3 июнь ( шимбә көнне) 9нчы сыйныф укучылары информатика һәм физика фәннәреннән сайлау имтиханнарының чираттагысын тапшырды.  Информатикага  2сәг.30 мин., ә  физикага  3сәг. вакыт   каралганлыгын   истә  тотып,  барлык  укучылар  да  үз  эшләрен    билгеләнгән  вакытка   төгәлләде. 

1нче май көнне 9нчы сыйныф укучылары үзләренең чираттагы имтиханнарын тапшырды. Физика фәнен сайлаган укучылар 3 сәг. буена үзләренең өч ел дәвамында алган белемнәрен сынады.

27нче май көнне "Пирамида" күңел ачу үзәгендә  Республика   күләмендә   зур  уңышларга  ирешкән   укучы  һәм  укытучыларны   бүләкләү  кичәсе  булып  узды.  9 А  сыйныфы  укучысы  Д. Фаекова   РӘХМӘТ ХАТЫ   ҺӘМ  10мең  сумлык  СЕРТИФИКАТ   белән   бүләкләнде.  Шул  исәптән,  Диләнең   укытучысы   һәм   фәнни   җитәкчесе  Э. Р. Хөснетдинова   да   Мәгариф  һәм  фән  министрлыгының  РӘХМӘТ ХАТЫна  һәм  СЕРТИФИКАТына  ия  булды.  Ә без  исә   укучыбызны  һәм  укытучыбызны,  Мәгариф  һәм   фән   министрлыгы тарафыннан җиткерелгән  котлауларга  кушылып,  югары  мәртәбәләргә   ирешүләре   белән  тәбриклибез.

Бүген 9нчы сыйныф укучылары   рус теле фәненнән беренче имтиханнарын тапшырды.  Алда   сынаулар   июнь   ае  дәвамында  көн   аралаш  булыр  дип көтелә

Балаларның җәйге ялларын файдалы һәм мавыктыргыч итеп оештыру - көн кадагындагы мәсьәләләрнең берсе. Гимназиябез яны лагеренда быел барлыгы 80 бала ял итәчәк. Ял итәргә җыенган балаларның исәбен ,нигездә, 1- 4 сыйныф укучылары тәшкил итә.
Иртәнге 8сәг.30мин. тан алып 14сәг.30 мин.ка кадәр укучылар төрле экскурсияләргә йөриләр, ял итәләр, ике тапкыр тукланалар. Гимназия үз эшчәнлеген төрле традицияләренә бәйле юнәлештә алып барганлыктан, лагерьда узачак чаралар күбрәк физик тәрбия , сәламәтлек, экология һәм сәнгать белән бәйле булачак. Моннан тыш, балаларын лагерьдан вакытында ала алмаган ата-аналар өчен озайтылган көн төркемнәрендә педагогларның кизү тору графигы да каралган. Җәйге лагерь сменасы  29нчы  майдан, ягъни  бүгеннән  башлап   21 көн   дәвамында   эшләячәк. 

Бүген гимназиянең  мини-футбол кырында язгы СПАРТАКИАДА уеннары узды. Уенда 6, 7, 8 сыйныф укучылары үзара көч сынашты.  Сыйныф   җитәкчеләре  дә  җанатарлар  сыйфатында   үзләренең   укучылары  өчен   читтән  генә   җан  атты.   

Узып баручы уку елына йомгак ясап, 26нчы май көнне ата-аналар җыелышы узды. 

Бүгеннән 1нче сыйныфлар беренче  җәйге каникулларына  таралды.

Бүген гимназиянең традициясеннән булган тагын бер матур гадәт үтәлде. Башлангыч сыйныф укучыларының әти-әниләре традициягә тугры калу һәм мәктәп мәйданын матурлау йөзеннән, гимназия ишегалдына чәчәкләр утыртты. Үз йортлары белән торучы әти-әниләр арасында инде чәчәк утырту белән бик күп еллардан бирле шөгыльләнүчеләр, бу эшне үзенә кәсеп итүчеләр дә бар икән.  Әти-әниләр актив булгач, чәчәк утырту бик позитив башкарылды. Барысы да үз эшләреннән канәгать иде. Утырткан үсентеләр чәчәк атып, җәй буе гимназиягә матурлык өстәп торсыннар инде!

"Шатлыклар - күңелебездә, ал кояш - күгебездә, килегез безгә кунакка - 24нче май, сәг.10да " Чыгарылыш кичәсе" була бездә!" дигән үз куллары белән эшләнгән чакыру кәгазьләре таратып , 4нче сыйныфлар укытучыларын  үзләренең бәйрәмнәренә  чакырды. " Чыгарылыш  кичәсе"  4нче  сыйныфлар  өчен   шартлы   төстә  генә әйтелсә  дә,  әлеге  бәйрәмнең   эчтәлеге юк  түгел:  "беренче укытучы"  төшенчәсе  алар  өчен  хәзер  башлангыч  мәктәп  белән  бәйле  булып  калачак, бер сыйныфта утырып   уку  да  кабинеттан-кабинетка   йөреп  белем  алу   белән   алмашыначак ... Ә  бүген  исә алар   4ел  буе белем  биргән  беренче  укытучылары  белән "Чыгарылыш  кичәсе"н  бәйрәм  итте. Бу уңайдан актлар залында бәйрәм концерты оештырылды. Улларының һәм кызларының мәктәптәге тәүге чыгарылыш кичәсен карарга балаларның әти-әниләре  килгән  иде. Беренче укытучы белән саубуллашу моңсулыгын татып өлгергән, күңелләрендә зур үсү шатлыгын һәм , шул ук вакытта, балачакның кабатланмас мизгелләрен саклап калган 4 ел вакытның үтеп киткәнлеген аңлап та өлгермәгән укучыларга гимназиянең директоры Г. Г. Шәмсиева күңел  түрләреннән   чыккан иң якты, матур теләкләрен җиткереп, 4нчеләрне бәйрәмнәре белән котлады. Тора- бара сүз балаларның үзләренә бирелде: шигырьләр сөйләнде, җырлар җырланды... Ахырда сүз ата- аналарга тапшырылды. Алар да үзләренең күңел түрләреннән чыккан теләкләрен беренче укытучыларына, гимназия идарәсенә җиткерде.