8 январь көнне 8 нче сыйныф укучылары Габитова Энҗе, Минвәлиева Илүзә, Сабиров Ислам , 7 нче сыйныф укучысы Сәгъдива Ләйсән “Салават күпере” спорт-сәламәтләндерү комплексында үткән активистлар ёлкасында катнаштылар.

Мәктәптә 28 нче  декабрь көнне “Кояшкай” ял лагере эшли башлады. Лагерьда 15 бала ял итә. Балалар рәхәтләнеп тауда чана шудылар. Чыршы янында уеннар уйнадылар.  Балалар ашханәдә сыйланып, күчтәнәчләр алып, күтәренке күңел белән таралыштылар.

Яңа ел килә, яңа ел

Бәрәкәте белән килсен ул

Һәрбер өйгә, йөрәк, күңелгә

 Бәхетләре белән иңсен ул.

 Яңа елда һәркем теләк тели

Яңа елда эшләр уңар күк.
Ел буена ашмый йөргән уйлар
Яңа елда кабул булыр күк.

Бүген Казанда Президент ёлкасы узачак. Анда төрле олимпиадаларда, конкурсларда, спорт ярышларында җиңгән укучылар, уку алдынгылары , ятим  балалар катнаша. Безнең мәктәптән 9 нчы сыйныф укучысы Әхмәтшин Илнур да бу мәртәбәле чараның кунагы. 

Бүген мәктәптә гадәттән тыш хәлләрдә югалып калмау максатыннан эвакуация тренировкасы үткәрелде. Укучылар һәм укытучылар билгеләнгән вакыттан алда мәктәп  бинасыннан урамга чыгып төзелделәр. Чын эвакуацияләр булмасын, тренировкалар гына даими узып торсын.

19 декабрьдә көрәш буенча яшүсмерләр арасында Кайбыч муниципаль районы Беренчелеге булды. Бу ярышлардан 4 укучыбыз медальләр белән кайтты. 30 кг га кадәр үавырлыкта 4 нче сыйныф укучысы Насретдинов Алмаз 2 нче урын, 42 кг га кадәге авырлыкта  6 нчы сыйныф укучысы Саттаров Айназ 3 нче урын, 60 кг га кадәр авырлыкта 8 нче сыйныф укучысы Мотыйгуллин Булат 3 нче урын, шул ук авырлыкта 9 нчы сыйныф укучысы Әхмәтшин Илнур 2 нче урын алдылар. Ә физкультура укытучысы Гатауллин Динар җитәкчелегендәге мәктәп  командасы район буенча 3 нче урынны алды.  Афәрин! Котлыйбыз!

  14 нче декабрьдән 20 нче декабрьгә кадәр мәктәбебезнең 7 нче сыйныф укучылары Гыйниятуллина Камилә һәм Сафина Алсу Казанда урнашкан  “Пламя” сәламәтләндерү  лагеренда ял итеп кайттылар. Лагерьда аларның бер көннәре дә бушка үтмәгән. Төрле кызыклы чаралар, конкурслар, спорт уеннары  гел булып торган.  Шуңа да кызларга лагерьдагы тормыш бик ошаган.

Кичә мәктәпкә  Апас һәм Кайбыч  муниципаль районнары буенча районара күзәтү эшчәнлеге бүлегеннән  инспектор Шафигуллин И.Х. һәм  төп белгеч Кашапов Р.Р. килде. Алар укучылар белән гадәти көннәрдә, Яңа ел бәйрәмнәрендә янгын куркынычсызлыг ы кагыйдәләре, гадәттән тыш хәлләр килеп чыкканда кайда хәбәр итәргә кирәклеге, бу хәлләрне булдырмас өчен нишләргә кирәклеге турында әңгәмә үткәрделәр. Чыннан да бу көннәрдә янгын куркынычсызлыгы бик актуаль мәсьәлә булып тора. Укытучылар, хезмәткәрләр, укчылар уяулыкларын югалтмасын иде.