Бөтенроссия "Ангел вдохновения" конкурсында катнашып тәрбиячеләребез Хазиева Алсу Габделхамитовна II дәрәҗә диплом, Ганиева Фәния Фаттаховна, Габбасова Ләйсән Равилевна III дәрәҗә диплом белән бүләкләнделәр. Аларны уңышлары белән котлыйбыз, алга таба да иҗади уңышлар телибез.

Бакчабызга ком кайтты. Барлык эшчеләр һәм әти- әниләр  дә ком ташыдылар.  Балалар рәхәтләнеп комлыкта уйныйлар.

Россия көне- дәүләт бәйрәме һәм ул иң "яшь" бәйрәмнәрнең берсе булып санала.  Без дә балалар һәм волонтерлар белән берлектә бәйрәм үткәрдек. Бакчабызда балаларның шат авазлары яңгырап торды, алар җырладылар, биеделәр, шигырьләр сөйләделәр, ә соңыннан волонтерлар аларга Россия флагы ленталары тараттылар.

Балачакның шат җырлары

Яңгырасын бөтен җирдә.

Һәрчак тату, дуслар булып

Яшик без туган илдә.

Икенче кечкенәләр төркеме “Минем дустым - йомшак уенчык” – уенчыклар ярминкәсе үткәрелде. Тәрбияче Тәслимә апалары белән  балалар йомшак уенчыклар дөньясында булдылар, матур шигырьләр сөйләделәр.  Алар белән күңелле уеннар уйнадылар, ни өчен йомшак уенчыкларны  яратулары турында сөйләделәр һәм бер- берсе белән уенчыкларны алыштырып уйнадылар.

Песи, песи, пескәем,

Соры синең төскәең.

Йомшак синең йоннарың,

Җылы синең туннарың.

   Бүген балачак бәйрәме. Сугышны, ачлык-ялангачлыкны, авыруларны белмәсеннәр,  тынычлап укысыннар, физик яктан чыныксыннар өчен балаларны яклау – өлкәннәр эше,  дәүләтнең бурычы.  Кызлар һәм малайлар бүген рухи яктан да саклануга мохтаҗ, шуның өчен дә җир йөзендә һәр көн Балаларны яклау көне булырга тиеш.
1 нче июньдә безнең балалар бакчасында  балалар катнашында “Балачак бәйрәме” күңел ачу- спорт бәйрәме үткәрелде.  Балалар бәйрәмгә килгән “Елак кыз” ны үзләре янына алып, төрле җыр, бию, шигырьләр сөйләргә өйрәттеләр, бергәләп җәйге универсиада уеннары уйнадылар. Соңыннан асфальтта рәсемнәр ясадылар.

Бакчабызда җәйге эш планы кабул ителде. План «Спорт сөючеләр»,«Сәламәтлек» (физик усеш), «Бәйрәм кирәк    һәркемгә» (социаль үсеш), «Матурлык – тирә-юньдә» (эстетик үсеш), «Экологик проектлар» «Тылсымчылар» (танып - белү, экологик үсеш) төп блокларыннан тора. Һәр атна саен төрле уен, күңел ачу, экскурсия, күргәзмә һәм башка чаралар үткәреләчәк. Әлбәттә җәй айларында чыныктыру- сәламәтләндерү чаралары даими алып барыла. Төркемнәрдә яшь үзенчәлекләрен искә алып планнар төзелде.

Бүген икенче кечкенәләр төркеме балалары, тәрбиячеләре Тәслимә Камилевна белән матурлык тирә- юньдә блогы буенча “Шатлык тәрәзәсе” күңел ачу, күңелле уеннар оештырдылар. Төркем биләмәсен матур шарлар белән бизәделәр. Балаларның хыялларын белделәр һәм тәрәзә аша һәр балага шатлык өләштеләр.

Безнең яраткан, нәни дусларыбыз!

Сезне чын күңелебездән Балаларны яклау көне белән котлыйбыз!!!