24 нче марттан – 31 нче мартка кадәр  укучыларыбыз каникулга киттеләр.  Укуның соңгы көнендә “Карга боткасы” бәйрәме үткәреп, күңелле уеннар уйнап, рәхәтләнеп ял иткәннән соң таралыштылар алар. Каникулда да укучыларыбыз өчен төрле чаралар планы төзелде .

Кошлар атналыгын йомгаклау уңаеннан,  22 март көнне мәктәп күләмендә тагын бик күркәм бәйрәм булып үтте.  Бу көнне  без “Карга боткасы” пешердек.  Бәйрәмдә   районның экология бүлегеннән  килгән хезмәткәр  Рамил Хаҗиев  та катнашты.  Бәйрәмнең беренче өлеше тантаналы рәвештә  үтте. Башта директорыбыз Гүзәл Галимулловна кошлар атналыгына нәтиҗә ясап, җиңүче укучыларыбызны котлап үтте. Аннан Рамил Хаҗиев  укучыларыбызга матур теләкләрен белдерде. Мәктәбебез исеменә шушы матур эшебез өчен зур рәхмәтен белдерде. Мәктәбебезнең  бу атналыкта актив саналган классларына  бүләкләр тапшырды.  Бәйрәмнең икенче өлешендә тәмле пылау белән сыйландык, пешекче апаларыбыз пешергән тәмле булочкилар белән самоварда кайнап торган  кайнар чәй эчтек.  Аннан авыл уртасындагы агачларга сыерчык оялары элдек, рәхәтләнеп күңелле уеннар уйнадык.  Бу көнне авылыбыз, балаларның шат авазыннан яңгырап торды.  “Җырчы кошларыбыз  туган ягыбызга шундый матур, тыныч көннәр  һәм шатлык – куанычлар гына  алып килсеннәр  иде,” -  дигән теләктә калып,  без күңелле ялдан соң  өйләребезгә таралыштык

17 – 22 март көннәрендә  мәктәбебездә “Кошлар атналыгы”  билгеләп үтелде. Шул уңайдан  укучыларыбыз  сыерчык оялары ясады, класслар арасында кызыклы КВН үткәрелде, рәсем  конкурслары үтте. Сыерчык ояларына  мәктәп күләмендә урыннар да билгеләнде. Менә алар:  беренче урынга  2 нче сыйныф укучысы Сафаргалиев Айрат, икенче урынга  8 нче сыйныф укучысы Хадиев Фәннүр, 5 сыйныф укучысы Мифтахов Наил, өченче урынга  6 сыйныф укучысы Нуретдинова Фирүзә, 6 сыйныф укучысы Шәйхетдинов Шамил, 8 сыйныф укучысы Абдрахманова Алияләр   ия булдылар.  Ә “Иң оригиналь сыерчык оясы”  номинациясенә 5 сыйныф укучысы Гарипова  Альбина  ия булды.  Башлангыч сыйныфлар арасында үткән рәсем конкурсында 1 сыйныф укучысы Мөхәрләмова Динә, 2 сыйныф укучысы Хөсәенова Зәринә, 4 сыйныф укучысы Гарифҗанова Зөһрәләр беренче урынны алсалар,3 сыйныф укучылары бу җиңүне класслары  белән яуладылар.  Әфәрин!  Шундый актив һәм тырыш булганыгыз өчен.

22 март көнне  Субаш урта мәктәбендә  үткән кул көрәше ярышында  катнашкан укучыларыбыз  командасыннан,  Габдрахманов Руслан II урынны , Нуретдинов Нияз һәм Галимова Әлфинә IV урынны яулап кайттылар. Молодцы!  Гел  шундый көчле һәм тырыш укучыларыбыз булырсыз дип ышанып калабыз.

22 нче март көнне, район күләмендә  үткән  2002 – 2003 нче елгы кызлар арасындагы волейбол ярышларында безнең кызларыбыз командасы беренче урынны алып кайтты. Бу аларның беренче җиңүләре.  Булдырдыгыз кызлар,әфәрин!   Алда  бирешмәскә,  беренче урынны башкаларга  бирмәскә!

Сыерчык ояларын мәктәбебезнең барлык укучылары да ясады. Иң – иңнәрен сайлап алганнан соң, калган ояларны без урман хуҗалыгына тапшырдык.  Ул ояларны урманнарга куярга  дип алып киттеләр. Ә үзебездә калганнарын без авыл тирәсендәге агачларга куярбыз. 

Март – гүзәллек ае. Шушы матур айда мәктәбебезнең чибәр, сөйкемле, уңган кызлары өчен без матур һәм кызыклы бәйге - “Озын толым” бәйгасе оештырдык. Безнең мәктәбебездә кыска чәчле бер генә кыз да юк. Ә иң – иң озын чәчлеләре менә шушы бәйгедә катнашты. Кызларыбызны барлык яктан да сынадык. Алар безгә җиләк – җимешләрдән, салфеткалардан матур бизәлеш, төрле камыр ризыклары ясау, җыр һәм бию осталыкларын күрсәттеләр. Соңыннан бәйгедә катнашучы һәр кыз берсен – берсе уздырып, чәчләрен төрлечә үреп, матур причёскалар да ясап куйдылар. Шулай итеп һәр кыз нинди дә булса аерым бер сәләте белән тамашачыга үзен күрсәтә алды. Соңыннан егетләребез кызларыбызга матур – матур сүзләрен, аларга соклануларын белдерделәр, изге теләкләрен җиткерделәр. Иң озын толымлы кыз - 7 сыйныф укучысы Исрафилова Ләйлә булса, Иң оста чәч үрүче исемен 5 сыйныф укучысы Хаҗиева Динә алды. Бәйгедә катнашкан һәркем үзенә хас бер исемгә лаек дип табылды. Кичә бик кызыклы һәм истә калырлык күңелле үтте

Бүген Татарстан Республикасы мәктәпләрендә укучы бөтен 11 сыйныф укучылары да математика фәненнән Бердәм дәүләт имтиханын тапшырырга хәзерләү өчен оештырылган сынау имтиханнарын (пробный ЕГЭ) тапшыра. Әлеге имтихан укучыларны БДИга сыйфатлы әзерләү максатыннан Федераль тест үткәрү үзәге материаллары буенча бушлай үткәрелә. 
Бердәм дәүләт имтиханын тапшырырга хәзерләү өчен оештырылган сынау имтиханнары 107 имтихан уздыру пунктында оештырылган. Алга таба төп имтиханнар да биредә узачак. 
Сынау имтиханнары вакытында укучыларга  бланкларны тутыру кагыйдәләре белән танышу, укыган фәннәре буенча белем дәрәҗәләрен тикшерү мөмкинлеге булачак. 
Шундый ук БДИ рус теле фәненнән республика укучылары өчен сынау режимында 24 мартта булачак.

19 нчы март  көнне  “Аргамак” укучылар оешмасының  җыелышы булып үтте. Җыелышның көн тәртибе буенча мәгариф, сәнгать, хәтер, сәламәтлек, тәртип саклау министрлары  үз юнәлешләрендәге эшчәнлек буенча чыгыш ясадылар. Аннан соң класс старосталары өченче чирек нәтиҗәләре  һәм класслардагы эшчәнлекләре белән таныштырып үттеләр. Җыелышка районның  балигъ булмаган балалар белән эшләүче инспекторы Ләйсән Маратовна да килде. Ул укучыларыбызга  бик җитди һәм аңлаешлы итеп барлык  кагыйдәләрне һәм законнарны аңлатты. Юлларда йөрү, җәмәгать урыннарында үз – үзеңне тоту, гомумән начар гадәтләргә юлыкмаска өндәп, үзенең киңәшләрен  җиткерде. Җыелыш ахырында    мәктәбебезнең тәрбия эшләре буенча директор урынбасары Раушания Урановна каникул планы белән таныштырды. Соңыннан директорыбыз Гүзәл Галимулловна  укучыларыбыздан таләп ителә торган  кайбер нәрсәләргә басым ясады, укучылар өчен кагыйдәләрне онытмаска , кайда да үзеңне үрнәк шәхес итеп күрсәтергә  кирәклеккә өндәде.

Бу атна “Канатлы- дусларыбызга” багышланган атна дип игълан ителгән иде. Берсеннән берсе күңелле чаралар белән атна үткәне сизелмәде дә. Дүшәмбе көн “Канатлы дусларыбызга  матур оялар”  конкурсы оештырылса, сишәмбе көнне классларда кошларга багышланган тәрбия сәгатьләре уздырылды. Укучылар үз ягыбызда яшәүче кошлар турында да, кызыл китапка кертелгән кошлар турында  да презентацияләр әзерләгән иделәр. Атнабыз чирек тәмамлаган көн белән бер көнне тәмамланачак. Ике бәйрәмне бер итеп үткәреләчәк “Карга боткасы” н түземсезлек белән көтәбез, һәм һәркемне яз бәйрәменә чакырабыз