16 нчы майдан 21 нче майга кадәр гимназиядә “Язгы игелек атнасы” акциясе узды. Атналык кысаларында укучылар өчен төрле чаралар оештырылды. Бер атна дәвамында, һәр көн укучылар игелек турында презентацияләр карадылар, “Игелек дәресе”, “Әдәплелек көне”, “Игелекле эшләр” акцияләрендә актив катнаштылар, яхшылык һәм начарлык темасына карата рәсемнәр ясадылар.

Шушы көннәрдә шәһәребезнең Вахитов районы беренчелегенә футбол уеннары башланды. Әлеге уеннарда гимназиябезнең футбол командасы зур уңышка иреште. Уеннарның нәтиҗәсе түбәндәгечә: 98 нче номерлы мәктәп - 1 нче гимназия (0:3);
27 нче гимназия - 1 нче гимназия (0:2). Финал уенында безнең команда 0:2 исәбе белән 12 нче мәктәп командасын җиңүгә иреште һәм Вахитов районында 1 нче урынны яулап, шәһәр этабына чыкты.

Бүген гимназиядә "Язгы игелек атналыгы" башланып китте. Атналык кысаларында 1 нче сыйныф укучылары арасында "Игелеклелек көндәлеге"  проектына нәтиҗә ясалды. Барлык таләпләргә туры килгән көндәлек дип 1 нче А сыйныфы укучысы Сәгъдиева Чулпанның көндәлеге табылды.

8-10 нчы сыйныф укучылары шәһәребезнең Габдулла Тукай исемендәге татар дәүләт филармониясендә "Пушкин картасы" буенча "Хәрәкәттә бәрәкәт" концертын карап кайттылар.

Халкыбызның тарихи үткәненә, мәдәниятенә карата кызыксыну һәм хөрмәт хисе тәрбияләү максатыннан,  5 “Б”  сыйныфы укучылары К.Насыйриның музеенда булдылар. Гөлфия Нәбиулловна үзенең акыллы сүзләре, матур сөйләме белән очрашуны ачып җибәрде. Укучылар аны тын да алмыйча тыңлап утырдылар. Бу экскурсия укучыларга, ата-бабаларыбызның гомерләрен аямыйча көрәшеп, безгә бүләк итеп калдырган тыныч тормышның кадерен белергә, халкыбызның тарихын өйрәнеп, киләчәген кадерләп саклау өчен, тырышып укырга этәргеч булып тора.

Республикабызда елның иң зур вакыйгаларының берсе — Идел буе Болгар дәүләтендә Ислам динен кабул итүгә 1 100 ел тулуга багышланган чаралар уза. Шул уңайдан гимназия китапханәсендә китап күргәзмәсе оештырылды. 

Бүген, Бөек Җиңү көнендә, гимназиябез укучылары "Үлемсез полк" акциясендә катнаштылар. Алар, Бөек Ватан сугышында катнашкан туганнарының фотосурәтләрен күтәреп,  шәһәребезнең үзәк урамнары буйлап үттеләр. Беркем дә, бернәрсә дә онытылмый!

Җиңү көненә багышланган “Җиңү тәрәзәләре” акциясенә без дә кушылдык. Укучылар гимназиядә, өйләрендә, матур итеп, тәрәзәләрен бизәделәр, аны фотога төшерделәр.

Бүген бездә Бөек Ватан сугышында Җиңүгә 77 ел тулуга багышланган радиотапшыру үтте. Көн дәвамында радиода укучылар башкаруында сугыш чоры җырлары һәм Җиңү көненә багышланган җырлар, шигырьләр яңгырады.

Гимназиябездә һөнәри юнәлеш бирү эшенә зур игътибар бирелә. Бүген 9 нчы сыйныф укучылары һөнәри юнәлеш бирү буенча тест сорауларына җавап бирделәр. Тест укучыларның нинди һөнәри юнәлешне өстен күрүләрен ачыклауга юнәлдерелгән иде.