Сезне 8 март бәйрәме белән чын күңелдән котлыйбыз!

Сезгә нык сәламәтлек, куанычлы, тыныч көннәр телибез.

 Гомерләрегез кадер – хөрмәттә, бәхеттә үтсен.

Җир шарының ак бәхете өчен

Яратылган җәүһәр, алтын сез.

Кешелекнең иң зур зиннәте – Сез,

Яшәү мәгънәсе сез – Хатын – кыз!

Бу уку елында кайбер укучыларыбыз – егетләр һәм кызлар спортның тагын  бер төрен үз иттеләр. Алар даими рәвештә каратэ түгәрәгенә йөри башладылар.  Яратып шөгыльләнгән һәр эшнең  нәтиҗәләре дә хәйран уңышларга китерә. Инде каратэ ярышларында ничә тапкыр катнашып, безнең  Гарифуллин Марат һәм Абдрахманова Алияләрнең  призлы урыннардан төшкәннәре юк. Бу юлы да Йошкар – Ола шәһәрендә булып үткән әлеге ярышлардан  алар тагын  җиңү белән кайттылар. Марат II яуласа, Алия  III урында. Молодцы, киләчәктә тагы да зур җиңүләр насыйп булсын сезгә, бирешмәгез!

Шушы исем астында  бөтен Рәсәй күләмендә үткән  рәсем конкурсына эшләрен җибәреп, укучыларыбыз  Гильмуллин Фәнис, Мостафина Алсу, Хәйретдинова Гүзәлләр  актив катнашучылар буларак махсус  диплом белән бүләкләнделәр.  Алда әлеге укучыларыбызга тагын да тырыш һәм актив булып,  призлы урыннар алуларын да теләп калыйк.

Дүшәмбе, 3 март көнне Татарстан Республикасының Мәгарифне үстерү институты ректоры вазифаларын Равил Хәмитов башкара башлады.

Моңа кадәр ул Татарстан Республикасы мәгариф һәм фән министры урынбасары, Татарстан Республикасы Мәгариф һәм фән министрлыгының мәгариф өлкәсендә күзәтчелек һәм контроль департаменты җитәкчесе булып эшләгән. Министрлыкта аның урынын Балтач районының мәгариф бүлеге җитәкчесе алачак. Ә Мәгарифне үстерү институтының элекке ректоры Фәнүзә Тарасова КФУга китәчәк дигән сүзләр йөри. Әлегә ул институтта инглиз теле кафедрасының җитәкчесе булып калган.

Яңа ректор Равил Хәмитов Мәгарифне үстерү институтында яңа кеше түгел. 1999-2007 еллар дәверендә ул лаборатория, кафедра мөдире вазыйфаларын башкара. 2007-2008 елларда Мәгарифне үстерү институтының мәгълүматлаштыру һәм дистанцион укыту буенча проректоры булып эшли.

 Бүген мәктәбебездә һәм авылыбызда зур бәйрәм булып узды.  Ел саен  авылдашыбыз, данлыклы көрәшче  Шакиров Фидаил абый призына оештырыла торган татарча көрәш ярышларын  быел да түземсезлек белән көтеп алды спорт сөючеләр.  Бу ярышта Балтач, Саба, Кукмара, Мамадыш районының  иң оста көрәшчеләре бил алышты.

Бүгенге бәйге аеруча истә калырлык булды. Мәктәбебез көрәшчеләре командасы район мәктәпләре арасында өченче урынга лаек булды. Ә укучыларыбыз арасыннан Фәхертдинов Рүзәл – 1нче, Мөхәммәтҗәнов Муса – 2нче, Сәләхетдинов Рәдис – 3 нче урынны яуладылар. Җиңү яуламасалар да, команда уңышына өлеш керткән калган көрәшчеләребезгә дә олы рәхмәтебезне җиткерәбез.

 Бүген безнең өчен икеләтә бәйрәм, авылда көрәш ярышы, мәктәптә спорт бәйрәме. Язның беренче көнен  тау шуып, чаңгыда узышып каршыларга уйладык. Уйнап аргач табигать кочагында ашлар пешереп  ашадык,  чәйләр кайнаттык. Рәхәтләнеп уйнап, күңел ачтык.  Язны күтәренке күңел, яхшы кәеф белән каршыладык. Еллар имин, киләчәк көннәребездә шушындый матур чаралар тагын да булыр әле дип уйлыйбыз

28 нче февраль көнне  башлангыч сыйныф укучылары тәрбияче апалары белән район мәдәният йортына театр карарга бардылар. Балалар куанып, шатланып кайттылар. Аннан кайткач, берсен – берсе уздырып укытучы апаларына да сөйләп күрсәттеләр. Театр бик ошаган аларга

 Февраль март айларында иң матур бәйрәмнәр билгеләп үтелә. Шушы көннәрдә без бигрәк тә өлкәннәргә игътибарлы булырга тырышабыз. Авылыбызда сугышта катнашкан бердән-бер кеше – 8- класста укучы  Адиләнең әбисе Нурҗиһан апа Хөснетдинова гына безнең арада. Шушы көннәрдә аңа 90 яшь тулды.  8 – класс укучылары Нурҗиһан апаны  барлык бәйрәмнәр белән дә тәбрикләп, бәйрәм котлавы һәм истәлек бүләге  әзерлде. Ветеранның өйләрендә булып, хатирәләрен тыңлап, үзенә матур теләкләр теләп  кайтты.

Мәктәбебездә  сәләтле укучылар белән эш дәвам итә. Математика, информатика, технология, биология, география  фәннәре буенча укучылар проект эшләре әзерләп беренче турга эшләрен тәкъдим итте. Без аларга уңыш елмаюын,  2- турга үтүләрен теләп калабыз.