Яңа ел бәйрәме якынлаша. Шуның билгесе буларак, инде урамнарда кичләрен гирлянда утлары җемелдәшә, бизәлгән чыршы һәм нарат агачлары күренә башлады. Гимназиядә дә әзерлек бара: урамда төрле төстәге гирляндалар җемелди, бүлмәләр берсеннән-берсе оста бизәлгән. Ә бүген укучылар Яңа ел тамашасы өчен чыршы дә бизәделәр. Шуңа да гимназиябездә хәзер Яңа ел хисе хөкем сөрә. 

Бүген сыйныфларда “21 нче гасыр геройлары. Кемнәр алар?” темасына сыйныф сәгатьләре оештырылды. Яшь буынга патриотик һәм рухи-әхлакый тәрбия бирү - мәктәпнең бурычларының берсе. Гражданлык-патриотик тәрбия бирү буенча чаралар үткәрү үсеп килүче буынга дөньяга караш формалаштыру һәм илнең тулы кыйммәтле гражданнарын тәрбияләү өчен бик мөһим. “21 нче гасыр геройлары. Кемнәр алар?” дигән темага сыйныф сәгате яшүсмерләрдә гражданлык-патриотик хисләр тәрбияләүгә лаеклы өлеш кертергә тиеш. Әлеге сыйныф сәгатенең төп максаты булып укучыларда патриотизм, гражданлык, әхлакый культура тәрбияләү, геройларга иҗтимагый хөрмәт һәм рәхмәт белдерү тора. Бу максат-бурычларны хәл итү аша  укучылар «герой», «батырлык», «героик адым» төшенчәләре белән танышты, бүгенге тормыш мисалында герой образын ачты, батырлык турында күзаллауларын формалаштырды.

4 нче сыйныфлар гимназиядә “Куркынычсыз юллар” дип аталган  бөтенроссия онлайн-олимпиадасында катнаштылар.  Олимпиада “Куркынычсыз һәм  сыйфатлы автомобиль юллары”  дигән милли проект кысаларында үткәрелә. Ул башлангыч сыйныф укучыларының юлларда куркынычсызлык кагыйдәләрен үзләштерүгә исәпләнгән. Олимпиаданың максаты – юл хәрәкәте иминлеге мәсьәләләрендә мәктәп укучыларының һәм аларның ата-аналарының хәбәрдарлыгын арттыру.  Биредәге биремнәрне үтәү юл йөрү кагыйдәләре турында белемнәрне ныгытырга ярдәм итә.

Бу атнада “Музыкаль тәнәфес” проектында Салих Сәйдәшев атналыгы узды. Ул бөек татар композиторының 120 еллыгына багышланган. Бу көннәрдә эфирда мәшһүр татар композиторы турында мәгълүмат, Сәйдәш җырларын, аның музыкаль әсәрләреннән  өзекләр  тыңлап була. Атна дәвамында озын тәнәфесләрдә  Салих Сәйдәшев музыкаль мирасының иң яхшы үрнәкләре тәкъдим ителә.

2020 елның 3 декабрендә кабатланмас якты талант иясе, халкыбызның сөекле композиторы Салих Җамалетдин улы Сәйдәшевнең тууына 120 ел тулды. Ул - татарның җир-табигать биргән мәшһүр Сәйдәше, профессиональ милли музыка сәнгатебезнең классигы. Аның исеме мәдәниятыбыз тарихына алтын хәрефләр белән язылган. Татар музыка культурасы тарихында композиторлык профессиясе Салих Сәйдәшев исеме белән бәйләнгән. Ул - татар музыка культурасына нигез салучы беренче профессиональ композитор. Сәйдәшев моңнарының иҗади нигезе халык жырлары чишмәсеннән башлана. Ул, талантлы композитор булуы белән бергә, халыкчан иҗат итә белү сәләтенә дә ия булган. Шуңа күрә аның иҗаты милли, халыкчан, әсәрләре тирән мәгънәле, кызыклы, тыңлаган саен тыңлыйсы килә торган. Салих Сәйдәшев музыкасы үзенең эчкерсезлеге, матурлыгы, затлылыгы белән дулкынландыра, моңландыра, яктылыкка, яхшылыкка чакыра.

2 нче декабрь көнне гимназиядә “Нейрочелтәрләр  һәм коммуникацияләр” ( “Нейросети и коммуникации”) темасына  “Сан дәресе” үтте. Ул мәктәп укучыларында цифрлы икътисадның төп компетенцияләрен үстерүгә, шулай ук аларның мәгълүмати технологияләр өлкәсендә алдан һөнәри юнәлеш алуына юнәлдерелгән. Программалаштыру буенча дәрес мавыктыргыч онлайн-уеннар рәвешендә тормышка ашырылды. Нәкъ тә шундый форматта булуы балаларда бу юнәлешкә кызыксыну уятты да инде.

Гимназиядә дүшәмбе көн ничек башлана соң? Бу көнне иртән үк бөтен коридор һәм кабинетларда: "Хәерле көн, кадерле гимназистлар! Сезнең белән мәктәп радиосы, һәм без программаны башлап җибәрәбез!» - дигән сүзләр яңгырый. Алып баручының тавышын барысы да тыңлый. Алар бүгенге көндә мөһим яңалыкларны хәбәр итә, тыңлаучыларны нинди дә булса кызыклы тапшырулар белән сөендерә һәм алдагы атнага куелган максатларны, үткәреләчәк чараларны санап үтә.

Бу зур проектта 5 нче сыйныфтан башлап 11 нче сыйныфка кадәр укучылар катнашалар. Бу атнада 5 “В” сыйныфы чыгыш ясадылар. Беренче чыгышлары гына булса да, өлкән сыйныфлардан бер дә калышмадылар.

Бүген, 25 нче ноябрь көнне, 1 “В” сыйныфында “Сан бәйрәме” дип аталган сыйныфтан тыш чара үтте. Бирегә кунакка “Саннар китабы” да килгән иде. Ул укучыларның нәрсә белгәннәрен, саннар буенча белемнәрен тикшерде. Шулай  ук балалар “Математик теремок” әкиятен сәхнәләштерделәр. Анда алып баручылар һәм төрле саннар катнашты. Әлеге чара оригиналь булды һәм бик күңелле үтте.

Җир йөзендә иң кадерле, газиз кеше - әни. Әниләр турында нинди генә матур сүзләр язсаң да, аз булыр сыман. Әни белән янәшә утыру, аның ягымлы тавышын ишетү, нурлы күзләренә карау - һәркем өчен дә иң зур бәхеттер.

Гимназиябездә Әниләр бәйрәменә карата чаралар ел саен оештырыла, гаилә, әти-әни турындагы темаларга һәрдаим әңгәмә, сыйныф сәгатьләре үткәрелеп тора. Бүген дә 1 “В”сыйныфы белән “Әни турында сөйләшү” темасына әңгәмә үтте. Биредә балалар фикерләр алыштылар, соңыннан әниләренең портретларын да ясадылар.  

Бүген 1 “В” сыйныфында “Х хәрефе” темасына ачык дәрес  үтте. Ул бик мавыктыргыч иде, шуңа да укучылар да актив каташтылар. Укучылар хәрефне дөрес язарга, әйтергә өйрәнделәр. Барысы да җыр, уен, шигырьләр сөйләү,видеоязмалар карау белән үрелеп барды.  Бер сулышта үткән әлеге дәрес барча укучыларга да, укытучыларга да бик ошады.

Елның кайсы гына вакыты булмасын, балачак иле шаулап-гөрләп тора.  Шуңа да бүген, 24 нче ноябрьдә, 4 “Б” сыйныфында “Балачак – бәхет иле” сыйныф сәгате үтте. Укучылар шигырьләр сөйләде, балачак турында җырлар башкарды, “кар атышлы” уйнады һәм инде иң ахырдан китапханәчебезнең сорауларына да җавап бирде. Чараның алып баручылары да укучылар үзләре иде. “Алдагы көннәрдә дә шулай аяз күктә кошлар сайрасын, йөзләребезне кояш иркәләсен, сау-сәламәт булып мул тормышта яшәргә язсын!” – дигән сүзләр белән балалар чараны тәмамлады. Сыйныф сәгате күңелне күтәрә торган, ямьле, күтәренке рухта үтте.