Бу көннәрдә укытучылар, техник хезмәткәрләр, балалар бакчасында эшләүчеләр,  тәрәзәләрнең тышкы ягын буядылар, нигезләрне, алмагачларны  агарттылар, гөлҗимешне кистеләр һ.б. шундый эшләр белән шөгыльләнделәр . Укучылар белән бергәләп территорияне җыештырдылар.

Апас  районында урнашкан “Свияга” балаларны сәламәтләндерү лагеренда укучыларыбыз теләп ял итәләр.  1 нче сменада Хәйртдинов Илмас , 2 нче сменада   Садриев Салават һәм  Шәрәфиев Айрат , хәрби-патриотик сменада  Әхмәтшин Илнур, Насретдинов Динар, Фәйзуллин Шәфкать һәм Нәфкать ял итеп кайткан булсалар,13 июльдән башланган сменада исә 4 укучыбыз ял итә һәм сәламәтлекләрен ныгыта. Алар- апалы-сеңелле кызларыбыз Гыйрфанова Әдилә һәм Ләйлә, Сабирова Илсия һәм Гөлияләр. Файдалы һәм күңелле яллар, кызлар!

 Үскәндә яфрагын ашыйлар, үсеп җиткәч, тамырын ашыйлар. Ул нәрсә? Әлбәттә суган.

17 июльдә мәктәпнең укыту-тәҗрибә кишәрлегендә үскән суганны  җыеп алдык. Суган уңышы куандырырлык булды. Кыш буена  җитәрлек запас тупланды.

  7 июльдә  Зәйдә Президент Рөстәм Миңнеханов катнашында “Мәктәпкә җыенырга ярдәм ит -2014” республика акциясенә старт бирелде. Бу акциягә безнең мәктәп укытучылары һәм хезмәткәрләре дә теләп кушылдылар. Махсус фондка безнең мәктәп исеменнән шактый күләмдә акча җыелып салынды.

   Дәва буларак, карлыганның яфраклары һәм җимешләре кулланыла. Җимешләрне,тәмам өлгергәч,  иртә белән яки кичен җыю кулайрак. Аларны витамин буларак та, тир һәм бәвел кудыручы, аппетитны көчәйтүче чара буларак та кулланырга мөмкин.  

   Карлыган кайнатмасы яки төнәтмәсе азканлылык, гипертония, ютәл, ревматизм белән интеккән кешеләр өчен аеруча файдалы. 

Мәктәп бакчасында да укучылар көче белән карлыганнан мул уңыш җыелды. Җыелган карлыганның күбесеннән кайнатма хәзерләнде, ә бер өлеше исә кыш көне балаларга компот ясау өчен морозилкада катырылып куелды.

Мәктәпнең укыту- тәҗрибә кишәрлегендә җәй дәвамында эш кайный. Укучылар график буенча яшелчәләргә су сибәләр, чүп утыйлар,  өлгергән җиләк-җимеш һәм яшелчәләрне җыялар, чәчәклектә эшлиләр.

Мәктәбебезнең ике укучысы  - Гарифуллина Чулпан һәм Хәмидуллина Адилә  Биектау районында урнашкан  “Костёр” лагеренда ял итеп кайттылар.  Алар регионара  “Дуслык” сменасында булдылар.

Бу сменада   12- 17 яшьлек  төрле регионнардан  килгән   егетләр һәм кызлар  ял иткән.  Алар арасында  төрле конкурсларда, фән олимпиадаларында  җиңү яулаган   15 тән артык регионнан, шул исәптән Татарстаннан да килгән яшьләр бар.

Сменада ял итүче балалар  татар телен,  аның мәдәниятен, әдәбиятын өйрәнгәннәр,  Татарстанның  күренекле кешеләре белән очрашканнар. Изге Болгар җирендә, Габдулла Тукайның туган җире Кырлайда  булганнар,   Казан шәһәренең  “Әкият” курчак театрында тамаша караганнар, Кремль  буенча сәяхәт иткәннәр. Кызларыбыз  отряд тормышында да актив катнашканнар. Чулпан  лагерь кысаларында узган “УҢГАН КЫЗ- 2014”  конкурсында  катнашкан  һәм "Тамашачылар мәхәббәтен яулаган кыз” номинациясендә  җиңү  яулап, диплом белән истәлекле бүләккә лаек булган.  Смена ахырында   аңа шулай ук  лагерь тормышында  актив булуы өчен диплом  бирелгән. Кызларга  смена бик ошады.

28 нче июнь көнне “Кояшкай” ял лагерена йөрүче балалар белән автобуска утырып юлга кузгалдык. Максатыбыз: Болгар шәһәр тыюлыгын күреп кайту.

Юлда барганда туган ягыбыз табигатенең гүзәллегенә сокланып бардык. Һәм менә Татарстанның борынгы шәһәрләренең берсе – Тәтеш шәһәренә барып җиттек. Аннан соң метеорга утырып Идел елгасы аша юлыбызны дәвам иттек. Идел дулкыннары өстендә чайкала-чайкала өстә очкан  акчарлакларны күзәтеп һәм елга ярындагы гүзәл манзараны карап бару үзе бер рәхәтлек булды.

Ниһаять, без изге Болгар җиренә аяк бастык. Монда без борынгы бабаларыбызның яшәү рәвеше һәм Ватан тарихы белән бәйле тарихи-архитектура истәлекләре белән таныштык. Аннары күчтәнәчкә төрле сувенирлар алып кайтыр юлга кузгалдык. Сәяхәтебез күңелдә онытылмас истәлекләр калдырды.

укытучы Нәфыйкова Р.М.