Бүгенге көндә һөнәри юнәлеш бирү мәсьәләләре дистәләрчә ел элек кебек үк мөхим сорау булып  тора. Тормышыбыз да, иминлегебез дә нәкъ менә дөрес сайланган белгечлеккә бәйле. Психологлар ата-аналарга үз фикерләрен көчләп тагарга түгел, ә үз балаларының мәнфәгатьләрен һәм өстенлекләрен исәпкә алып, һөнәр сайлаганда ярдәм итәргә киңәш итә.

Укучыларның үз һөнәрләрен дөрес сайлавында мәктәп тә зур роль уйный. Балаларның өстенлекле сыйфатларын исәпкә алып, билгеле бер  юнәлештә үсешкә ирешергә укытучылар ярдәм итә. Мәсәлән, бүген 9 “Б” сыйныфы укучылары өчен һөнәри юнәлеш буенча сыйныф сәгате үткәрелде. Алар үзләренең нинди тип юнәлештә булуларын, кайсы һөнәрләр туры килгәнен белә алдылар. Без укучыларыбызга  алдагы мөхим сайлауларында ялгышмауларын һәм уңышлар телибез!

Игелек атнасы башкаларга ярдәм итү темасына гына кагылып үтмәде бездә. Экология темасына да басым ясалды кайбер чараларда. Чөнки тирә-юнебезгә сакчыл караш та игелекле эшләрнең берсе булып тора. Мәсәлән, бездә башлангыч сыйныфлар белән “Минемчә, экология ул...” дигән әңгәмә оештырылды. Биредә балалар төрле табышмак-сорауларга җавап таптылар, табигатьне сакларга кирәклеге турында үзләренең фикерләрен дә әйттеләр. Нәни укучыларыбыз тирә-ягыбызга нәрсә яный, ничек экологик кризисны китереп чыгармаска икәнен беләләр.

Нәрсә соң ул игелек? Игелек – ул яхшылык ,изгелек, яхшылыкка җавап итеп кайтарылган яхшылык. Олылар гына түгел, ә кечеләр дә белергә тиеш бу төшенчәне. Без дә үз укучыларыбызның яхшы,якты күңелле булуларын телибез, шуңа да аларга матур сыйфатларны үзләштерергә ярдәм итәбез.

Бүген дә бездә Игелек Атнасы кысаларында 1 нче сыйныфлар өчен “Игелек дәресе” үткәрелде. Укучыларга кызыклы презентацияләр күрсәтелде, нәрсә ул яхшылык, нәрсә ул начарлык икәне аңлатылды. Шулай ук алар үзләре дә күп кенә сорауларга җавап бирә белделәр. Ә инде ахырдан аларга ярдәмгә мохтаҗларга булышырга кирәклеге сөйләнелде.

Бүген гимназиядә МВД хезмәткәре белән берлектә "Тимер юлда балалар куркынычсызлыгы" дип аталган лекция үткәрелде. Аның максаты - укучыларга яңа уку елы башлану белән тимер юл инфраструктурасы объектларында булганда куркынычсызлык кагыйдәләрен искә төшерү. Балалар һәм яшүсмерләр тимер юлда йөрү сәбәпле һәм аларны тиешле булмаган урыннарда якынлашып килүче поезд алдыннан узарга омтылганда җәрәхәтләнә. Шулай ук балигъ булмаганнар тимер юл составына санкцияләнмәгән күтәрелеш вакытында электроток йогынтысыннан да травмалар ала. Нәкъ тә шулар турында укучыларның исләренә төшерелде.

Балалар куркынычсызлыгы айлыгы кысаларында безнең китапханәдә “Юл йөрү кагыйдәләрен бел һәм сакла” дип аталган китаплар күргәзмәсе оештырылды. Биредә укучылар белергә тиеш булган бөтен кагыйдәләр дә тупланган китаплар, газета-журналлар беркетелгән. Шулай ук нәни укучыларыбыз – беренче сыйныфлар өчен дә бу темага караган кызыклы китаплар да биредә бар. Шуңа да балалар барысы да китапханәгә кереп, әлеге күргәзмәне күзәтә һәм яңа белемнәр туплый, аларны яңарта алалар.

Гимназиябездә 7 нче сентябрьдә “Изгелек атнасы” башланып китте. Иң беренче көнне башлангыч сыйныф укучылары үзидарәчелек белән берлектә “Изгелек почтасы”н төзеделәр. Биредә барысы да изге теләкләр язылган үз куллары белән ясаган открыткалар салалар. Алар дусларга, партадашларына, укытучыларга  мөрәҗәгать ителгән.

Гимназиябезнең 6 “Б” сыйныфы укучылары  “Мәкальләр һәм әйтемнәр” дигән күргәзмә оештырдылар. Алар рус мәкаль-әйтемнәренә иллюстрацияләр ясап, алардан китапчыклар төзегәннәр. Әлеге рәсемнәрнең күбесен табышмак буларак та санап була,чөнки укучылар иллюстрацияләрне кайсы мәкаль яисә әйтемгә багышланганын билгеләмәгәннәр. Китапханәдәге бу кечкенә күргәзмә барысына да кызыклы, аеруча башлангыч сыйныфлар бу эшләрне яратып күзәтәләр.

Яңа уку елы белән гимназиябезнең гадәти тормышы да башланды. Беренче көннән үк электрон газета, төрле чаралар, библиотека,иртәнге зарядка һәм, әлбәттә инде, мәктәп радиосы үз эшләренә тулысынча тотындылар. Бүген дә радиода  11 ”А” сыйныфы үзләренең чыгышлары белән укучыларга мөрәҗәгать итте. Алар үткән уку атнасының рейтингы турында сөйләп үттеләр, яңа уку атнасына куеган бурычлар, чаралар белән таныштырдылар. Шулай ук әлеге чыгышта истәлекле даталар турында да мәгълүмат бирелде.

Бүген, 7 нче сентябрь көнне, гимназиябездә планлы уку эвакуациясе үтте. Укучылар, укытучылар, гимназия хезмәткәрләре тиешле бөтен таләпләрне дә үтәделәр.

Бүген, 3 нче сентябрь көнне, гимназиябезнең барлык сыйныфларында “Экстремизмга – юк!” дип аталган сыйныф сәгатьләре үтте. Биредә 16 ел элек  Беслан шәһәрендә булган фаҗигә турында сүз алып барылды. 2004 нче елның  1 нче сентябреннән 3 нче сентябренә хәтле, террористлар Бесланның 1 нче номерлы мәктәбен яулап алалар.
Боевиклар төркеме Белем көненә багышланган тантаналы линейкада җыелучыларның барысын да бинага куып кертә. Террорчылар 1128 кешене кулга алалар, аларның күбесе – балалар.
Тоткыннар урнашкан спортзал миналаштырыла. Әсиргә алынганнар анда 2 тәүлектән артык сусыз, ризыксыз һәм кирәкле даруларсыз була. 3 нче сентябрь көнне спортзалдан 2 көчле шартлау ишетелә, шуннан соң спецназ хезмәткәрләре мәктәпне планлаштырылмаган штурм астына алалар. Алар үзләре белән балаларны каплыйлар, кулга алынганнарны эвакуациялиләр һәм террористлар белән атышуларын дәвам итәләр. Көрәш кичкә кадәр дәвам итә.
Теракт корбаннары – 334 кеше, алар арасында 318е – кулга алынганнары. Шуларның 186сы – балалар. 810 кеше яралана. Һәлак булганнар арасында 12 спецназ хезмәткәрләре һәм кулга алынганнарны коткаруда булышкан кеше дә була.
Гадәттә гел тыныч, матур, дулкынландыргыч 1 нче сентябрь көне елау, кайгы һәм ачудан калтырана. Бөтен дөнья террорчыларның Бесландагы җинаятьләреннән үкси һәм бүген дә фаҗигадә һәлак булганнарны хәтерли. Аларны онытырга безнеӊ хакыбыз юк.