28нче октябрь көнне I чирек нәтиҗәләренә йомгак ясап, чираттагы ата-аналар җыелышы узды. Гимназиядә ата-аналар җыелышы һәрдаим сыйныф җитәкчеләре тарафыннан аерым бер темага багышлап уздырыла. Бу юлы да һәр сыйныф җитәкчесенең ата-аналар белән сөйләшергә үз темалары әзерләнгән иде. Көзге каникулларга китәр алдыннан балаларның кичке сәг. 10 нан соң үзләрен генә урамга чыгармау хакындагы карар турында ата-аналарга янәдән искәртелде. Шул исәптән, җыелышта укучыларның тышкы рәвешенә , шәхси әйберләрен йөртешенә , мәктәп күләмендә үз-үзләрен тотышларына, укуда өлгерешләренә, туклану карталарына, электрон көндәлекләргә, ГТО нормативларына һ.б. караган тагын бик күп мәсьәләләргә кат-кат басым ясалды .

Соңгы вакытта традицион "контроль" төшенчәсе, яисә "диагностика"  сүзе урынына "мониторинг" сүзе кулланыла башлады. Башкача әйткәндә, мониторинг ул – укучыларның белем, күнекмәләр дәрәҗәсенең үсешен күзәтү, планлаштыру, тикшерүнең комплекслы системасы. Контроль үлчәү материаллары (КҮМ) ярдәмендә укучыларның белем дәрәҗәсе тикшерелә. КҮМ материалын төзүдә нигез булып гомуми минимум таләпләренә туры килгән белем дәрәҗәсе тора. 27 нче октябрь көнне гимназиянең 4, 6, һәм 8 сыйныф укучылары  видео күзәтүе астында татар теленнән КҮМ (КИМ) язды.

Хәрби вакытның ни икәнлеген өлкән буын яхшы белә. Елга бер мәртәбә гимназия дә үзенең хәрби әзерлегенә имтихан тота. 27нче октябрь көнне җыелма эвакуация пункты штаб күнегүләренә өйрәтүләр узды. Аның составына хәбәр итү һәм элемтә, теркәү һәм барлау, колонналар формалаштыру, хисап, җәмәгать тәртибен саклау, транспорт белән тәэмин итү, ышык урын табу төркемнәре керә. Болардан башка, ана белән бала бүлмәсе, медицина пункты, радиация һәм химия күзәтүе посты , белешмә өстәле булырга тиеш. Күнегүләр тиешле дәрәҗәдә үтәлде , хезмәтләрнең барысы да уңай бәяләнергә лаек дип табылды. 

Рус теле атналыгы уңаеннан , 1 Б сыйныфы укучылары , сыйныф җитәкчеләре Гөлсаф Ильясовна белән берлектә, “Вечер поэзии” дип аталган рус әдәби шигърият кичәсендә катнашып, Совет чорының балалар өчен иҗат иткән иң атаклы әдипләреннән 3 шәхесне искә алдылар. Алар арасында иң өлкәне һәм иң кыска гомерлесе булуына да карамастан, хәзерге вакытта телевидениядән барган мөһим тапшыруга - "Жди меня" ( "Найти человека") тапшыруына нигез салучы язучы-шагыйрә Агния Бартоның биографиясе белән кыскача таныштырып үттеләр, сәнгатьле итеп аның шигырьләрен яттан сөйләделәр. Кичә ахырында укучылар А. Барто иҗаты буенча төзелгән уеннарда катнаштылар. 2016 ел кино елы булу уңаеннан, шагыйрәнең әсәрләре буенча төшерелгән кинофильмнар турында да әйтелде. Искә алынган икенче бер шәхес   Русия һәм Советлар Берлеге гимннарына сүзләр язган танылган балалар шагыйре - Сергей Михалков. Беренче шигырен Михалков 15 яшендә бастырып чыгарган. Бүгенге көнгә аның 400 мең данә китабы сатылганлыгы билгеле. Сергей Михалков әлеге өч шәхес арасында иң озын гомерле балалар иҗатчысы  дисәк тә , ялгыш булмас , ул 1913 елның 13нче мартында дөньяга килә һәм 2009 елның 27нче августында 96 яшендә вафат була. Чираттагы әдип - Борис Заходер. Ул «Винни-Пух маҗаралары», «Мэри Поппинс», «Питер Пэн», «Алиса могҗизалар дөньясында» кебек әкиятләрне рус теленә тәрҗемә итә. Шулай ук , ул Иоганн Гете хезмәтләрен тәрҗемә итү эше белән шөгыльләнә. Танылуны Борис Заходерга нәкъ менә аның тәрҗемә әсәрләре китерә. Тәрҗемәләренә нигезләнгән Союзмультфильм мультфильмнарында инде менә ничәмә-ничә буын тәрбияләнә. Кыскасы , балалар әдипләренә багышланган рус әдәби шигърият кичәсе катнашучылар һәм тамашачылар өчен дә бермә – бер файдалы булды. Балалар һәм олылар да үзләренең белемнәрен баетты. 

Бугенге рәвештәге фән XVI—XVII гасырларда оеша башлый, мәгрифәтчелек чорында аеруча популярлаша. Үзенең тарихи үсеше барышында ул техника һәм технология кысалары тышына чыга. Фән җәмгыятькә һәм мәдәнияткә һәр яктан тәэсир итүче иҗтимагый һәм гуманитар яктан әһәмиятле институтка әверелә. Ничек кенә булмасын, фән ул үзенә күрә аерым бер дөнья, иксез-чиксез бер дәрья сыман! Ул бер тылсым көче белән сине гел үзенә тарта. Барлык елга-диңгезләр дә кайчандыр чишмә-инешләрдән башланган сыман , фән дәрьясының да “чишмә башы” мәктәпләрдән башлана. Гимназиябездә үткәрелгән фән атналыкларының асыл максаты да балаларны фән белән кызыксындыруда , теге яисә бу фәннең кырыс кагыйдәләргә, теорема һәм таблицаларга гына корылмаган булуын күрсәтеп бирүдә , “фән дөньясына сәяхәт”ләр ясап , аның кызыклы һәм мавыктыргыч булуын бәян итүдә. Гимназиядә инде инглиз , татар теле һәм әдәбияты атналыклары узды. Агымдагы атнада рус теле атналыгы дәвам итә. 

20 октябрь көнне 11нче сыйныфларда Казан дәүләт аграр университетының профессоры, филология фәннәре докторы Наилә Хәбибрахман кызы Шарыпова белән очрашу булып узды. Баксаң, ул үзе дә кайчандыр безнең мәктәпне тәмамлаган булган икән. Мәктәпне тәмамлагач та, төп сайлаган һөнәре - рус теле һәм әдәбияты укытучысы. Хәзерге вакытта ул Казан дәүләт аграр университетында “ Сөйләм культурасы һәм ораторлык сәнгате”, “ Аралашу һәм коммуникация “ ,”Югары мәктәп педагогикасы”, “Психология”, “ Психология һәм педагогика” “ Психология һәм югары мәктәп педагогикасы”, “Социаль психология “ , “ Социология “ кебек фәннәрдән студентларга белем бирә. Күп кенә фәнни хезмәтләр һәм берничә дәреслек авторы да булган Наилә Хәбибрахман кызы 11нче сыйныф укучыларына ни рәвешле дөрес итеп һөнәр сайларга кирәклеге хакында сөйләде.

Кешеләр табигатьне пычраталармы? Бу хәлдән чыгу юллары бармы? Киләчәктә ни булыр?! Бу һәм башка сорауларга ачыклык кертеп , 20нче октябрь көнне тагын бер үзенчәлекле дәрес узды.
Казанның В. Г. Тимирясова исемендәге Икътисад, идарә һәм хокук (ИЭУП) университеты базасындагы көллиятнең директоры , икътисад фәннәре кандидаты Ю. В. Хадиуллина гимназиянең 6нчы сыйныф укучыларына “Кешелекнең глобаль проблемалары ” дигән темага ачык дәрес үткәрде. - Глобаль проблемалар, аларның типлары һәм үзара бәйләнешләре; - Үткән һәм киләчәктә кешелекнең глобаль проблемаларының географик аспектлары;
- Экологик проблемалар, аларны чишү юллары һ.б. кешелекне борчыган глобаль мәсьәләләрне интерактив форматта яктырткан дәрестән, призлы һәм бүләкле шөгыльләрдән балалар бик канәгать калды. 

"Сөмбелә ае"ның соңгы көне тәүлек эчендә көн белән төннең көзге тигезләшкән чорына туры килгән һәм бу көнне "Сөмбелә" бәйрәме үткәрелгән. Бу бәйрәм көн белән төннең язгы тигезләшкән чорында уздырылучы "Нәүрүз" бәйрәменең капма – каршы парын тәшкил итә."Нәүрүз" бәйрәме чәчү чорын башлап җибәрсә, "Сөмбелә" бәйрәме аны тәмамлап куя. Менә шундый көзге муллык – туклык чорына туры килгәнгә күрә дә, халык "Сөмбелә" бәйрәмен, аеруча сый – ризык әзерләп, көр күңел белән үткәрә торган була. Татар теле һәм әдәбияты атналыгы көзге уңышның әле җыеп кына алынган иң мул чорына туры килүе сәбәпле, 1 А сыйныфы укучылары, сыйныф җитәкчеләре Фәридә Фәһимовна җитәкчелегендә, "Сөмбелә" бәйрәмен укучы-тамашачылар хозурына тәкъдим итте. Халкыбызның уен авыз иҗаты әсәрләрен яңартып, "Чума үрдәк, чума каз..." ны уйнап күрсәттеләр, "Шалкан" әкияте дә күпләрне балалык чорына алып кайтты. Җырлар-биюләр, җиләк-җимеш һәм яшелчәләрне данлау белән үрелеп барды бәйрәм. Дан-мактауга иң лаеклысы, әлбәттә, ул "ИПИ- ӘПЕКӘЙ" булды.

Татар теле атналыгы дәвам итә. Халкыбызның матур йола уеннарын искә төшереп, 4 Б сыйныфы укучылары "Кичке уен" күрсәттеләр. Чара балаларны тәрбияләү рухында барды : беренчедән, алар халкыбызның гореф-гадәтләрен искә төшерсә, икенчедән, милләтара дус яшәү идеясен алга сөрде.

Татар теле һәм әдәбияты атналыгында 8 А һәм  8 Б сыйныфлары " Тапкырлар һәм зирәкләр" уенын, кыскасы, ТАТАРЧА КВН күрсәтте. Сыйныфлар ике командага  бүленеп,   татар теле һәм әдәбияты дәресеннән алган белемнәрен ныгытып, халык авыз иҗаты белән бәйле рәвештә, бик мәзәкчән, чын мәгънәсендә, тапкырлыкта һәм зирәклектә сыный торган уен күрсәттеләр. Очколарны "Тапкырлар" командасы бик тапкыр булып ,  "Зирәкләр" командасы  бик зирәк  булып , һәр биремдә бер-берсенән уздырып  ярышсалар  да, ахыр килеп, очколарның тигез булганлыгы ачыкланды. Шулай итеп, ДУСЛЫК җиңде! Афәрин !