Кичә мәктәптә гадәттән тыш хәл очрагында үз-үзеңне тоту күнекмәләрен ныгыту максатыннан эвакуация ясалды. Барлык укучылар, укытучылар һәм мәктәп хезмәткәрләре эвакуация кагыйдәләрен төгәл үтәделәр.

Бүген мәктәпләрдә кабат кыңгыраулар чыңы ишетелә башлады, чөнки уку елының соңгы чиреге - 4 нче чирек башланды. Укучыларыбызга укуларында зур уңышлар, бары тик яхшы билгеләр генә теләп калабыз!

Бүген Кайбычта "Живая классика" Россиякүләм яшь укучылар конкурсының район этабы үтте. Әлеге конкурста безнең мәктәптән ике укучы катнашты: 6 нчы сыйныфтан Шәмсетдинова К. һәм 8 нче сыйныфтан Сафина А. Аларга бәйгедә актив катнашкан өчен Дипломнар бирелде.

Балаларның язгы каникуллары булуына да карамастан, чыгарылыш сыйныф укучылары өчен бу вакыт - кызу эш чоры. Чөнки алар тырышып булачак имтиханнарына әзерләнәләр. Шул максаттан алар өчен фән консультацияләре билгеләнгән график буенча эшләвен дәвам итә.

Бүген Кайбыч районында "Без бергә!" республикакүләм балалар халык иҗаты бәйгесенең муниципаль этабы үтте. Әлеге бәйгедә безнең мәктәптән 8 нче сыйныф кызлары "Хореография" номинациясе буенча ирланд халык биюен башкардылар.

Укучыларыбыз каникул вакытында  "Салават күпере" спорт һәм сәламәтләндерү комплексына бассейнга йөрүләрен дәвам итәләр. Бүген дә 1, 2, 4, 5 сыйныф укучылары бассейнда булып кайттылар.

Мәктәбебезнең 9 нчы сыйныф укучылары бүген татар теленнән БРТ (бердәм республика тесты) башкарып кайттылар.

Мәктәбебез укучылары Шәрәфиев А., Әхмәтшина А., Сафина А., Сәгдиева Л., Саттаров А., Сабиров С. "ЙОЛДЫЗ" командасы исеме астында Ульянково төп гомуми белем бирү мәктәбендә үткәрелгән "В мире естествознания" конкурсында катнашып кайттылар. Әлеге КВН барышында "Капитаннар ярышында" Шәрәфиев А. 3 нче урын яулады.

Кичә мәктәбебезнең 1 нче сыйныф укучыларының "Әлифба бәйрәме" үтте. Укучылар иң беренче китаплары белән саубуллаштылар, алган белемнәрен әти-әниләренә күрсәттеләр. Бәйрәм җыр-биюләр, уеннар белән аралашып барды.

Укучыларның түземсезләнеп көтеп алган язгы каникуллары да килеп җитте, 3 нче чиреккә нәтиҗәләр инде чыкты. Әлбәттә, язгы кояш үзенең җылы нурларын сипкән матур көннәрдә балаларның күңеле һәрчак уенда, табигатьтә булачак. 4 нче чиреккә аяк басканда укучыларыбызның рәхәтләнеп ял итеп, көч туплап килүләре генә түгел, ә иң мөхиме - сау-сәламәт булулары - безнең зур теләк һәм бурычыбыз. Шунлыктан укучыларыбыз белән һәр сыйныфта аерым да, гомуми линейка барышында да "Язгы каникулда куркынычысызлык кагыйдәлере" темасы астында әңгәмәләр үткәрелде, аңлату эшләре алып барылды. Ялларыгыз күңелле, файдалы үтсен, укучылар!