Бүген педагог-оештыручы белән берлектә 2 сыйныф “Йолдызчык” отрядында “Галстуклы ил” программасы буенча, “Галстуклы балачак” исеме астында сбор үткәрелде. Дәрес сәламләү, исем девиз, җырны искә алу белән башланып китте.Игътибарлылыкка уеннар уйнадык, эзтабарларның девиз, баскычларын, вазыйфаларын искә төшердек. Шулай ук практик күнекмәләр дә үттек, “Кем иң оста “ исеме астында иң тиз һәм дөрес итеп галстук бәйләүчене ачыкладык. Ул – Мөбарәкова Динә булды. Балаларның күңеленә хуш килә торган, яратып уйный торган шарлар белән бию, “Киресенчә” дигән хәрәкәтле уеннар да уйнадык. Сбор дәрескә нәтиҗә ясау һәм “очкын җибәрү” белән тәмамланды.

Дума членнары тарафыннан уку елынын беренче кварталына газета чыгарылды.

Бүген мәктәбебездә башлангыч сыйныфларның "Сөмбелә" бәйрәме үткәрелде. Сәяхәткә UAZ маркалы машина белән юлга чыктык, төп җитәкләүче Рәнис Рәлифович булды. Сәяхәтне башлаганчы, барыбыз бергә "Көз көз, әйт әле, кәрзинеңдә ниләр бар?... дигән җырны җырлап, үз урыннарыбызны алдык. "Табышмаклар", "Көз патшасы"-"Көз сылуы", "Үзеңне күрсәт", "Уеннар" һәм башка тукталышлар аша үтеп, үзебезнең белем дөньясына әйләнеп кайттык. Бәйрәм барышында махсус букетлар ясап"Көз патшасы", ярмалар аеру осталыгы белән"Көз сылуы" билгеләнде. Укучыларыбыз көз турында берсеннән-берсе матур шигырьләр иҗат иткәннәр, аларны тыңладык, төрле халык көләренә биюләр биедек... Кыскасы, бәйрәм бик кызыклы үтте.

"Здоровье-твое богатство" акциясе кысаларында мәктәбебезнең спорт комитеты җитәкчесе Мөхетдинов Рәмзил эзтабарлар белән физкультминутка үткәрде. 

Хөрмәтле укытучылар, коллегалар! 
Сезне чын йөрәктән һөнәри бәйрәмебез – Укытучылар көне белән котлыйбыз! 
Укытучылар – гомерләрен изге һөнәргә багышлаган кешеләр. Сезнең иҗади сәләтегез, тәҗрибәгез, югары һөнәри осталыгыгыз нигезендә район мәгарифе яхшы нәтиҗәләргә, иң мөһиме – укучылар һәм әти-әниләрнең рәхмәтләренә ирешеп килә. Сез белем бирүдәге гадәти алымнарны инновацион үзгәрешләр белән берләштереп, заман таләпләренә җавап бирердәй белемле балалар әзерлисез. 
Бу тантаналы көндә Сезгә иҗади үсеш, бетмәс-төкәнмәс энергия, яңа үрләр, уңышлар, җиңүләр, ныклы сәламәтлек, иминлек, зур бәхетләр телибез. Йөзегездә һәрвакыт елмаю балкысын , укучыларыгыз сәләтле һәм тырыш булсын! Якыннарыгызның ихтирамын тоеп, шатланып-куанып яшәгез.Бәйрәм белән Сезне! Тагын күп еллар шулай бергә татау гына эшләргә язсын, туар таңнарыгыз аяз, матур булсын, сау-сәламәт булыгыз.☀

Беренче октябрь көнне Ә.А.Ахунҗанов исемендәге Олы Шыңар урта мәктәбендә өлкәннәр көне билгеләп үтелде. Чарага күп еллар мәктәбебездә эшләгән укытучыларыбыз, техник хезмәткәрләр чакырылды. Укучыларыбыз тарафыннан әзерләнгән күңелле, моңлы җыр - биюләр, шигырьләр, кызыклы уеннар берәүне дә игътибарсыз калдырмады. Концерт программасыннан соң бәйрәм чәй табыны артында дәвам итте.

Бүген мәктәбебездә Пенсия фонды идарәсе хезмәткәрләре  югары сыйныф укучылары һәм укытучылар  белән очрашу уздырдылар. Алар укучыларга пенсия турында яшьтән кайгыртырга кирәклеге турында сөйләделәр. Тиешле һөнәрне алып, рәсми рәвештә теркәлеп, хезмәт хакыннан Пенсия фондына  взнослар күчә торган итеп эшләргә кирәклеге турында аңлатты. Ахырдан укучыларга буклетлар таратылды.

Мәктәбебездә "Яшел Россия" хәрәкәте кысаларында  агач утырту өмәсе оештырылды. Укучылар да, укытучылар да әлеге чарада бик актив катнаштылар. Мәктәп каршысына агач үсентеләре утырттылар, мәктәп территориясен җыештырдылар. 

Бүген мәктәбебездә "Милләтләр кроссы" акциясе кысаларында йөгерү бәйгесе үткәрелде.Физкультура хәрәкәтен киң массаларга тарату, авыл халкында физик культура белән даими шөгыльләнү буенча кызыксыну тудыру максатында үткәрелгән бу чарада барлык мәктәп укучылары, укытучылары, техник хезмәткәрләр катнашты. Барлык сыйныфлар арасында беренчелекне яулаган укучылар:

Башлангыч сыйныфларда беренчелекне егетләр арасында  -  Галявин Булат, кызлар арасында - Хөсәенова Диләрә яулады.

5 - 6 сыйныфлар арасында Мөхәммәтгалиев Азат һәм Нәҗмиева Гөлинә,

7 - 9 сыйныфлар арасында Шарифуллин Рәдис, Мәхмүтов Әлфис һәм Ахунҗанова Ания,

10 - 11 нче сыйныфлар арасында Гыйлметдинов Илшат,  Гарипова Гөлинә.

18 сентябрь Кече Шыңар мәдәният йортында (2464 сайлау участогында) Ә.А.Ахунҗанов исемендәге Олы Шыңар урта мәктәп думасына спикер сайлавы булып үтте. Аны Гарифуллина Гөлчәчәк Илшатовна җитәклиячәк. Шулай ук секторларның да җитәкчеләре билгеле булды. Чарада 8-11 сыйныф укучылары катнашты. Фикерләре, тәкъдимнәре белән дә уртаклаштылар.