Татар теле һәм әдәбияты атналыгына йомгак ясап , 7 А сыйныфында Тукай иҗатына багышланган викторина узды . Викторина Тукайның балалар һәм олылар өчен булган шигырьләрен дә, Тукай  тормышын да, аның  замандашларын  да  үз эченә алган иде. Сыйныф  " Апушлар" һәм " Җиңүчеләр" командаларына бүленеп   ярышты.  Кыскасы, һәр  команда  Тукай   турында  үзләренең   барлык  булган  белемнәре  сынады.

Әле күптән түгел генә инвалидлар декадасы кысаларында 4 Б сыйныфы үзләренең сыйныф җитәкчеләре А. Р. Фәсләхова белән " Мәрхәмәтлелек елмаюдан башлана" дигән ачык сыйныф сәгате уздырганнар иде. Бүген исә З. Н. Шиһапова сыйныфында 3нче  сыйныфлар өчен  узган  "Мәрхәмәтле булыйк!" дип  исемләнгән ачык  дәрес һәр кунакның  күңеленә май   булып  ятты.  Укытучының  дәрестә   оптимистик   рух, яхшы  кәеф  булдыруда  заманча ысуллар  кулланганы   күренде. Дәрес  соңында, укучылар "смайлик"лар   ясадылар,  аларны бер-берсенә  бүләк  иттеләр һәм   дәрес  карарга  кергән  кунакларга  да  өлеш  чыгардылар  әле!

Бүген 1 “В” сыйныфы җитәкчесе һәм тәрбия эшләре буенча директор урынбасары А. Е. Харитонова белән педагог-оештыручы Р. Р. Асылгәрәева, гимназия китапханәчесе белән берлектә, 1нче сыйныф укучыларын китапханә белән якыннан таныштыруга багышланган “Без - китапның дуслары ” дип исемләнгән китапханә дәресе үткәрделәр. 3-4 ай уку дәвамында беренчеләр әлифбаны ныклап үзләштергәннәр һәм кышкы каникуллардан соң да соңга калмыйча, гимназия китапханәсенә йөри башларга исәпләре. Сыйныф җитәкчесе аларга китапханәдә үз-үзеңне тоту кагыйдәләре, китапханә китапларын югалтырга ярамаганлыгы һ.б. хакында сөйләсә, китапханәче, үз чиратында , формуляр турында белешмә бирде һәм китапларның ни дәрәҗәдә дәвалауга мохтаҗ булулары турында аңлатты. Китаплар белән дустанә мөнәсәбәт урнаштыруга 1 “В” сыйныфы әнә шулай нигез салды. 

Бүген 5 нче сыйныф укучылары "Мавыктыргыч фән һәм техника" балалар фәнни үзәгенә юл тотты. Алар "Алга" һәм "Алабуга" балалар космик станцияләренең IV очышы кичәсенә чакырулы иделәр. Балалар үзәге Татарстан һәм Россия киңлекләрен урар өчен, "яшь космонавтлар" белән бергәләп , галәмгә чираттагы  корабльләрен  очырды. Укучыларыбыз әлеге мөһим вакыйганың тере шаһитлары булдылар. Кем белә бит, бәлки, чираттагы космонавт нәкъ  менә  бүгенге  гадәти   булмаган  фәнни - фантастик   чараның  шаһитлары  арасыннан үсеп чыгар?!

Мәктәп психологы З. Т. Әлмөхәммәтова укучылар белән даими рәвештә әңгәмәләр үткәреп тора. Бу белгечкә ихтыяҗ зур гимназиядә, чөнки уку йортында ничә укучы белем алса, шуның кадәр холык та дигән сүз бит әле ул. Барысының да проблемасын индивидуаль хәл итәргә кирәк. Серләрен үз күңелләрендә йөртеп, беркемгә дә сөйли алмаган балалар нәкъ менә мәктәп психологы янына кереп "эчен бушата". Бу юлы да психолог 10нчы сыйныфлар белән аерым бер темага багышланган әңгәмә корды. 

Инглиз теле атналыгына йомгак ясап, 8 Б сыйныфы укучылары, инглиз теле укытучылары  Сазгиева Л. Р. белән берлектә, башлангыч  сыйныфларның булган  белемнәрен  ныгыту  шарты  белән   инглиз телендә  бер бик матур чара узды. Чара яшелчә һәм җиләк - җимешләрнең инглиз телендә яңгырашына багышланды. Башлангыч сыйныфларның инглиз телендә ишетеп аңлау күнекмәләрен камилләштерү һәм сүзлек составларын баету максатыннан оештырылган әлеге чараны 8 Б сыйныфы укучылары бик мавыктыргыч һәм истә калырлык итеп алып барды. Инглиз телендә атап үтелгән яшелчә һәм җиләк - җимешләрдән укучыларның үз рецептлары буенча әзерләнгән мастер- класс та күрсәтелде. 

12 декабрь - Россия конституциясе көне. Тарих укытучылары   тарафыннан   тарихи  датага    багышланган  кызыклы уен уздырылды. 

9 нчы декабрь Ватан каһарманнары көне яки Георгий кавалеры көне буларак 2007 елдан бирле билгеләп үтелә. Казан шәһәре муниципаль берәмлеге башкарма комитеты Мәгариф идарәсе боерыгы нигезендә гимназиядә бу көнгә ел саен аерым зур игътибар бирелә. Бу көннең рәсми төстә барлыгын укучыларның хәтерләренә сеңдерү һәм күкрәк тулы орден-медальләргә ия тарихи шәхесләр белән күзгә күз очрашулар оештырып, тарихи үткәнебезгә, канлы сугыш елларына сәяхәт кылып, каһарманнарыбызны барлау һәм данлау максатыннан, бүген гимназиядә сыйныф сәгате һәм “түгәрәк өстәл” чаралары узды. Чарада катнашырга Вахитов районы ветераннар Советы президиумы әгъзасы А.И. Власенко , А. А. Барышев, Г. И. Ключков чакырылган иде.