыз беренче урынны яуладылар. Аларга грамоталар һәм истәлекле бүләкләр бирелде. Менә алар - җиңүчеләр: Вәлиев Асаф, Газизуллин Кәрим, Хөсәенова Зәринә, Базагутинова Диния, Шакиров Әмир, Галимов Әлфис, Корбангалиева Энҗе, Мөхәрләмова Динә. Афәрин!!! 

Апрель аенда “Туган тел” айлыгы кысаларында күп төрле чаралар үткәрелә.
Һәр чара план нигезендә үтә. Бүген, ягъни 10 нчы апрель көнне, 5 нче сыйныф укучылары арасында “шигырь чыгару” бәйгесенә йомгак ясалды. Табигать тарафыннан шигырь чыгару сәләте бар укучыга да бирелми. Шулай булса да, бишенчеләр бик тырыштылар. Аларның уку елы башыннан иҗат җимешләре “Көмеш кыңгырау”, “Салават күпере” газеталарында басылып килде. Бу бәйгедә Шакирова Галия, Гильмуллин Фәниснең Габдулла Тукайга багышлап чыгарган шигырьләре иң уңышлысы дип табылды. Шулай ук Шарипова Фәйрүзә, Гайфетдинова Фәнзилә, Гарифҗанова Зөһрә, Галиуллина Зөһрәләр дә бик актив укучылар. Бу укучыларга алга таба да иҗат уңышлары телибез.

Укучыларыбыз Бөек Җиңүнең 70 еллыгы уңаеннан район күләмендә үткәрелгән “Ледовый шоу”- бозда фигуралы шуу бәйгесендә катнашып, әлеге бәйгедә III урынга лаек булдылар. Бүген әлеге бәйгедә катнашкан укучыларны бүләкләү тантанасы булды. Ә бозда шуучы осталарыбызны бу уңышлары белән чын күңелдән котлыйбыз. Тырышлыклары өчен, әфәрин, рәхмәт аларга.

10 апрель көнне чираттагы радиотапшыру үтте. Атна саен алып барыла торган әлеге тапшыруда Бөек Җиңүнең 70 еллыгы уңаеннан аерым рубрика алып барыла. Бу атнада “Үлемсез полк” рубрикасын 6 сыйныф укучылары алып барды. Аларның һәммәсе үзләренең сугышта булган бабайлары, туганнары хакында сөйләп үттеләр. Алар бу эшкә бик җаваплы карап, чыгышларын матур итеп әзерләгәннәр һәм аларны төгәл, матур итеп сөйләп тә чыга алдылар. Аннан соң бабалары турында язылган бу язмаларын “Үлемсез полк” күргәзмәсенә куйдылар . Әнә шулай “Үлемсез полк” акциясе мәктәбебездә атна саен дәвам итә. Укучылар моңа аеруча җаваплы карый.

Татарстан Президенты сайтында быел Сабантуй бәйрәме кайсы көннәрдә булу турында карар чыкты. Казан Сабантуе 1 августта булачак.
Президент Карарында җирле үзидарә органнары тәкъдимнәрен исәптә тотып, авылларда һәм район үзәкләрендә милли бәйрәм 6-7 июньдә, Яр Чаллы һәм Түбән Кама шәһәрләрендә 13 июньдә узачак диелә.

1961 елның 12 апрелендә бөтен Җир шары Советлар Союзының орбитага Галәм корабы очыруына шаһит булды, аның бортында кеше булуын да ишетеп, "аһ" итте. Кораб җиһанга күтәре­леп, ул вакытта күз алдына да китереп булмаслык тизлектә (сәгатенә 25 мең чакрым) Җирне урап чыкты.

11 апрель көнне мәктәбебездә очучы-космонавт Юрий Алексеевич Гагаринның "Восток" космик кораблендә очышына багышланган тәрбия сәгатьләре үткәрелде.