29-30 нчы апрель көннәрендә мәктәбебездә бердәм эшмәкәрлек дәресләре уздырылды.Укучыларыбыз авылыбыз эшмәкәрләре Гилмуллин Илшат Рашид улы һәм Фазлыев Булат Җәлил улы белән очрашып, эш урынында экскурсиядә булып кайттылар.

27 нче апрель көнне Бөрбаш мәдәният йортында укучыларыбызның иҗат отчет концерты булып узды. Укучыларыбыз үзләренең талантларын һәр яклап күрсәтә алдылар.Алар арасында оста җырлаучылар, биючеләр, нәфис сүз осталарын күрергә була иде. Шушындый талантлы яшьләребезне тәрбияләгән өчен барлык укытучыларга да зур рәхмәтебезне белдерәбез.

26 нчы апрель көнне мәктәбебездә Г.Тукайның тууына -130 ел тулу уңаеннан, “Безнең күңелләрдә син, Тукай !” дип исемләнгән әдәби-музыкаль булды. Әлеге кичәдә укучылар Г.Тукайның шигырьләрен сөйләделәр, җырларын башкардылар, әкиятләрен сәхнәләштерделәр. Тукай һәрчак безнең күңелләрдә. Киләчәк буыннар да бүгенге укучыларыбыз кебек бөек шагыйрьнең тормыш юлын, иҗатын онытмасыннар иде.

21 нче апрель көнне Валиев Асаф, Галиуллин Илсаф, Базагутинова Диния, Хөсәенова Зәринә Акбиров Рим Фәргат улы җитәкчелегендә “Хыял” спорткомплексында “Куркынычсыз тәгәрмәч” конкурсында катнашып, 3 нче урынны алдылар. Грамота, истәлекле бүләкләр белән бүләкләнделәр. Укучыларыбыз мәктәпкә дә зур бүләк- төсле принтер алып кайттылар.Афәрин!

1 нче сыйныф укучысы Базагутинов Әмир районда 6-7 яшьлек балалар арасында уздырылган каратэ ярышында беренче урында калды. Әмирне һәм аның остазын Базагутинов Альбертны бу җиңүләре белән котлыйбыз.

Һәр ел саен, Тукай айлыгында шагыйрьнең әсәрләренә карата кул эшләре эшләнә. Быел да 7 нче сыйныф укучылары тарафыннан бу эш башкарылды. Күбрәк укучылар “Бала белән күбәләк”, “Шүрәле” әсәрләрен эшләгәнннәр. Арада чигү, бәйләү, пластилин, аппликация ярдәмендә башкарылган эшләр шактый. Укучылар үз куллары белән ясаган һәр эш безнең өчен бик кадерле. Аларга зур рәхмәтебезне җиткерәбез.

Бөтендөнья сәламәтлекне саклау оешмасы карары белән 24 апрельдән-30 апрельга кадәр Бөтенрәссәй һәм Татарстан Республикасында бердәм иммунизация атналыгы үткәрелә. Шушы атналык кыссаларынды 26 нчы апрель көнне мәктәбебездә шәфкать туташы Фазлыева Гөлфия Харис кызы белән очрашу үткәрелде.Ул укучыларга прививкалар, йогышлы авырулар турында аңлатып китте, укучыларны кызыксындырган сорауларга җавап бирде.

23 нче апрель көнне мәктәбебездә өмә оештырылды. Өмәдә укытучылар һәм укучылар катнашты. Мәктәп тирәбез чистарып, матурланып, яшәреп калды. Өмәдә катнашучыларга зур рәхмәтебезне белдерәбез.

"Язгы изгелек" атналыгы кысаларында 1нче сыйныф укучылары, мәктәп бакчасына утырту өчен, помидор рассадаларын аерым савытларга аерып утырттылар.

23 нче апрель көнне Субаш авылында Тукай исемендәге җәмгыять призына 1998 елда Һәм аннан да соңрак елларда туган яшүсмерләр арасында узган татарча көрәш ярышларында безнең мәктәбебездән бер төркем укучыларыбыз көрәш ярышында катнашып кайттылар. 10 нчы сыйныф укучысы Фәхретдинов Рүзәлне 2 урын алуы белән чын күңелдән котлыйбыз.Егетләребезне һәм аларның җитәкчеләрен Миннемуллин Айгиз Рафил улын уңышлары белән котлыйбыз.