Спорт - кеше тормышындагы мөһим факторларның берсе. Мәктәптә бүген  спорт сөюче башлангыч сыйныф укучылары, "Кояшкай" һәм  "Йолдызлар" командаларына бүленеп, өлгерлек- җитезлектә көч сынашты.  "Кояшкай" командасы, 13 балл туплап, көндәшләрен күпкә артка калдырды. Патриотик тәрбия айлыгы кысаларында үткәрелгән әлеге чарада укучылар бик теләп катнашты. Төрле ярышлардан торган уен  тиз арада үтеп тә китте. Без укучыларыбызның сәламәт булуларын телибез. 

Укучыларда патриотизм хисләрен камилләштерү, аларны Ватанны сакларга әзерләү максатыннан, февраль ае һәр елны патриотик тәрбия айлыгы буларак үткәрелә. Быел да бу айда мәктәбебездә төрле чаралар планлаштырылды. Сыйныфларда тәрбия сәгатьләре, диспутлар уздырыла. Чираттагы чараны башлангыч сыйныф укучылары үткәрде. Алар патриотик темага шигырьләр, җырлар башкардылар, Муса Җәлил әсәрләрен сәхнәләштерделәр. Безне үткәнгә алып кайтып, күңел кылларын кузгаттылар. 

Бүген район үзәгендә үткән "Салават күпере"  спорт -сәламәтләндерү комплексын ачу тантанасына мәктәбебезнең алдынгы укучылары да барды. Спорт үзәген ачуда президентыбыз Р.Н. Миннехановның  катнашуы бәйрәмгә ямь өстәде.  

Яшь антифашистлар кемнәр алар?   Кем ул герой- пионерлар? Бүгенге тормышта бармы герой дип аталырга лаек кешеләр? Шушы һәм башка сорауларга 5-6 сыйныф укучылары җитәкчеләре Алсу Зөлфикар кызы белән бергәләшеп җавап эзләделәр. Тәрбия сәгате сизелмичә дә узды.

Татарстан Республикасы Мәгариф һәм фән министрлыгы, Тормыш иминлеге фәнни үзәге, Татарстан Республикасы юл хәрәкәте куркынычсызлыгы дәүләт инспекциясе идарәсе “Беренче сыйныф укучысына мәктәпкә куркынычсыз килергә ярдәм ит” республика бәйге-акциясенә нәтиҗә ясады.  5 нче сыйныф укучысы Шәрәфиева Әдиләнең "Слоганнар" номинациясендә башкарган эше Республика күләмендә 1 дәрәҗәдәге дипломга лаек дип табылды. Җитәкчесе - тәрбия эшләре буенча директор урынбасары Мөзаффарова Рушания Зөфәровнаның да әлеге уңышта өлеше зур. Бүген алар Казанда, бүләкләү тантанасында катнашып кайттылар.

Бүген Адилә Шарафиева өчен чын-чынлап онытылмаслык көн булды. Казан шәһәрендә узган республика конкурсында җиңүчеләрне бүләкләү тантанасы чыннан да бик матур оештырылган иде. Көннең беренче яртысында балалар ДАИ-ЮХИДИ  музеенда булып, ГАИ тарихы, юл хезмәткәрләре турында үзләре өчен бик күп кызыклы информация алдылар. Аннан соң- дулкынландыргыч бүләк алу мизгелләре, бергәләшеп тарихи фотога төшү, тәмле төшке аш... Ә иң кызыгы- соңыннан!

 Күпләрнең хыялында гына булган картада йөрү, руль артына утырып машина йөртү  Адилә  өчен чынбарлыкка әйләнде. "Форсаж" картинг үзәгендә  укучылар рәхәтләнеп картада йөрделәр, мавыктыргыч раллида узыштылар. Теоретик белемнәрен гамәли сынадылар, үзләренең чын җиңүгә лаек икәнен расладылар!

Бөтенроссия спорт сәламәтләндерү комплексы ГТО нормаларын тапшыру дәвам итә. Кышкы сезонга чаңгыда 1,2,3 һәм 5 километрга йөгерү каралган. Физик тәрбия укытучысы Фрат Гаделша улы укучыларга чаңгы таякларын дөрес тоту, шуу төрләрен куллану, дөрес сулыш алу, иптәшеңнең тормышына куркыныч тудырырлык гамәлләр кылырга ярамаганлыгы турында аңлатты. Югары нәтиҗәләргә ирешү өчен әзерлекле булырга өндәде.

Сәйфетдинов Илнур Татарстан командасы составында катнашып  Россия Федерациясе Идел буе федераль  округының  Идел аръягы зонасында үткәрелгән тимераякта узышу ярышларында многоборьедә 12 урынны яулады. Котлыйбыз!

  Мәктәп коллективы, барлык укучылар, авыл җирлеге хезмәткәрләре, әти- әниләр- барысы да бергәләп "Россииянең чаңгы юллары-2015"  ярышларында катнаштылар. Кайнар коймак белән  хуш исле чәй эчеп алганнан соң, салкын саф һавада , күтәренке күңел белән рәхәтләнеп чаңгыда йөрдек, сәламәтлекне ныгыттык,  тәнгә сихәт, күңелләргә көрлек алдык!

Бөек Җиңүнең 70 еллыгына  багышлап район күләмендә үткәрелгән "Җиңү елъязмасы төссезләнмәс"   баннерлар конкурсында мәктәп коллективы 3- урынга лаек булды. Котлыйбыз!