Яңа  чирек  башлану  белән  бергә  бездә  бүген ТАРИХ  ҺӘМ  ҖӘМГЫЯТЬ БЕЛЕМЕ АТНАЛЫГЫна  да  старт  бирелде! 9.01.17- 14.01.2017  көннәрендә дәвам  итәчәк   атналыкның  планын   тарих  укытучыларыбыз  инде әзерләп тә өлгерткән! Атналык   шактый  кызыклы  һәм  эчтәлекле  булырга охшаган. Дустым,  син дә калышма, атналыкта  катнашырга  ашык :  9.01.17- Кроссвордлар бәйгесе:  "XIX гасырда дөнья" (8 сыйныфлар) Әхмәтшина А.Т. 10.01.17 -  Күргәзмә: «Гыйнварның тарихи вакыйгалары»(6 сыйныфлар)Янурова Ә.Ә.Әхмәтшина А. Т. 11.01.17 - Борынгы Греция мифлары (5сыйныфлар) Янурова Ә.Ә. 12.01.17 - «Гасырлар алмашынганда дөнья» викторинасы (8 сыйныфлар) Әхмәтшина А. Т. 13.01.17-Түгәрәк өстәл : «Яшүсмер һәм канун» 7 сыйныфлар Янурова А.А.Әхмәтшина А. Т. 

Хөрмәтле гимназия идарәсе, укытучылар коллективы, укучылар, гимназиянең ашханә һәм техник хезмәткәрләре! Сезне барыгызны да якынлашып килүче Яңа еллар белән котлыйбыз! Барчагызга ныклы сәламәтлек , бәхетле тормышлар, яңа уңышлар, яңа үрләр теләп калабыз. Яңа еллар барыбызга да ХӘЕРЛЕ ЯҢАЛЫКЛАР гына алып килсен!

"Аҗаган" балалар фәнни-күңел ачу үзәге, Башкарма комитетының Мәгариф идарәсе белән берлектә, 25 декабрьгә кадәр гомумшәһәр күләмендәге «классный» сыйныф марафоны бәйгесе үткәрде.
Конкурсның максаты – Казан мәктәпләре арасындагы иң шәп, дус, сыйныфны ачыклау иде. Әлеге конкурста гимназиянең 6 Б сыйныфы укучылары бик теләп катнашты (сыйныф житәкчелэре Янурова Ә.Ә.) 
6 Б сыйныфы укучылары соңгы айларда әлеге конкурс белән «янып» яшәде. Укучыларның сәләтләрен, дустанә мөнәсәбәтләрен күрсәтергә шушы бәйге сәбәпче булып торды. Гимназия укучыларыбыз барлык этапларны үтәп, яхшы нәтиҗәләргә иреште. 6 Б сыйныфы конкурс ахырында диплом, "Аҗаган" балалар фәнни-күңел ачу үзәгенә чакыру билетлары белән бүләкләнде. Бәйге кысаларында бик куп кызыклы ачышлар, онытылмаслык хис-кичерешләр, уңай эмоцияләр алынды. 

Компетентлык – заман таләбе.Компетентлы педагог нинди күнекмәләргә ия булырга тиеш соң? Педагог даими үзгәрешләргә әзер булырга, алдагы көн өчен хезмәт итәргә, һәр башкарган эш нәтиҗәле булсын өчен тырышлык куярга тиеш. Укытучы тәҗрибәдән «акыл» алырга, белемен системага салырга, мөстәкыйль рәвештә даими үз белемен күтәрергә өйрәнергә тиеш. Компетентлы фән иясе төрле мәгълүмат базасыннан үзенә кирәклесен эзләп таба, информацияне сайлап ала, документлар белән эшләгәндә, аларны классификацияли белә. Яңа информацион һәм коммуникатив технологияләрне кыю куллану, яңалыкларны тиз кабул итәргә күнегү кебек компетенцияләргә ия булу да әһәмиятле. Компетентлы укытучы гына компетентлы укучы шәхесе тәрбияли ала. Компетентлы педагог булу өчен нәрсә үзгәртергә? Укытуда компетентлы якын килү нәрсә бирә? II чирек йомгаклары уңаеннан  ике  сәгать   ярымга сузылган педсоветның төп темасы  әнә шул хакта булды. 

Укучыларның иң кыска чирекләре тәмамланып, ниһаять, зарыгып көткән кышкы каникуллары башланды. Быел ул 26нчы декабрьдән 8нче гыйнварга кадәр дәвам итәчәк. Гимназиядә бара торган барлык спорт түгәрәкләре үз эшчәнлекләрен гадәттәге  җәдвәлдә  калдыра. Димәк, кышкы каникулларын авылда чаңгы-чана шуып үткәрүдән мәхрүм булган балаларның гимназиядә даими эшләп килүче түгәрәк һәм секцияләргә йөреп, кышкы ялларын бик файдалы итеп үткәрергә  тулы мөмкинлекләре  бар  дигән сүз бу.                                                                                                                                                                        

Гимназиябезнең тарих укытучысы Янурова Әлфия Әдис кызын «Ел укытучысы – 2017» шәһәр бәйгесенең район этабында «Педагогик дебют» номинациясендә II урын яулавы белән кайнар котлыйбыз!  Мактауга лаек  хезмәтендә тагын да зуррак уңышларга ирешүен, тир түккән хезмәтенең  татлы җимешләргә һәрдаим  бай  булуын  теләп  калабыз. 

«Ел укытучысы – 2017» шәһәр бәйгесенең район этабында «Гуманитар фәннәр укытучысы» номинациясендә I урын яулаган Хәмитова Илсөяр Габделбәр кызын зур җиңүе белән котлыйбыз!  Үз һөнәре  җанына һәрвакыт  рәхәтлек алып килсен, тырыш  хезмәте  һәрдаим  хөрмәткә  лаек  булсын!

Кулдагы яктылык кайтаргыч беләзекнең, баш киеменә яки курткага ябыштырылган рәсем (наклейка), биштәрдәге брелокның, әһәмиятсез вак-төяк кенә түгел, ә балаларын һәм якын кешеләрен бәладән коткарып калырга ярдәм итә торган элемент икәнен ата-аналарга аңлату максатыннан, Дәүләт автоинспекциясе тарафыннан Әниләр көне алдыннан гына “Кайгыртучан әни” бәйгесе игълан ителгән иде. Быел без дә әлеге бәйгенең катнашучылары булдык. Гимназия укучылары Тараканов Марсель һәм Макаров Данил әниләре Гөлназ Хәйруллина һәм Макарова Татьяна белән яктылык кайтаргыч элементлардан костюмнар тегеп, юлда куркынычсызлык булдыруда үзләренең иҗади өлешләре барлыгын һәм балаларына кайгыртучан әни булуларын күрсәтте.
Җиңүчеләрнең исемнәре 30-нчы декабрьдә бүләкләү тантанасында билгеле булачак икән.