Бүген, 27 нче апрель көнне, “Алиш эзләреннән” V фәнни-гамәли регион ара конференция узды. Чара Совет районының А. Алиш исемендәге 20 нче гимназиясендә узды. Конференциядә безнең гимназиянең 5 нче сыйныф укучылары Ибушева Л. һәм Әхәтова А. катнаштылар. Ибушева Л. 1 нче урынга, ә Әхәтова А. лауреат исеменә лаек булды.
Кызларны уңышлары белән котлыйбыз! Аларга киләчәктә дә уңышлар телибез!

Бүген – бөек шагыйребез Габдулла Тукайның туган көне. Бүген бөтен татар дөньясы шагыйребезнең туган көнен, Туган тел бәйәмен билгеләп үтә. Татар шигъриятендә Габдулла Тукай – иң якты йолдыз. Ул үзеннән соң 400дән артык шигырь, 9 поэма һәм 50 якын проза әсәрләре язып калдырган. Татар халкында бөек шагыйребезнең әсәрләрен белмәгән кеше юктыр.
Безнең гимназиябездә дә бүген чын мәгънәсендә бәйрәм. Мәктәп радиосы дулкыннарында Г. Тукай турында сөйләнә, аның шигырьләре укыла, җырлары җырлана. Шулай ук укучыларыбыз актлар залына җыелып Г. Тукай турында кызыклы мәгълүматлар тыңладылар, аның шигырьләрен укыдылар. Ни өчен гимназиябезнең Г. Тукай исемен йөртүен хәтерләрендә яңарттылар. Ә чараның иң кульминацион ноктасы: барыбыз бергә “Туган тел” җырын башкару булды. 

Бүген, 26 нчы апрель көнне, республикабыз бөек шагыйребез Г. Тукайның туган көнен билгеләп үтә. Шул уңайдан мәркәзебездә бик күп чаралар уздырыла. Шундый чараларның берсе ул, шәһәр үзәгендә урнашкан Г. Тукай һәйкәленә чәчәкләр салу тантанасы. Бу чарада безнең гимназиянең 6 нчы сыйныф укучылары да катнашты, истәлекле вакыйгалар шаһиты булды.

Бүген гимназиябездә Г. Тукайның туган көненә багышланган чаралар дәвам итә. Мәктәп күләм уздырылган чаралардан тыш һәр сыйныф бөек шагыйребезне сыйныф сәгатләрендә, татар теле һәм әдәбияты дәресләрендә искә ала.
1 нче Б сыйныфы укучылары да Г. Тукайга багыланган сыйныф сәгате үткәрделәр. Аның тормыш юлы, иҗаты белән таныштылар. Хәтта рәсем дәресе дә Г. Тукайның әсәрләренә багышланган иде. Укучылар аның әсәрләре геройларын ясадылар, “Туган тел” җырын башкардылар. Бер-берсен бәйрәм белән котладылар. 

Ел да республикабызда “Илһам” бөтенроссия яшь язучылар, шагыйрьләр һәм драматурглар бәйгесе үткәрелә. Безнең гимназия укучылары ел да әлеге бәйгедә бик теләп катнашалар. Быел бәйгенең бүләкләү тантанасы 25 нче апрель көнне М. Җәлил исеменедәге опера һәм балет татар Дәүләт академия театрында булды.
Гимназиянең 10 нчы сыйныф укучысы Әхмәдуллин Р. “Илһам” бәйгесендә 1 нче урынга лаек булды. Укучыбызны әлеге зур уңышы белән тәбрик итәбез!

Соңгы елларда республика мәктәпләрендә директорларның халык алдында эшләнгән эшләр турында доклад ясауы традициягә әйләнде. Бу чара белем бирү оешмаларында идарә проектын үстерү максатыннан оештырыла. Директорыбыз Гөлфия Гаязовна 24 нче апрель көнне әти-әниләрне һәм килгән кунакларны мәктәп эшчәнлеге, гимназиядә булган яңалыклар белән таныштырды. 

Гимназиядә, гади дәресләрдән тыш, тәрбия сәгатьләре, сыйныф сәгатьләре дә уздырыла. Укучыларыбыз бу дәресләрдә этикет нормаларына, әхлак кагыйдәләренә, табигаттә, җәмгыяттә үз-үзләрен тотарга өйрәнәләр.
Бүген, 23 нче апрель көнне, шундый тәрбия дәесләренең берсе 2 нче В сыйныфында узды. Бу сыйныф - мәктәбебезнең “Чишмә” исемле экологик отряды булып тора. Чара 22 нче апрель – Җир көненә багышлап, “Прекрасная планета по имени Земля” темасына үткәрелде. Әлеге тәрбия дәресенең кунаклы 2 нче Б сыйныфы булды. Чара барлык укучыларның да күңеленә хуш килде.

Бүген, 19 нчы апрель көнне, 1945 нче елгы Берлин сугышына багышланган ветераннар белән очрашу узды. Очрашуның беренче өлешендә, сыйныфларда, ветеран-лекторлар Берлин сугышы турында сөйләделәр. Ә икенче өлешендә, укучыларыбыз Бөек Ватан сугышы ветераннарын матур җырлар, биюләр, нәфис сүзләр белән сөендерделәр.
Бөек Ватан сугышы ветераннары инде санаулы гына калып бара. Аларга алмашка сугыш чоры балалары килә. Бу кешеләрнең бала чаклары, үсмер еллары сугыш вакытына туры килгән. Ил өчен иң авыр елларда, бу кешеләр барлык авырлыкларны үз җилкәләрендә күтәргәннәр. Әтиләре, абыйлары, туганнары өчен дә икеләтә хезмәт куйганнар.
Шундый тәрбияви, мәгънәле, патриотик, мәгълүмати чара укучылар күңеленә хуш килде. Май бәйрәмнәре алдыннан Бөек Ватан сугышы турында белемнәрне яңарттык, тарихка тагын да якынайдык. 

Менә апрель аеның да икенче яртысын узып барабыз. Димәк тиздән май ае җитә. Ә май ае, белүебезчә, Бөек Ватан сугышы тәмамлану белән истәлекле. Бу айда без аеруча әлеге чор белән янып яшибез, ветераннарны хөрмәтлибез, тарихи истәлекләрне яңартабыз.
19 нче апрель көнне гимназиядә ветераннар белән очрашу узачак. Чарага әзерлек берничә атна дәвамында барды. Сугыш темасына җырлар, биюләр, нәфис сүзләр өйрәдек, 1945 нче елгы берлин сугышы тарихын искә төшердек. 16 нчы апрельдән алып 18 нче апрельгә кадәр 5-8 һәм 10 нчы сыйныф укучылары “1945 нче елгы Берлин сугышын иң яхшы белүче сыйныф” титулына ия булу өчен көч сынаштылар. Нәтиҗәләр түбәндәгечә билгеләнде:
1 нче урын – 5 нче В сыйныф;
2 нче урын – 7 нче А сыйныфы;
3 нче урын – 10 нчы А сыйныфы.
Җиңүчеләрне тәбриклибез!

Игътибар! Игътибар! Игътибар!
Бүген, 2018 нче елның 18 нче апрелендә, гимназиядә мәктәп радиосы эшли башлады. Бүгенге тапшыруларда радионың форматы, эчтәлеге, эш сәгатьләре турында мәгълүмат җиткерелде. Шулай ук гимназия яңалыклары, котлаулар, белдерүләр турында сөйләнде.
Мәктәп радиосы укучыларда зур кызыксыну уятты. Алар инде бүгеннән үк үзләренең тапшыруларын әзерли башладылар.
Исегезгә төшерәбез, радио 1 нче дәрес алдыннан һәм 3 нче, 4 нче дәресләрдән соң эфирга чыга.
Бүгенге истәлекле дата белән барлык укучыларны, укытучыларны тәбрик итәбез! Радиога матур эфирлар, уңышлы проектлар теләп калабыз!