Әти-әнигә хөрмәт, ихтирам тәрбияләү, гаилә һәм мәктәпнең бердәмлеген ныгыту, балаларны гаилә традицияләренә җәлеп итү, спортка һәм сәламәт яшәү рәвешенә уңай мөнәсәбәт тәрбияләү максатыннан бүген башлангыч сыйныф укытучылары Хәмидуллина М.С. ,Садриева Э.Р. , Сайранова Р.Т. шул исем астында гаиләләр арасында  бәйге уздырдылар. Ярышта Сабировлар (3 кл), Әсәдуллиннар (2 кл), Хикмәтуллиннар (3 кл), Миңнуллиннар(3кл), Фәизовлар (1 кл), Сәмигуллиннар (2 кл), Сабировлар (4 кл), Насретдиновлар(2 кл) катнашты. Спорт ул кешеләрне берләштерә, дуслаштыра торган бер чара. Спорт сөюче кеше генә сәламәт, матур була ала. Тату гаиләдә генә тәрбияле, акыллы балалар үсә. Тату гаиләнең терәге булган әтиләр, гаиләнең учагын саклаучы әниләр һәм тормышка ямь өстәүче балалар бүген үзләренең гаиләләренең көчен, җитезлеген, тапкырлыгын һәм татулыгын сынарга килделәр һәм сынатмадылар.  Бәйге   бик күңелле узды:  төрле конкурслар, олимпиада турында сораулар, спорт уеннары,  боулинг  һәм хәтта биюләр дә булды. Биредә беркем дә җиңелмәде, ә киресенчә үз-үзләрен яхшы кәеф, күтәренке күңел белән бүләкләделәр, һәр гаилә төрле номинацияләрдә Грамоталарга лаек булды. Бәйрәм чәй табыны артында дәвам итте.

 12 нче февраль көнне Кайбыч урта мәктәбендә ел саен үткәрелә торган  “Ел укытучысы -2014” муниципаль конкурсының зона туры булды.   Бу этапта безнең мәктәпнең башлангыч сыйныфлар укытучысы Сайранова Р.Т.   катнашты. “Укытучы һәрдаим укыганда гына укытучы булып кала” дигән мәшһүр педагог К.Д.Ушинский. Һәм ул мең кат хаклы. Шулай булмаганда замана таләпләреннән артта калуыңны  көт тә тор. Ә замана белән ни дәрәҗәдә бергә атлавыңны беләсең килсә, менә шундый бәйгеләргә катнашып карарга була.  Конкурсның таләпләре югары.  Укытучылар  билгеләнгән вакытка сыешсыннар да, күрсәтмәлелек тә булсын, дәреснең темасы да ачылсын, яңа стандартлар да онытылмасын.  Әйтү генә ансат, ничәмә-ничә күз карап утырганда бу үз эшен биш бармагы кебек белүче  дә югалып калырлык.  Әмма   Резедә Тавис кызы югалып калмады. Ул бу таләпләргә туры килерлек технологиядән “Бәхет кошы” дигән темага  дәрес һәм “Дус – акчадан кыйммәт” темасына тәрбия сәгате күрсәтте.

Янгын куркынычсызлыгы кагыйдәләрен  тирәнәйтү максатыннан  без, 6-8 сыйныф укучылары, тормыш иминлеге нигезләре укытучысы Насретдинов Айдар абый белән  районыбызда урнашкан 115 нче янгын сүндерү бүлегенә экскурсиягә  бардык. Монда  безне күп нәрсәләр белән таныштырдылар, кызыклы мәгълүмат бирделәр.  Безнең  экскурсоводыбыз Илшат абый Зиядиев янгын  сүндерүчеләр костюмын киеп карарга бирде, янгын сүндерү машинасына утыртты, аның эшчәнлеге белән таныштырды. Егетләребезгә машиналар бигрәк тә ошады.
Иң соңыннан диспетчерлык бүлегенә кердек. Анда безгә  янгын чыгармас өчен нинди кагыйдәләрне истә тотарга  икәнлеген күрсәтә  торган  видеороликлар күрсәттеләр.
Анда эшләүче  абыйлар безне  киләчәктә янын сүндерүчеләр  сафында  эшләргә  тәкъдим иттеләр, укуыбызда уңышлар теләп  тагын килүебезне көтеп калдылар.

8 нче сыйныф укучысы Гарифуллина Чулпан

Әкият  укыганда  без барыбыз да  андагы  геройлар  белән  сихри дөньяда,  кеше  эз дә  басмаган  сукмакларда  йөрибез,  аккошлар белән  кардан  салынган  сарайларга  очабыз, Гөлчәчәкне  коткарабыз.Әкиятләрдәге образларны, вакыйгаларны күз алдына китереп балалар үзләрен шул вакыйгалар эчендә итеп хис итәләр, хыялланалар, фикер йөртергә өйрәнәләр. Бүген исә без барыбызда башлангыч сыйныф укучылары һәм укытучылары  бергәләп сәхнәләштергән татар халкының “Өч кыз” әкияте геройлары өчен борчылдык та, куандык та.  Һәрбер “артист”  образга чын-чынлап  кереп безне әкият дөньясына чакырды.

Әниләрне беркайчан да рәнҗетмәгез. Ана хакы бик олы. Әниләрегезнең кадерен белегез, аларны саклагыз! Әкият бу мәңгелек фәлсәфәне тагын бер кат күңелләребездә ныгытты.

Бөтен  районыбыз кебек безнең мәктәпнең барлык укучылары да бүген чаңгыга басты. Инде традициягә әйләнгән бу спорт бәйрәме берничә этапта оештырылды: 1-3 нче сыйныфлар, 4-6 сыйныфлар, 7-9 нчы сыйныфлар һәм өлкәннәр. Узыштан соң  пешекчеләребез барыбызны да кайнар чәй һәм бәрәңге белән сыйладылар. Барлык җиңүчеләр дә Грамоталар белән бүләкләнде, ә 1 нче урынны алучыларга бүләкләр дә бирелде. Ярышта иң актив катнашкан сыйныфлар да Грамотага лаек булды. Бу - 3 нче, 5 нче  һәм 9 нчы сыйныфлар.  Бүләкләрне Кошман авылы җирлеге башлыгы Сафина Лилия хәзерләгән иде.  Спорт бәйрәменнән барыбыз  да күтәренке күңел белән таралаштык.

“Татарстан чаңгы юллары - 2014” нәтиҗәләре:

 Бүген  ягъни 8 нче февральдә Яшел Үзән шәһәрендә узган волейбол буенча узган ярышларда Кайбыч районы командасы 2 нче урынны алды. Бу ярышларда безнең мәктәпнең директоры Хәмидуллин И. И. һәм физкультура укытучысы Насретдинов А.Л. та катнашты.

 Бүген 1 нче сыйныф укучыларын, әти-әниләре белән бергә  кабатланмас балачак иленең иң шәп бәйрәмнәренең берсе Әлифба бәйрәменә укытучылары Сайранова Р.Р. җыйды. Җир йөзендә кем генә булмасын, кайда гына хезмәт итмәсен, ул зур дулкынлану белән үзенең нәни кулларына тәүге тапкыр Әлифба алганын искә төшерә. Чөнки һәркемнең дә белем дөньясына аяк атлавы Әлифбадан, Азбукадан башланган. Димәк, Әлифба китабы озын гомерле, тирән мәгънәле, бәһасез байлык ул.

        Балаларның барысы да укырга, язарга, матур итеп сөйләргә, хикәяләр төзергә, шигырьләр сөйләргә өйрәнде. Әлифба бәйрәме безнең өчен  зур тантана. Әти- әниләр дә сынатмады, күңелле  сынаулар аша уздылар. 1 урынны Мотыйгуллиннар гаиләсе, 2 урынны Фәизовлар гаиләсе, 3 урынны Гарифуллиннар гаиләсе алды һәм Мактау грамоталары белән бүләкләнделәр. Балалар кулларына, әлифбаны укып бетергәнлеккә таныклык алдылар. Беренче зур җиңүегез белән Сезне, кадерле укучылар, хөрмәтле әти-әниләр!

 Башлангыч сыйныфлар укытучысы Хәмидуллина М.С. үткәргән чара 22 нче кышкы олимпия уеннарын ачуга багышланган иде.  Олимпиада — 4 ел саен уздырыла торган дөньядагы иң зур спорт ярышлары. Хәзерге вакытта Олимпия уеннары җәйге һәм кышкы уеннардан тора. Алар ике ел саен чиратлашып уздырылалар. Олимпия уеннарында меңләрчә атлет ярыша. Олимпия чемпионы булу спортчылар өчен иң югары дәрәҗәләрнең берсе. Иртәгә ачылачак олимпиада турында укучыларыбыз нәрсә белә? Ә нәрсәне әле белеп җиткермиләр?  Монда барысы да ачыкланды. Олимпиададан соң параолимпиада турында искә төшереп үтте укытучы. Сочидагы олимпиадада катнашучы спортсменнарыбызга уңышлар, җиңүләр теләп таралыштык бу чарадан.

Безгә, бер төркем Кошман мәктәбе укучыларына  Галия Кайбицкая исемен йөрткән музейда булу  бәхете елмайды. Анда без сыйныф җитәкчебез Айгөл апа белән бардык. Музей директоры Энҗе Рамил кызы Мингалиева һәм Эльмира Равил кызы Сафина  безне районыбыз тарихы, аның кешеләре турында сәяхәткә алып кереп китте. Сәяхәтнең башы Кайбыч төбәгенә багышланган этнографик залдан гыйбарәт. Бу залда Кайбыч районы кешеләренең көнкүреше турында белешмәләр, эш кораллары, киемнәр  җыелган. Икенче тукталышыбыз Галия Кайбицкая иҗаты, яшәеше турындагы зал булды. Опера йолдызының үзенә күчкәнче аның ата-анасы,туган җиренә багышланган фотолар, мәгълүматлар белән таныштык. Галия Төхвәтуллина бик ишле гаиләдә туа: алар барысы 15 бала! Әмма унбиш баланың нибары 7се исән-имин кала. Аталары Мотыйгулла Төхвәтуллин балаларының сәнгатькә хезмәт итүче, музыкаль белемле итеп күрәсе килә. Һәм теләкләре кабул була. Опера сәхнәсендә яңа йолдыз -Галия Кайбицкая  кабына! Аның иҗаты турында музейда гаять күп күләмдә мәгълүмат тупланган. Галиянең кайда укуы, кемнәр белән дуслашуы, нинди операларда җырлавы турындагы белешмәләр музейда байтак җыелган.

Сәяхәтебезнең өченче ноктасы Музыкаль зал булды. Бу залда Галия Кайбицкаяның моңлы тавышын ишеттек. Анда без Галия Кайбицкаяның өлкән абыйсы Камиль Төхвәтуллин турында  да  белешмә алдык. Аның да мәшһүр сәнгать кешесе булуына тагын бер кат инандык. Мәгълүматлар туплагач Эльмира Равилевна безнең игътибарлылыкны тикшерү өчен викторина тәкъдим итте. Сынатмадык бугай!

8 нче сыйныф укучысы Чулпан Гарифуллина

Профориентация эше башлангыч сыйныфларда ук башланырга тиеш. Шуңа да инде башлангыч сыйныфлар атналыгындагы бүгенге көн һөнәрләргә багышлаган иде. Укытучы Садриева Э.Р. хәзерләгән бу чарада укучылар һөнәрләр турында бик мәгълүмат алдылар. Чарада “Төзүчеләр” һәм “Шофёрлар” командалары катнашты. Башта укучылар әти-әниләренең һөнәрләре турыда шигырьләр сөйләделәр. Ә аннары соң кызу ярыш башланды: “Нәрсә артык?”, “Кем кайсы һөнәр иясе”  “Табиб һөнәре юнәлешләре”  , “Кайсы һөнәр ияләренә бу эш кораллары кирәк? “ һ.б.  Балалар берсен-берсе уздырып һөнәрләр турында белгәннәрен сөйләделәр. Киләчәктә укучыларыбыз тырыш, эш сөючән, уңган һәм булган балалар булып үсәрләр, кешеләргә һәм илебезгә файда китерә торган эшләр генә башкарырлар дип өметләнеп калабыз.